အမေရိကန်ပြည်ထောင်စုမှာ ရိက္ခာနဲ့ လောင်စာဆီ တင်ပို့မှုကို ရပ်တန့်သွားစေပြီး ရထားစီး ခရီးသွားတွေ လမ်းမှာ သောင်တင်နိုင်ခြေရှိတဲ့ ရထားလမ်းလုပ်သားတွေ မပြေလည်မှုအကြား ဖြစ်လာနိုင်ခြေရှိတဲ့ ရထားဝန်ထမ်းများသပိတ်ကို ရှောင်လွှဲဖို့ လွှတ်တော်က အရေးယူဆောင်ရွက်ဖို့ လိုအပ်ကြောင်း အမေရိကန်သမ္မတ ဂျိုးဘိုင်ဒင်က နိုဝင်ဘာ ၂၉ ရက်မှာ ပြောကြားခဲ့ပါတယ်။

သမ္မတ ဘိုင်ဒင်ဟာ ရထားလမ်းလုပ်သားတွေနဲ့ အော်ပရေတာတွေအကြား အကြိုသဘောတူစာချုပ်ကို ချမှတ်ရေး ဥပဒေပြုဖို့ မနေ့ကပဲ ကွန်ဂရက်ကို မေးမြန်းခဲ့ပါတယ်။

လာမယ့်နှစ် အစောပိုင်းမှာ အောက်လွှတ်တော်ကို ရီပတ်ဘလစ်ကန်တွေ မထိန်းချုပ်ခင် ယူကရိန်းနဲ့ ကိုဗစ်-၁၉ အတွက် ရန်ပုံငွေရရှိရေးဟာ သူ့ရဲ့ ဦးစားပေးဖြစ်ကြောင်း ဘိုင်ဒင်က ခေါင်းဆောင်တွေကို ပြောခဲ့ပါတယ်။

ဆွေးနွေးပွဲစချိန်မှာ ဘိုင်ဒင်က ယူကရိန်းအတွက် စစ်ဘက်ဆိုင်ရာ အကူအညီတွေ ပိုမိုထောက်ပံ့တာနဲ့ ကိုရိုနာဗိုင်းရပ်စ် ကူးစက်ရောဂါကို တိုက်ဖျက်ဖို့အတွက် ရန်ပုံငွေအစီအမံ ကိစ္စတွေဟာ အခုချိန်နဲ့ ခရစ္စမတ်ကြားကာလမှာ ဥပဒေပြုရေးအတွက် ဦးစားပေး ဆွေးနွေးရမယ့်ကိစ္စတွေ ဖြစ်တယ်လို့ ဆိုပါတယ်။

နိုဝင်ဘာ ၈ ရက် ကြားဖြတ်ရွေးကောက်ပွဲမှာ အောက်လွှတ်တော်ကို ရီပတ်ဘလစ်ကန်တွေက ပွတ်ကာသီကာ မဲအနိုင်ရသွားတာကြောင့် ဇန်နဝါရီမှာ နေရာဝင်ယူကြတော့မှာဖြစ်လို့ လာမယ့် ၂ နှစ်အတွက် ဘိုင်ဒင်ရဲ့ အစီအစဉ်တွေကို ရှုပ်ထွေးစေပါတယ်။ ဘိုင်ဒင်ရဲ့ ဒီမိုကရက်တွေဟာ အထက်လွှတ်တော်ကိုတော့ ဆက်ထိန်းချုပ်ထားပါတယ်။

အမေရိကန်သမ္မတ ဂျိုးဘိုင်ဒင်က အမေရိကန်ပြည်ထောင်စုနဲ့ အရှေ့တောင်အာရှနိုင်ငံများအသင်း အာဆီယံကြား ဘက်စုံမဟာဗျူဟာမြောက် ပူးပေါင်းဆောင်ရွက်မှုဟာ အကြီးမားဆုံး ပြဿနာတွေကို ကိုင်တွယ်ဖြေရှင်းရာမှာ အထောက်အကူဖြစ်စေလိမ့်မယ်လို့ နို၀င်ဘာ ၁၂ ရက်က ပြောလိုက်ပါတယ်။

"ဒီနေ့ ကျနော်တို့ဟာ နောက်ထပ် အရေးကြီးတဲ့ ခြေလှမ်းတရပ်ကိုလှမ်းပြီး အမေရိကန် အာဆီယံဘက်စုံ မဟာဗျူဟာမြောက် မိတ်ဖက်ပူးပေါင်းဆောင်ရွက်မှုကို စတင်ခြင်းအားဖြင့်  ပူးပေါင်းဆောင်ရွက်မှုခေတ်သစ်ကို စတင်ခဲ့ပါတယ်။ ရာသီဥတု ဖောက်ပြန်ခြင်းမှသည် ကျန်းမာရေးလုံခြုံရေးအထိ၊ စည်းမျဥ်းအခြေခံတဲ့ အမိန့်အပေါ် သိသာထင်ရှားတဲ့ ခြိမ်းခြောက် မှုတွေ စည်းကမ်းအခြေခံတဲ့ အမိန့်တွေရဲ့ ခြိမ်းခြောက်မှုတွေနဲ့  တရားဥပဒေစိုးမိုးရေးအပေါ် ခြိမ်းခြောက်မှုတွေကနေ ကာကွယ်ဖို့၊ အပါအဝင် ကျနော်တို့ ခေတ်ရဲ့ အကြီးမားဆုံး ပြဿနာတွေကို အတူကိုင်တွယ်ဖြေရှင်း သွားမယ်” လို့ ဘိုင်ဒန်က ပြောပါတယ်။

ကမ္ဘောဒီးယားနိုင်ငံမှာ ကျင်းပနေတဲ့ အမေရိကန်နဲ့ အရှေ့တောင်အာရှနိုင်ငံများအသင်း (အာဆီယံ) ထိပ်သီးအစည်းအဝေးမှာ ဘိုင်ဒန်က ဒီသဘောတူညီချက်အတွက် လွတ်လပ်ပွင့်လင်းတဲ့၊ တည်ငြိမ်သာယာဝပြောပြီး ခံနိုင်ရည်ရှိတဲ့ လုံခြုံဘေးကင်းတဲ့ အင်ဒို-ပစိဖိတ်ဒေသကို တည်ဆောက်ရာမှာ အထောက်အကူ ဖြစ်စေလိမ့်မယ်လို့လည်း ပြောပါတယ်။