ယူကရိန်းနိုင်ငံ၊ ဘူချာမြို့မှာ ရုရှားတို့ အစုလိုက်အပြုံလိုက် သတ်ဖြတ်မြှုပ်နှံခဲ့တဲ့ အလောင်းတွေကို အလုပ်သမားတွေက ပြန်လည်တူးဖော်နေတာကို ရိုက်တာသတင်းဌာနက ဒရုန်းနဲ့ ဗီဒီယိုရိုက်ယူထားပါတယ်။
အဖြူရောင် အကာအကွယ်ဝတ်စုံဝတ်ထားတဲ့ အလုပ်သမားတွေက ဧပြီ ၇ ရက်ကတည်းက အလောင်းတွေ ပြန်တူးဖော်နေတာပါ။
နိုင်ငံတကာ စစ်ရာဇဝတ်မှုစုံစမ်းစစ်ဆေးရေးအဖွဲ့တွေက ရုရှားတပ်တွေ ဆုတ်ခွာစဉ် ဘူချာမှာ အရပ်သားတွေ အများအပြား သတ်ဖြတ်ခဲ့တာကို အတည်ပြဖို့ ရောက်ရှိနေတာပါ။
ပူတင်အစိုးရကတော့ သတ်ဖြတ်မှုတွေအတွက် တာဝန်ရှိကြောင်း ငြင်းဆိုပြီး ယူကရိန်းအစိုးရနဲ့ နိုင်ငံတကာက ရုရှားကို သိက္ခာချဖို့ လုပ်နေတာသာဖြစ်တယ်လို့ ပြောဆိုပါတယ်။
ရုရှားတပ်တွေ ဆုတ်ပြေးစဉ် ယူကရိန်း အရပ်သားအများအပြားကို သတ်ဖြတ်ခဲ့တဲ့ ဘူချာမြို့ကို ဧပြီ ၈ ရက်နေ့က ဥရောပကော်မရှင်ဥက္ကဋ္ဌ အာဆူလာ ဗွန်ဒါ လေယန်း သွားရောက်ကြည့်ရှုခဲ့ပါတယ်။
အာဆူလာဟာ ယူကရိန်းဝန်ကြီးချုပ်၊ အီးယူနိုင်ငံခြားရေးဝန်ကြီးတို့နဲ့အတူ လူအစုလိုက်အပြုံလိုက် အသတ်ခံရတဲ့ ဘူချာမြို့ ခရစ်ယာန်ဘုရားကျောင်း အနောက်ဘက် ကွင်းနေရာကို သွားကြည့်ခဲ့တာပါ။
အာဆူလာက “ဒီမှာ ဖြစ်ပျက်နေတာတွေကြည့်ပြီး ပူတင်စစ်တပ်ရဲ့ ရက်စက်ကောက်ကျစ်တဲ့ မြေခွေးမျက်နှာတွေ သွားမြင်မိတယ်။ မြို့ကို တခဏသိမ်းပိုက်ထားချိန်မှာ နှလုံးသားမရှိ သွေးအေးအေးနဲ့ လူမဆန်အောင် လုပ်သွားတာ ရွံ့ဖို့ကောင်းပါတယ်။ ဘူချာမှာ ကျမတို့လူသားတွေ အစိတ်စိတ်အမြွှာမြွှာဖြစ်သွားတာ၊ ဘူချာကလူတွေအတွက် ကမ္ဘာက ငိုကြွေးနေမယ်၊ အခုစစ်ပွဲဟာ လူသားထုကို ကာကွယ်တဲ့ စစ်ပွဲ၊ ဥရောပနယ်နမိတ်ကို ကာကွယ်တဲ့ စစ်ပွဲပါ” လို့ ပြောပါတယ်။
အဆူလာက ယူကရိန်းဟာ ပြာပုံဘဝကနေ မကြာခင် စံပြဒီမိုကရက်တနိုင်ငံ ဖြစ်လာလိမ့်မယ်လို့ ပြောပြီး ဥရောသမဂ္ဂအဖွဲ့ဝင်အဖြစ်လည်း ကြေညာတော့မယ်လို့ ပြောခဲ့တာပါ။
