ဘရာဇီးသမ္မတဟောင်း ဘော်ဆိုနာရိုဟာ ဝမ်းဗိုက်နာရောဂါကြောင့် ဖလော်ရီဒါပြည်နယ် အော်လန်ဒိုမြို့က ဆေးရုံတခုဆီ တင်ပို့ထားရတယ်လို့  ဒေသခံ အိုဂလိုဘိုသတင်းစာက ဇန်နဝါရီ ၉ ရက်နေ့မှာ ထုတ်ပြန်ပါတယ်။

ဘော်ဆိုနာရိုရဲ့ သဘောထားတင်းမာတဲ့ ထောက်ခံသူတချို့က ဘရပ်စီးလီးယားမြို့တော် အစိုးရနေရာတွေကို ဝင်ရောက်စီးနင်းပြီးနောက် တရက်အကြာမှာ ဒီသတင်းဖော်ပြခဲ့တာပါ။

ဘော်ဆိုနာရိုဟာ ၂၀၁၈ ခုနှစ်က သမ္မတရာထူးအတွက် မဲဆွယ်စည်းရုံးနေတုန်း ဓားနဲ့ အထိုးခံရပြီးတဲ့နောက် မကြာသေးမီနှစ်တွေအတွင်း အကြိမ်ပေါင်းများစွာ ဆေးရုံတက်ခဲ့ရပါတယ်။

လက်ရှိ ဘရာဇီးသမ္မတ လူလာဒါဆေးလ်ဗား သမ္မတတာဝန် မထမ်းဆောင်မီ နှစ်ရက်အလိုမှာ ဘော်ဆိုနာရိုဟာ အမေရိကန်နိုင်ငံဆီကို ထွက်ခွာသွားခဲ့တာပါ။

ဇန်နဝါရီ ၈ ရက်က ဘရာဇီးမြို့တော်ကို ဝင်ရောက်စီးနင်းမှုဟာ လက်ယာစွန်းသမ္မတဟောင်း ဘော်ဆိုနာရိုအနေနဲ့ “နိုင်ငံတော်အာဏာသိမ်းမှု ရာဇဝတ်မှု” မြောက်တယ်လို့ ဘရာဇီးလ် တရားရေးဝန်ကြီး ဖှလာဒီယို ဒီနိုက ဇန်နဝါရီ ၉ ရက် သတင်းစာရှင်းလင်းပွဲမှာ ပြောလိုက်ပါတယ်။

တရားရေးဝန်ကြီးဒီနိုက ပြီးခဲ့တဲ့ရက်ပိုင်းကဖြစ်ခဲ့တဲ့ အဓိကရုဏ်းတွေကို ၂၀၂၁ ခုနှစ် အမေရိကန်လွှတ်တော်ကို တိုက်ခိုက်မှုနဲ့ နှိုင်းယှဉ်ခဲ့ပေမဲ့ ဘရပ်စီးလီးယားမြို့တော်က ဖြစ်ရပ်မှာ လူသေဆုံးမှုမရှိဘဲ နောက်ထပ် လူတွေကို ထိန်းသိမ်းထားတယ်လို့ ရှင်းလင်းပြောကြားခဲ့ပါတယ်။

ဘော်ဆိုနာရိုဟာ သူ့သက်တမ်းအတွင်း သူ့နောက်လိုက်တွေကို ဆိုရှယ်မီဒီယာပေါ်မှာ သြဇာလွှမ်းမိုးဖို့ သူ့ရဲ့ သင်္ကေတပါဝါကို သုံးခဲ့ပြီး တရားရုံးချုပ်ကို တိုက်ခိုက်ဖို့ ပစ်မှတ်ထားခဲ့တယ်လို့ ဝန်ကြီးက ပြောပါတယ်။

ဘော်ဆိုနာရိုကို ထောက်ခံသူတွေက ရွေးကောက်ပွဲ ရှုံးနိမ့်ပြီးကတည်းက  ဆန္ဒပြနေကြတာဖြစ်ပြီး စစ်တပ်ဌာနချုပ်နဲ့ မျက်နှာချင်းဆိုင်ရှိ သပိတ်စခန်းတခုကို တနင်္လာနေ့မှာ ဘရာဇီးစစ်သားတွေက ဖြိုချခဲ့ကာ ဘရာဇီးလ်မြို့တော်မှာ စည်းကမ်းသေဝပ်အောင် ပြန်လုပ်ခဲ့ပါတယ်။

အဓိကရုဏ်းနှိမ်နင်းရေးရဲတွေက သပိတ်စခန်းကို ရှင်းလင်းခဲ့ပြီး လူ ၁,၀၀၀ လောက်ကို စစ်ဆေးမေးမြန်းဖို့ ဖမ်းဆီးထားတယ်လို့ ရိုက်တာသတင်းဌာနက မျက်မြင်သက်သေတွေကို ကိုးကား ဖော်ပြပါတယ်။

ဘော်ဆိုနာရိုရဲ့ နောက်လိုက် ထောင်ပေါင်းများစွာဟာ သမ္မတအိမ်တော်၊ တရားရုံးချုပ်နဲ့ အောက်လွှတ်တော်တို့ကို မဝင်ရောက်မီ တနင်္ဂနွေနေ့က ချီတက် ဆန္ဒပြခဲ့ကြပါတယ်။ ဒါဟာ ၁၉၈၀ ပြည့်နှစ်တွေက ဘရာဇီးနိုင်ငံမှာ ဒီမိုကရေစီ ပြန်လည်ရောက်ရှိပြီးနောက်ပိုင်း အဆိုးရွားဆုံးတိုက်ခိုက်မှု ဖြစ်ခဲ့ပါတယ်။

ဆန္ဒသူတွေကို နေရာရွှေ့ပြောင်းဖို့ ရဲတပ်ဖွဲ့က မျက်ရည်ယိုဗုံးတွေ သုံးခဲ့ရပြီး လူအများအပြားကို ဘတ်စ်ကားတွေနဲ့ ထိန်းသိမ်းခဲ့ပါတယ်။

ဘရားဇီးလ်နိုင်ငံကနေ ထွက်ခွာသွားတဲ့ သမ္မတ ဂျိုင်ရ်ဘော်ဆိုနာရိုဟာ ဒီဇင်ဘာ ၃၀ ရက်က အမေရိကန်နိုင်ငံ၊ ဖလော်ရီဒါပြည်နယ်ကို ရောက်ရှိလာပါတယ်။ 

ဒါဟာ သဘောထားတင်းမာတဲ့ လက်ဝဲယိမ်း ပြိုင်ဘက်ဖြစ်သူ လူးဝဇ်အီနာစီယို လူလာ ဒါဆေးလ်ဗားက သမ္မတရာထူးရယူမယ့် ကျမ်းသစ္စာကျိန်ဆိုမှု မတိုင်ခင် ၂ ရက်အလိုမှာပဲ ဘော်ဆိုနာရိုက သူ့အပေါ် ထောက်ခံသူတွေကို မျက်ရည်တွေနဲ့ သတင်းစကား ပါးခဲ့ပြီးနောက် အမေရိကန်ကို ရောက်ရှိလာတာပါ။ 

ပြီးခဲ့တဲ့ ဒီဇင်ဘာ ၃၀ နှောင်းပိုင်းမှာ ဖလော်ရီဒါပြည်နယ်၊ အော်လန်ဒိုမြို့ကို ဘရားဇီးလ်လေယာဉ်တစ်စင်း တရားဝင် ရောက်ရှိလာတယ်လို့ လေကြောင်း ခြေရာခံဝက်ဆိုဒ် တခုဖြစ်တဲ့ FlightAware မှာ ဖော်ပြထားပါတယ်။ 

ဘော်ဆိုနာရိုရဲ့ ဦးတည်ရာလမ်းကြောင်းကို တရားဝင် အတည်မပြုရသေးပေမယ့် သူ့ရဲ့လုံခြုံရေး ဝန်ထမ်းတွေကတော့ ဖလော်ရီဒါပြည်နယ်မှာ ရောက်နေပြီ လို့ သိရပါတယ်။

လာမယ့်ဇန်နဝါရီ ၁ ရက်မှာ ဘရားဇီးလ်နိုင်ငံမှာ ပြုလုပ်မယ့် သမ္မတ ကျမ်းသစ္စာကျိန်ဆိုပွဲမှာ ဘော်ဆိုနာရိုက ဘရားဇီးလ် ဒီမိုကရေစီအစဉ်အလာအရ သမ္မတစလွယ်ကို လူလာဆီ လွှဲပြောင်း ပေးမှာ မဟုတ်ဘူးလို့ အကြိမ်ကြိမ် ပြောဆိုခဲ့ပြီးနောက်မှာ နိုင်ငံကနေထွက်ခွာလာခဲ့တာပါ။ 

လူလာအနေနဲ့ သမ္မတအဖြစ် စတင်တာဝန်ယူလိုက်တာနဲ့ ဘော်ဆိုနာရိုရဲ့ ရာထူးအရ လွတ်ငြိမ်းချမ်းသာခွင့်ဟာလည်း သက်တမ်းကုန်ဆုံးမှာ ဖြစ်တာကြောင့် နိုင်ငံတွင်းမှာ ဆက်လက် နေထိုင်တဲ့အခါ တရားစွဲဆိုမှုအန္တရာယ်နဲ့ ရင်ဆိုင်ရဖွယ် ရှိနေတာပါ။ 

အမေရိကန်နိုင်ငံခြားရေးဝန်ကြီးဌာနကတော့ မှတ်ချက်ပေးဖို့ တောင်းဆိုမှုအပေါ် ချက်ချင်း တုံ့ပြန်ခြင်း မရှိပါဘူး။ 

ဘရားဇီးလ်မြို့တော် ဘရာစီလီယာရှိ အမေရိကန်သံရုံးကလည်း ဘော်ဆိုနာရိုရဲ့ ဘရာဇီးလ်သမ္မတရုံးကို သွားရောက်ခဲ့တာနဲ့ ပတ်သက်တဲ့ မေးခွန်းတွေကို ရှောင်လွှဲခဲ့ပါတယ်။