စစ်ကောင်စီ ဦးဆောင်ကျင်းပခဲ့တဲ့ မန္တလေးမြို့ သင်္ကြန်ပွဲတော်မှာ ပါဝင်အလှပြခဲ့တဲ့ လှည်းယာဉ်တွေအတွက် ဆုချငွေတွေကို နောက်တရက်မှာပဲ ပြန်တောင်းခံခဲ့ရတယ်လို့ မန္တလေးစည်ပင်နဲ့ နီးစပ်သူတွေထံက သိရပါတယ်။

လှည်းယာဉ်တွေအတွက် အစမ်းလေ့ကျင့်တဲ့နေ့နဲ့ အကြိုနေ့အတွက် နေ့တွက်ခကိုတော့ ပေးချေပြီး အတက်နေ့ညက စည်ပင်ရုံးရှေ့ ဗဟိုမဏ္ဍပ် ဆုချီးမြှင့်ပွဲမှာ ပေးခဲ့တဲ့ ဆုငွေတွေကို ပြန်တောင်းတာလို့ သိရပါတယ်။

စည်ပင် ဝန်ထမ်းတဦးက “အဲ့ဒါ TV ရိုက်နေတာမို့ ဟန်ပြပေးလိုက်တာတဲ့၊ အဲ့ပိုက်ဆံက ဌာနကငွေတွေတဲ့၊ အခု ပိုက်ဆံရှင်းစရာမရှိလို့ ပြန်လာပို့လှည့်ပါဆို ပြန်တောင်းတာနဲ့ ပြန်ပေးလိုက်ရတာတဲ့” လို့ ပြောပါတယ်။

သင်္ကြန်မှာ ပြသဖို့ လှည်းယာဉ်တွေ၊ ငှက်လှေတွေနဲ့ ယိမ်းအဖွဲ့တွေလည်း ပါဝင်ခဲ့ပြီး အဲဒီထဲကနေ ရွေးချယ်ကာ ဆုတွေချီးမြှင့်ခဲ့တာလည်း ဖြစ်ပါတယ်။ 

လှည်းယာဉ်တွေဆီ ဆုချီးမြှင့်ငွေတွေကို နှစ်ဆန်းတစ်ရက်နေ့မှာ ပြန်တောင်းခဲ့တာလို့ သိရပါတယ်။ တခြားအဖွဲ့တွေဆီက ပြန်တောင်းခြင်းရှိမရှိကိုတော့ အတည်မပြုနိုင်သေးပါဘူး။

အလှပြလှည်းယာဉ်တွေထဲက ပထမဆုကို အမရပုရမြို့နယ်ကိုယ်စားပြု လှည်းယာဉ်အဖွဲ့ကရရှိပြီး ဆုငွေ ကျပ်သိန်းငါးဆယ်၊ ဒုတိယဆုကို အောင်မြေသာစံ မြို့နယ်ကိုယ်စားပြုအဖွဲ့ကရရှိပြီး ဆုငွေ လေးဆယ့်ငါးသိန်းကျပ်၊ တတိယဆုကို ပုသိမ်ကြီးမြို့နယ် ကိုယ်စားပြုအဖွဲ့ကရရှိပြီး ကျပ်သိန်းလေးဆယ်စီ ပေးအပ်ခဲ့တာလို့ သိရပါတယ်။ 

ဒီဆုငွေတွေကို စစ်ကောင်စီခန့် ဝန်ကြီးချုပ် မောင်ကို၊ လုံခြုံရေးနှင့် နယ်စပ်ရေးရာဝန်ကြီး ‌ဗိုလ်မှူး ကျော်ကျော်မင်း၊ စစ်ကောင်စီခန့် မြို့တော်ဝန် ကျော်ဆန်းတို့က ပေးအပ်ခဲ့တာလို့ သိရပါတယ်။

အခုနှစ်မှာ ဧပြီလမှာ ကျရောက်မယ့် နှစ်ကူးသင်္ကြန်ပွဲကို မန္တလေးတိုင်း စစ်ကောင်စီက  ဦးဆောင်ကျင်းပဖို့ စီစဉ်နေတယ်လို့ စည်ပင်ပိုင် မန္တလေးနေ့စဉ် သတင်းစာကနေ မတ် ၁၅ ရက် ဒီနေ့ ဖော်ပြထားပါတယ်။

တန်ခူးလဆန်း ၁၃ ရက်နေ့မှာ ကျရောက်မယ့် နှစ်ကူးသင်္ကြန်ပွဲ ကျင်းပဖို့ ဗဟိုကော်မတီနဲ့ လုပ်ငန်းကော်မတီတွေ ဖွဲ့စည်းထားပြီးဖြစ်တယ်လို့လည်း သိရပါတယ်။

ပွဲကျင်းပရေး လုပ်ငန်းညှိနှိုင်းအစည်းအဝေးကိုလည်း မတ်လ ၁၄ ရက်နေ့က စည်ပင်ရုံးမှာ ပြုလုပ်ခဲ့ပြီး စစ်ကောင်စီခန့် တိုင်းဝန်ကြီးချုပ်နဲ့ အလယ်ပိုင်းတိုင်းစစ်ဌာနချုပ်မှ တိုင်းဦးစီးချုပ် ဗိုလ်မှူးချုပ် သူရိန်ထွန်း တို့လည်း တက်ရောက်ခဲ့တယ်လို့ သိရပါတယ်။

မန္တလေးသင်္ကြန်ပွဲကို ကိုဗစ်စည်းကမ်းတွေနဲ့အညီ ကျင်းပမယ်လို့လည်း သိရပါတယ်။

အန်အယ်လ်ဒီ အစိုးရလက်ထက်မှာတော့ ကိုဗစ်ကပ်ရောဂါကြောင့် ၂၀၂၀ ပြည့်နှစ်မှာ ကျရောက်တဲ့ သင်္ကြန်ပွဲတော်ကို ရပ်နားခဲ့ပြီး ပြည်သူအများစုကလည်း လိုက်နာကာ သင်္ကြန်ပွဲတော် ကျင်းပခြင်းမရှိခဲ့ပါဘူး။ ပြီးခဲ့တဲ့ ၂၀၂၁ ခုနှစ်မှာတော့ စစ်အာဏာသိမ်းမှုကြောင့် နှစ်သစ်ကူးပွဲတော်ကို ထပ်မံရပ်နားခဲ့တာ ဖြစ်ပါတယ်။

လက်ရှိအချိန်မှာလည်း ကိုဗစ်ကပ်ဘေးရော စစ်အာဏာသိမ်းမှုရော ဆက်ရှိနေတဲ့အပြင်  မန္တလေးမြို့ပေါ်မှာလည်း  စစ်ကောင်စီကို ဆန့်ကျင်တဲ့ ဆန္ဒပြပွဲတွေနဲ့ ၊ ဖောက်ခွဲတိုက်ခိုက်မှုတွေ မကြာခဏ ဖြစ်ပေါ်နေပါတယ်။