မက္ကဆီကို မူးယစ်ဂိုဏ်းခေါင်းဆောင် အိုဗစ်ဒီယို ဂုဇ်မန်းကို ဖမ်းဆီးမှုအတွင်း အသက်ဆုံးရှုံးခဲ့ရသူ အားလုံးအတွက် နှမြောတသ စိတ်မကောင်းဖြစ်ရကြောင်း မက္ကဆီကိုသမ္မတ အန်ဒရေးစ် မာနူယလ် လိုပက်ဇ် အိုဘရာဒေါက ဇန်နဝါရီ ၆ ရက်က ပြောကြားလိုက်ပါတယ်။ 

နိုင်ငံမြောက်ပိုင်း ဆီနာလိုအာပြည်နယ်မှာ ဂုဇ်မန်းကို ဖမ်းဆီးမှုအတွင်း သံသယရှိ ဂိုဏ်းဝင် ၁၉ ဦးနဲ့ စစ်ဘက်အရာရှိ ၁၀ ဦး သေဆုံးခဲ့ကြောင်း မက္ကဆီကိုအာဏာပိုင်တွေက ဇန်နဝါရီ ၆ ရက်မှာ ကြေညာခဲ့ပါတယ်။ 

တချိန်က ဂိုဏ်းဘုရင် အလ်ချာပို ဦးဆောင်ခဲ့တဲ့ အင်အားကြီး ဆီနာလိုအာကာတလ်ဂိုဏ်းကို ဖမ်းဆီးမှုကြောင့် လူဆိုးဂိုဏ်းဟာ ဆီနာလိုအာရဲ့ မြို့တော် ကူလီယာကန်အတွင်းနဲ့ အနီးဝန်းကျင်မှာ ရမ်းကားသောင်းကျန်းမှုတွေ၊ မော်တော်ယာဉ်တွေကို မီးရှို့ပြီး လမ်းတွေကိုပိတ်ဆို့ကာ လုံခြုံရေးတပ်ဖွဲ့ဝင်တွေကို တိုက်ခိုက်ခဲ့ကြတာပါ။ 

မက္ကဆီကို နိုင်ငံခြားရေးဝန်ကြီး မာဆဲလို အဘ်ရာ့ဒ်က တရားခံလွှဲပြောင်းရေး ဥပဒေအရ မက္ကဆီကို အစိုးရအနေနဲ့ လာမယ့် ၄ ပတ် သို့မဟုတ် ၆ ပတ်အတွင်း တရားခံကို သက်သေ အထောက်အထားနဲ့ သက်သေပြနိုင်ဖို့ မျှော်လင့်ကြောင်း ရှင်းပြပါတယ်။ 

ဂုဇ်မန်းကို တရားခံလွှဲပြောင်းပေးဖို့ အမေရိကန်က နှစ်ပေါင်းများစွာ ကြိုးပမ်းနေခဲ့တာပါ။ ဂုဇ်မန်း ကို ဖမ်းဆီးတာနဲ့ ပြစ်ဒဏ်ချမှတ်ခြင်းဆိုင်ရာ သတင်းအချက်အလက်တွေအတွက် ဆုကြေးဒေါ်လာ ၅ သန်းပေးမယ်လို့ အမေရိကန်နိုင်ငံခြားရေးဌာနက ၂၀၂၁ ခုနှစ်က ကြေညာထားပါတယ်။ 

"The Mouse"- ကြွက် လို့ နာမည်ပြောင်နဲ့ လူသိများတဲ့ ဂုဇ်မန်း ကို ကိုကင်း၊ စိတ်ကြွဆေးနဲ့ ဆေးခြောက်တို့ကို အမေရိကန်နိုင်ငံထဲ ပို့ဆောင်ဖို့ ပူးပေါင်းကြံစည်မှုနဲ့ အမေရိကန်မှာ တရားစွဲဆိုထားတာပါ။ 

ဂုဇ်မန်းဟာ တစ်လကို မူးယစ်ဆေးဝါး ပေါင် ၃၀၀၀ ကနေ ၅၀၀၀ အထိ ထုတ်လုပ် ထွက်ရှိဖို့ ဆီနာလိုအာရှိ စိတ်ကြွဆေး ဓာတ်ခွဲခန်းတွေကို ကြီးကြပ်တာဖြစ်ကြောင်း နိုင်ငံခြားရေးဌာနက ပြောပါတယ်။ 

ဒါ့အပြင် သူ့မင်္ဂလာဆောင်မှာ ဖျော်ဖြေဖို့ ငြင်းဆိုခဲ့တဲ့ နာမည်ကြီး မက္ကဆီကို အဆိုတော်တစ်ဦး အပါအဝင် လူသတ်မှု အများအပြားကို အမိန့်ပေးခဲ့တယ်လို့လည်း အမေရိကန်နိုင်ငံခြားရေးဌာနက ပြောပါတယ်။ 

ဘိန်းဖြူထက် အဆ ၅၀ အထိ အားကောင်းပြီး မော်ဖင်းထက် အဆ ၁၀၀ ပိုပြင်းတဲ့ opioid fentanyl ဓာတုဆေးဝါးတွေဟာ ဆေးအလွန်အကျွံသုံးစွဲမှုကြောင့် သေဆုံးမှု စံချိန်တင်နေတဲ့ အမေရိကန်ပြည်ထောင်စုထဲကို တဟုန်တိုး စီးဝင်နေတာကြောင့် အမေရိကန်က ဂုဇ်မန်းကို လက်ရဖမ်းဆီးချင်နေတာပါ။ 

အမေရိကန်အစိုးရဟာ မက္ကဆီကို မူးယစ်ဂိုဏ်းခေါင်းဆောင်ဟောင်း အက်ဒွါဒို အေရယ်လာနို ဖီးလစ်ခ်ကို မက္ကဆီကို အစိုးရဆီ သြဂုတ် ၂၃ ရက်က လွှဲပေးလိုက်ပါတယ်။

အမေရိကန်နိုင်ငံ၊ ပင်ဆယ်လ်ဗေးနီးယားပြည်နယ်၊ အယ်လန်တောင်းက ပြည်ထောင်စု ထောင်ထဲမှာ ထောင်ဒဏ်ကျခံအပြီး အုပ်စုဖွဲ့ ရာဇဝတ်မှု အပါအဝင် ရာဇဝတ်မှုဆိုင်ရာ စွဲချက်တွေကို ရင်ဆိုင်ဖို့ မက္ကဆီကိုနိုင်ငံဆီ လွှဲပေးလိုက်တာပါ။

မက္ကဆီကို စစ်တပ်နဲ့ ရှေ့နေချုပ်ရုံး FGR တို့က ဖီးလစ်ခ်ကို ဘရောင်းစ်ဗယ်လီနဲ့ မာတာမိုရော့စ် နယ်စပ်စခန်းမှာ လက်ခံယူခဲ့ပြီး လုံခြုံရေးအမြင့်ဆုံး အယ်လ်အော်တီပလာနိုထောင်ကို ပို့ခဲ့တယ်လို့ FGR က ကြေညာချက် ထုတ်ပြန်ပါတယ်။

အမေရိကန် အစိုးရက ဖီးလစ်ခ်ကို မူးယစ်ကုန်ကူးမှုနဲ့ ငွေဖြူ ခဝါချမှုတွေအတွက် ၂၀၀၃ ခုနှစ်မှာ စွဲချက်တင်ခဲ့ပြီး သူ့ကို ဖမ်းမိရင် အမေရိကန် ဒေါ်လာ ၅ သန်းပေးမယ်လို့ ဆုငွေထုတ်ခဲ့တာပါ။ 

သူ့ကို ၂၀၀၈ ခုနှစ်မှာ တီဟွာနာမြို့အတွင်း ပစ်ခတ်မှုအပြီး မက္ကဆီကို လုံခြုံရေးတပ်တွေက ဖမ်းခဲ့ပြီး ၂၀၁၂ မှာတော့ သူ့ကို အမေရိကန်နိုင်ငံဆီ လွှဲပေးခဲ့တာပါ။

နာမည်ဆိုးနဲ့ ကျော်ကြားတဲ့ မူးယစ်ဂိုဏ်းအတွက် ငွေကြေးခဝါချမှုနဲ့ အပြစ်ရှိကြောင်း သူက ဝန်ခံခဲ့ပါတယ်။

အဲဒီနောက် ၂၀၁၃ ခုနှစ်မှာ ကယ်လီဖိုးနီးယားပြည်နယ်မှာ သူ့ကို ထောင်ဒဏ် ၁၅ နှစ် ပြစ်ဒဏ် စီရင်ခဲ့ပါတယ်။ 

သြဇာရှိချိန်မှာ ဖီးလစ်ခ်ဟာ အမေရိကန်ဒေါ်လာ သန်းရာချီ တန်ဖိုးရှိတဲ့ မူးယစ်ဆေးတွေကို ကုန်ကူးခဲ့ပါတယ်။ တခြား အားကောင်းတဲ့ ရာဇဝတ်ဂိုဏ်းတွေနဲ့ မိတ်ဘက်ပြုအပြီးမှာ သူ့အဖွဲ့အစည်းဟာ ဆက်ပြီး လုပ်ငန်းလည်ပတ်နေခဲ့ပါတယ်။