အမေရိကန်နိုင်ငံ၊ မြောက်ကာရိုလိုင်းနားပြည်နယ်မှာ အခုသီတင်းပတ်ကုန်က လျှပ်စစ်ဓာတ်အားခွဲရုံနှစ်ခုကို သေနတ်ပစ်ခတ်တိုက်ခိုက်မှုကြောင့် ခရိုင်တစ်ခုလုံးနီးပါး မှောင်မည်းသွားခဲ့ရပြီး ဒါဟာ “ခြိမ်းခြောက်မှုအဆင့်သစ်” လို့ ပြည်နယ်အုပ်ချုပ်ရေးမှူး ရွိုင်းကူးပါးက ဒီဇင်ဘာ ၅ ရက်မှာ သတိပေး ပြောကြားလိုက်ပါတယ်။

မိုးရ်ကောင်တီရှိ စာသင်ကျောင်းတွေကို အင်္ဂါနေ့မှာလည်း ဒုတိယရက်အဖြစ် ပိတ်ထားဦးမှာဖြစ်ပြီး စနေနေ့က ပစ်ခတ်မှုအပြီး အေးခဲနေတဲ့ ညအပူချိန်တွေကြားမှာ အိမ်ထောင်စု ၃၈,၀၀၀ လျှပ်စစ်မီး ပြတ်တောက်နေဆဲ ဖြစ်ပါတယ်။

ပြီးခဲ့တဲ့ ရက်သတ္တပတ်အတွင်း ဖြစ်ပွားခဲ့တဲ့ မီးလောင်မှုကို စုံစမ်းစစ်ဆေးနေတဲ့ ပြုပြင်ထိန်းသိမ်းရေး လုပ်သားတွေဟာ ဂိတ်တံခါးတွေ ကျိုးပျက်နေပြီး သေနတ်ပစ်ခတ်မှုကြောင့် မိုးရ်ကောင်တီရှိ ဓာတ်အားခွဲရုံနှစ်ရုံက စက်ပစ္စည်းတွေ ပျက်စီးနေတဲ့ အထောက်အထားတွေကို တွေ့ရှိခဲ့ပါတယ်။

FBI နဲ့ အမေရိကန် စွမ်းအင်ဌာနတို့ အပါအဝင် ဖက်ဒရယ် အေဂျင်စီတွေဟာ ပစ်ခတ်မှုတွေကို ဒေသဆိုင်ရာနဲ့ ပြည်နယ်တရားဥပဒေစိုးမိုးရေး ဌာနတွေနဲ့အတူ စုံစမ်းစစ်ဆေးနေပါတယ်။

အခုချိန်အထိ ဘာအကြောင်းရင်းကိုမှ ထုတ်ဖော်ပြောကြားတာ၊ ဖမ်းဆီးအရေးယူတာ မရှိသေးကြောင်း သိရပါတယ်။

အာဏာပိုင်တွေက သေနတ်ပစ်ခတ်မှုကြောင့် ပျက်စီးသွားကြောင်းကိုသာ ထုတ်ပြောထားပြီး အတွင်းကျကျ စုံစမ်းစစ်ဆေးမှု အသေးစိတ်ကိုတော့ ထိန်းသိမ်းထားပါတယ်။

ဒါပေမဲ့ တနင်္လာနေ့မှာ မိုးရ်ကောင်တီ ရဲအရာရှိ ရွန်နီ ဖီးလ်စ်က တိုက်ခိုက်မှုကို ကြိုးကိုင်သူ ဘယ်သူဖြစ်ဖြစ် ဓာတ်အားခွဲရုံတွေကို ဘယ်လိုပျက်စီးအောင် လုပ်ဆောင်ရမယ်ဆိုတာကို သိရှိနေတယ်လို့ ပြောဆိုခဲ့ပါတယ်။

ပစ်ခတ်မှုအပြီး ဓာတ်အားပြတ်တောက်သွားသူ စုစုပေါင်း ၄၅,၀၀၀ ထဲက သုံးစွဲသူ ၇,၀၀၀ လောက်ကို တနင်္လာနေ့မွန်းလွဲပိုင်းမှာ လျှပ်စစ်ဓာတ်အား ပြန်ပေးနိုင်ခဲ့ကြောင်း ဒေသလျှပ်စစ်ဓာတ်အားပေးရေးဌာန Duke Energy DUK.N က ပြောပါတယ်။

မိုးရ်ကောင်တီမှာ လုပ်ငန်းလုပ်ဆောင်နေတဲ့ ကုမ္ပဏီ အားလုံးနီးပါး ဖြစ်တယ်လို့ ပြောရေးဆိုခွင့်ရှိသူ ဂျက်ဖ် ဘရွတ်ခ်စ်က တနင်္လာနေ့မှာပြုလုပ်တဲ့ သတင်းစာရှင်းလင်းပွဲမှာ ပြောပါတယ်။

ဓာတ်အားခွဲရုံနှစ်ခုရဲ့ ပျက်စီးမှုဟာ ကျယ်ပြန့်ပြီး ရှုပ်ထွေးတဲ့ အစိတ်အပိုင်းတွေနဲ့ ပြုပြင်မှုတွေ လိုအပ်နေတာကြောင့် သုံးစွဲသူအများစုအတွက် ဗုဒ္ဓဟူးနေ့ သို့မဟုတ် ကြာသပတေးနေ့အထိ လျှပ်စစ်မီး ပြတ်သွားနိုင်ဖွယ်ရှိနေကြောင်း ဘရွတ်ခ်စ်က ပြောပါတယ်။

အမေရိကန်နိုင်ငံ မြောက်ကာရိုလိုင်းနားပြည်နယ် ဝင်စတွန်ဆာလမ်ဒေသမှာ ပေါက်ကွဲစေတတ်တဲ့ အမိုးနီးယားနိုက်ထရိတ် တန်ချိန် ၆၀၀ လောက် သိုလှောင်ထားတဲ့ ဓာတ်မြေဩဇာစက်ရုံတရုံ မီးလောင်တာကြောင့် ဒေသခံ အယောက် ၆၅၀၀ လောက်ကို သူတို့အိမ်တွေကနေ ဘေးကင်းရာ ရွှေ့ပြောင်းခိုင်းခဲ့တယ်လို့ မြို့အရာရှိတွေက ဖေဖော်ဝါရီ ၁ ရက်မှာ ပြောပါတယ်။

ဝီဗ်ဓာတ်မြေဩဇာစက်ရုံမှာ ဇန်နဝါရီ ၃၁ ရက် ညနေကစပြီး မီးလောင်ခဲ့တာပါ။ စက်ရုံနဲ့ တမိုင်ပတ်လည်အကွာက ဒေသခံတွေကို ဘေးကင်းရာရွှေ့ဖို့နဲ့ သူတို့ အိမ်တွေကနေ ၄၈ နာရီ ကြာအောင် ဝေးဝေးနေဖို့ တိုက်တွန်းထားပါတယ်။

“မီးစလောင်ချိန်မှာ စက်ရုံထဲမှာ အမိုးနီးယံ နိုက်ထရိတ် တန်ချိန် ၅၀၀ နဲ့ ဓာတ်မြေဩဇာ တန်ချိန် ၅၀၀ ရှိနေတယ်။ နောက်ထပ် အမိုနီယံ နိုက်ထရိတ် တန်ချိ ၁၀၀ ကတော့ စက်ရုံနားက သံလမ်းပြေးကားတွဲ တစီးပေါ်မှာ ရှိနေတယ်” လို့ ဝင်စတွန် ဆာလမ် မီးသတ်ဌာန အကြီးအကဲက ဖေဖော်ဝါရီ ၂ ရက် သတင်းစာရှင်းလင်းပွဲမှာ ပြောပါတယ်။

တကယ်လို့ အပူချိန်ပြင်းပြင်းနဲ့ ထိတွေ့ရင် အမိုနီယံနိုက်ထရိတ်ဟာ ပေါက်ကွဲစေနိုင်ပြီး ထွက်လာတဲ့ အငွေ့တွေက ယားယံစေနိုင်တယ်လို့ မီးသတ်အရာရှိတွေက ပြောပါတယ်။

“ဘယ်လောက် အရေးကြီးတယ်ဆိုတာနဲ့ ဘယ်လောက် အသည်းအသန် အရေးတယူ ရှိသင့်တယ် ဆိုတာ လုံလောက်အောင် ကျနော်တို့ မပြောနိုင်ဘူး။ စက်ရုံပတ်လည် တမိုင်အတွင်းမှာ ရှိတဲ့သူတွေ ထွက်သွားဖို့လိုတယ်” လို့ အရာရှိက ပြောပါတယ်။

မီးလောင်ရတဲ့ အကြောင်းရင်းနဲ့ ဒဏ်ရာရသူ အခြေအနေကိုတော့ မသိရသေးပါဘူး။