မူဆယ် ၁၀၅ မိုင်နဲ့ ကျင်စန်းကျော့လမ်းမှာ စကျင်ကျောက်တွေတင်လာတဲ့ ကုန်ကား ဘရိတ်ပေါက်ပြီး အိမ်စီးကားနဲ့ ချိတ်မိကာ ချောက်ထဲပြုတ်ကျလို့ လူ ၆ ဦးသေဆုံးသွားတယ်လို့ မူဆယ်ခရိုင်မီးသတ်ဦးစီးဌာနနဲ့ ကုန်တင်ကားသမားတွေဆီက သိရပါတယ်။

ဧပြီ ၁၆ ရက် မနက် ၁၁ နာရီခွဲလောက်က ၁၀၅ မိုင် ကုန်သွယ်ရေးဇုန်ကနေ တရုတ်ဘက် တင်ပို့မယ့် စကျင်ကျောက်တင်ဆောင်လာတဲ့ ၂၂ ဘီးတွဲကား ဘရိတ်ပေါက်ပြီး အရှိန်မထိန်းနိုင်ဘဲ တဖက်ယာဉ်ကြောက  နစ်ဆန်းအိမ်စီးကားလေးပေါ်ပိမိကာ ချောက်ထဲချိတ်ပါသွားတာ ဖြစ်ပါတယ်။

အိမ်စီးကားပေါ်ပါလာတဲ့  မိန်းကလေး ၅ ယောက်၊ ယောက်ျားလေး ၁ ယောက် အားလုံးပေါင်း  ၆ ယောက်သေဆုံးသွားကာ တွဲကားသမားကတော့ ခြေထောက် နှစ်ဖက်ဒဏ်ရာ အနည်းငယ်ရတယ်လို့  မူဆယ်ခရိုင် မီးသတ်ရုံးတာဝန်ရှိသူတဦးက ပြောပါတယ်။

"ကားလေးက မူဆယ်ဘက်ကိုအလာ၊ တွဲကားက ကျင်စန်းကျော့ဘက်ကိုအသွား။ ကားကြီးက အဆင်းကို ဘရိတ်ပေါက်လာလို့ စီယာတိုင်ရော ကျသွားတယ်။ သူက မှေးပြီးတော့ပဲ ဆင်းနေတာပေါ့။ အဲဒါကားလေးတွေကို မကျော်ဖို့ပေါ့ လက်ပြတာကိုမှ ကားလေးက ကျော်လာတယ်လို့ပြောတယ်။ ကျန်တဲ့ သူ့ရှေ့က ကားတွေကတော့ ရပ်ပေးထားတယ်လို့ ပြောတယ်။ ကျော်လာတဲ့ အခါကျတော့ တွဲကားက အလယ်ကျသွားတာပေါ့။ အလယ်ကျတော့ သူပါ တွဲပါသွားတာပေါ့ ချောက်ထဲကို" လို့ မီးသတ်ရုံးတာဝန်ရှိသူက ထပ်မံ ရှင်းပြပါတယ်။ 

ဆယ်ခရိုင်မီးသတ်စခန်းက ရှာဖွေကယ်ဆယ်ရေးယာဉ်တွေနဲ့ လူမှုကူညီရေးအသင်းတွေ ပူးပေါင်း ကယ်ဆယ်ခဲ့ပြီး သေဆုံးသူတွေကို မူဆယ်မြို့ရှိ မြင့်မြတ်ပါရမီပရဟိတအသင်း၊  ပါရမီပရဟိတအသင်း၊ မောက်ကွမ်တိုင်းပရဟိတအသင်းနဲ့ လက်ဘက်ညွန့်ပရဟိတအသင်းတိုက လူနာတင်ယာဉ်တွေနဲ့ မူဆယ်ဆေးရုံသို့ ပို့ဆောင်ပေးခဲ့ပါတယ်။ 

Photo Crd# မူဆယ်ခရိုင် မီးသတ်

ရှမ်းပြည်တောင်ပိုင်း လွိုင်လင်ခရိုင် မိုင်းကိုင်မြို့နယ် ပန်ကေတုကျေးရွာနားမှာ ဒီကနေ့ မွန်းလွဲပိုင်းက စစ်ဘေးရှောင်ရွာသားတွေ စီးနင်းလိုက်ပါလာတဲ့ ကားတစ်စီး ယာဉ်မတော်တဆ ထိခိုက်မှု ဖြစ်ပွားခဲ့ပါတယ်။ 

မိုးတွေရွာပြီး လမ်းချော်တာကြောင့် သူတို့လိုက်ပါလာတဲ့ ကားတစ်စီးဟာ လမ်းဘေးကို ထိုးကျသွားတာဖြစ်ပြီး ကံအားလျော်စွာ ကြီးကြီးမားမားဒဏ်ရာရတာတော့မရှိဘူးလို့ သူတို့ကို သွားရောက်ကူညီနေတဲ့ သံဃံ‌ေဩာဝါဒခံ နာရေးကူညီမှုအသင်းမှ ကိုမင်းသူက ဒီဗွီဘီကို ပြောပါ တယ်။ 

“ပန်ကေတုရွာကနေ နည်းနည်းလေး ၅ မိနစ်လောက်မောင်းလိုက်ရင် အဲ့နားလေးမှာ ကုန်းတက်လေးရှိတယ်။  မိုးတွေကရွာ လမ်းကချော်ပြီး ကားက လမ်းဘေးကို တိမ်းမှောက်သွား တာခင်ဗျ၊  ထိခိုက်မိတာကတော့ ၃ ယောက်ပါ ၊ ဒါပေမယ့် လမ်းတော့လျှောက်လို့ရသေးတယ်၊ အရမ်းကြီးလည်းမဖြစ်တော့ ဒီရွာနားကဆေးခန်းမှာပဲ ကုလိုက်ပါတယ်။”

ဒါ့အပြင် နောက်ထပ် ပန်ပွဲရွာဘက်မှာလည်း ယာဉ်မတော်တဆထိခိုက်မှုရှိတယ်ဆိုလို့ လော လောဆယ် အဲဒီဘက်ကိုကူညီဖို့သွားနေကြောင်း၊ မရောက်သေးတဲ့အတွက် အကျိုးအကြောင်း မသိ ရသေးဘူးလို့ ဆိုပါတယ်။ 

မိုင်းကိုင်မြို့နယ် ဟိုခိုင်းကျေးရွာအုပ်စု နမ့်အွန်ရွာအနီးမှာ ပြီးခဲ့တဲ့ စက်တင်ဘာ ၁၄ ရက်နေ့ကစ ရှမ်းပြည်တပ်မတော် RCSS နဲ့ SSPP ပါတဲ့တပ်ပေါင်းစုတွေကြား တိုက်ပွဲဖြစ်ပြီး ဟိုခိုင်းအုပ်စုရှိ ရွာပေါင်း ၁၉ ရွာက ရွာသား ၂၀၀၀၀ ကျော်ဟာ မိုင်းကိုင်မြို့နယ် နောင်လျောဝ်၊ တုံလော၊ ပန်ကေတု၊ ဟမ်းငိုင်း၊ နောင်တောင်းစတဲ့ ကျေးရွာတွေဘက်မှာ စစ်ဘေးရှောင်နေကြတာပါ။ 

ယမန်နေ့ကတော့ တိုက်ပွဲဟာ စစ်ဘေးရှောင်တွေနားခိုရာ နောင်လျောဝ်ရွာနားနီးလာ တဲ့အတွက် နောင်လျောဝ်ရွာကနေနောက်ထပ်တစ်နေရာကို ထပ်ပြေးရပြန်ပါတယ်။ သူတို့တွေဟာ လမ်းခုလတ်ကနေ ဘယ်ရွာဘက်ပြေးရမလဲလို့ စဉ်းစားရခက်နေတုန်း နောင်လျောဝ်မှာ အခြေအနေ ပြန်ငြိမ်သွားပြီဆိုလို့ တချို့က နောက်ကြောင်းပြန်လှည့်ပေမယ့် တချို့က ဆက်ပြေးနေကြပါတယ်။

ပန်ကေတုရွာမှာတော့ ဘုန်းကြီးကျောင်းမှာရော စာသင်ကျောင်းတွေမှာ ရွာထဲမှာ စစ်ဘေး ရှောင်တွေပြည့်နေလို့ နောက်တနေရာတိမ်းရှောင်ဖို့ သွားရင်းနဲ့ လမ်းမှာ ခုလို ယာဉ်မတော်တ ဆဖြစ်ဟန်တူတယ်လို့ ကိုမင်းသူက ပြောသွားပါတယ်။