ရှန်ဟိုင်းမှာ ကိုဗစ်ရောဂါ ကုသဖို့အတွက် ဖွင့်လှစ်ထားတဲ့ ယာယီဆေးရုံ တဝက်လောက် ပြန်ပိတ်လိုက်ပြီလို့ အရာရှိတယောက်က မေ ၁၄ ရက်နေ့မှာ ပြောပါတယ်။ 

နေ့စဉ် ကိုဗစ် ရောဂါ ကူးစက်မှုနဲ့ ဆေးရုံတင်ရတဲ့ လူနာအရေအတွက်ကလည်း ကျဆင်းလာတာကြောင့် အခုလို ပြန်ပိတ်လိုက်တာလို့ ကူးစက်ရောဂါ ထိန်းချုပ်ရေးအဖွဲ့ အကြီးအကဲ ဒင်းဘိုက မေ ၁၄ ရက်နေ့ သတင်းစာရှင်းလင်းပွဲမှာ ပြောပါတယ်။ 

မေ ၁၃ ရက်နေ့က ဆေးရုံဆေးခန်းတွေကို လာတဲ့သူ ၅ သောင်းပဲ ရှိတော့လို့ ရောဂါကူးစက်မှုနှုန်း အမြင့်ဆုံးဖြစ်ခဲ့တဲ့ ရက်နဲ့ နှိုင်းယှဉ်ရင် ၂၀ ရာခိုင်နှုန်းလောက်ပဲ ရှိတော့တယ်လို့ ဆိုပါတယ်။ 

ဒါကြောင့် မေ ၁၃ ရက်နေ့ မြူနီစပယ်အဆင့် ယာယီဆေးရု‌ေငါးရုံကို ပိတ်လိုက်ပြီဖြစ်သလို မြို့နယ်အဆင့်မှာ ကုသရေး စင်တာပေါင်း ၆၈ ခုကို ပိတ်လိုက်ပြီလို့ ပြောပါတယ်။ 

တရုတ်နိုင်ငံရဲ့ စီးပွားရေးနဲ့ ဘဏ္ဍာရေး မြို့တော်ရှန်ဟိုင်းမှာ ကိုဗစ်ရောဂါ ကူးစက်မှုကြောင့် ပြည်သူတွေကို အိမ်အပြင်မထွက်ဖို့ စည်းကမ်းသတ်မှတ်ပြီး၊ ရောဂါကူးစက်မှုကို လုံး၀ ကင်းစင်အောင်လုပ်နိုင်ဖို့ အာဏာပိုင်တွေက စီမံချက်နဲ့ ဆောင်ရွက်နေတာပါ။ 

အာဏာပိုင်တွေက ရောဂါစစ်ဆေးမှုတွေကို လွယ်ကူအောင် စီစဉ်ဆောင်ရွက်ပေးထားပေမယ့် နေ့စဉ် ကူးစက်မှုတွေကတော့ ဒီရက်ပိုင်းအထိ ၁ ထောင်ဝန်းကျင်မှာ ဆက်ရှိနေပါတယ်။

ထိုင်းနိုင်ငံမြို့တော် ဘန်ကောက်က သုဝဏ္ဏဘူမိ နိုင်ငံတကာလေဆိပ်ကို ကုတင် ၅၀၀၀ ဆံ့ ယာယီဆေးရုံအဖြစ် ပြင်ဆင်ပြီး သြဂုတ်လကစလို့ လူနာတွေကို လက်ခံကုသပေးဖို့ မျှော်လင့်ထားတယ်လို့ ထိုင်း PBS သတင်းဌာနက ဇူလိုင် ၇ ရက်မှာ ဖော်ပြပါတယ်။

 နိုင်ငံတွင်း ကိုဗစ်-၁၉ ကပ်ရောဂါ ကူးစက်ခံဦးရေ ဆက်ပြီး တိုးလာနေလို့ လက်ရှိ ဆေးရုံကုတင်တွေ ပြတ်လပ်နေတာကို ဖြေရှင်းနိုင်ရေး ယာယီဆေးရုံသစ်ကို တည်ဆောက်ခဲ့တာလို့ သယ်ယူပို့ဆောင်ရေးဝန်ကြီး ဆက်ဆာယမ် ချစ်ဒ်ချုပ်ဘ်က ပြောပါတယ်။

 ပြည်သူ့ကျန်းမာရေးဝန်ကြီးဌာနရဲ့ ညွှန်ကြားချက်အရ သယ်ယူပို့ဆောင်ရေး ဝန်ကြီးဌာနက လေဆိပ်အဆောင် ၁ ရဲ့ စတုရန်းမီတာ ၁ သိန်း ကျယ်တဲ့နေရာမှာ ယာယီဆေးရုံကို တည်ဆောက်ခဲ့တာပါ။ 

ဒုတိယထပ်ကိုတော့ ဆရာဝန်တွေ နားနေခန်းနဲ့ အထူးကြပ်မတ် ကုသဆောင်အတွက် သုံးမှာဖြစ်ပြီး တတိယနဲ့ စတုတ္ထအထပ်တွေကိုတော့ ရောဂါနုတဲ့၊ ရောဂါလက္ခဏာ မပြတဲ့ လူနာ တွေအတွက် သုံးမယ်လို့ ထိုင်း PBS က ပြောပါတယ်။

 မောင်ထောင်ဌာနီ မြို့နယ်က အင်းပက် ကုန်စည်ပြပွဲ ခန်းမကို ငှားထားတာ လာမယ့်လမှာ အချိန်စေ့တော့မယ့် အချိန်မှာ လေဆိပ်က ယာယီဆေးရုံသစ်ကို အချိန်မီ ဖွင့်လှစ်မှာလို့လည်း ဆိုပါတယ်။

 လေဆိပ်က ယာယီဆေးရုံအသစ်ဟာ လူနာ ၃ ဆ ပိုပြီး လက်ခံနိုင်စွမ်း ရှိတယ်လို့ သယ်ယူပို့ဆောင်ရေးဝန်ကြီးက ပြောခဲ့ပါတယ်။