အင်္ဂလန်အသင်းကို ရှုံးနိမ့်ခဲ့တဲ့ ရှုံးထွက်ပွဲစဉ်မှာ ကစားသမားတချို့ အတွေ့အကြုံအားနည်းတာကြောင့် အမှားတချို့လုပ်ဆောင်ခဲ့တယ်လို့ ဂျာမနီနည်းပြ ဂျိုအာချင်လိုးက ပြောပါတယ်။
ဂျာမနီအသင်းဟာ အင်္ဂလန်ကို ၂ ဂိုး ဂိုးမရှိနဲ့ ရှုံးနိမ့်ခဲ့တာကြောင့် ယူရိုပြိုင်ပွဲကနေ ထွက်ခွာခဲ့ရပါတယ်။
အင်္ဂလန်နဲ့ ပွဲမှာ ကစားသမားတွေဘက်က အစွမ်းကုန် ပေးဆပ်ကစားခဲ့ပေမယ့်လည်း နေရာတချို့မှာ အတွေ့ အကြုံ အားနည်းမှုတွေရှိခဲ့တယ်လို့ နည်းပြ ဂျိုအာချင်လိုးက ပြောပါတယ်။
”ရှုံးထွက်အဆင့်မှာ အမှားတစ်ခုချင်းစီက အဆုံးအဖြတ် ဖြစ်စေပါတယ်။ နေရာတချို့မှာ အတွေ့အကြုံအားနည်းချက်တချို့လည်း ရှိပါတယ်။ ဒီလိုအချက်တွေက ပြစ်ဒဏ်ပေးခံရပြီး ပြိုင်ပွဲကနေ ထွက်ခဲ့ရတာပါပဲ။
လွန်ခဲ့တဲ့ ၁၅ နှစ်ကို ပြန်ကြည့်ရင် အပေါင်းလက္ခာဏာဆောင်တာတွေ အများကြီးပါ။ ၂၀၁၄ ခုနှစ်က ကမ္ဘာ့ချန်ပီယံဖြစ်ခဲ့တယ်။ ကွန်ဖက်ဒရေးရှင်းဖလားကို လူငယ်သွေးသစ်တွေနဲ့ရတယ်။ ၂၀၁၈ ခုနှစ်ကစပြီး ပြဿနာတချို့ရှိခဲ့ပြီး ဒါတွေကို မေ့ပျောက်ဖို့ အချိန်တချို့လိုအပ်ပါသေးတယ်” လို့ နည်းပြဂျိုအာချင်လိုးက ပြောပါတယ်။
ဂျိုအာချင်လိုးဟာ ၂၀၀၆ ခုနှစ်ကတည်းက ဂျာမနီအသင်းကို စတင်ကိုင်တွယ်ခဲ့ပြီး အခုပြိုင်ပွဲအပြီးမှာ အသင်းနဲ့လမ်းခွဲမှာဖြစ်ပါတယ်။
ဂျာမနီနဲ့ ၁၆ သင်းအဆင့်ရှုံးထွက်ပွဲစဉ်ကို ဖိအားကင်းကင်းနဲ့ ကစားကြဖို့ အင်္ဂလန်တိုက်စစ်မှူး ဟာရီကိန်းက တိုက်တွန်းလိုက်ပါတယ်။
အင်္ဂလန်အသင်းဟာ ဒီကနေ့ည ၁၀နာရီခွဲမှာ ဂျာမနီနဲ့ အိမ်ကွင်းဝင်ဘလေမှာ ယှဉ်ပြိုင်သွားရမှာပါ။
"အသင်းဖော်တွေကို ပြောချင်တာက ဖိအားကင်းကင်းနဲ့ လွတ်လပ်ပျော်ရွှင်စွာကစားကြဖို့ပါပဲ။ ကျနော်တို့အားလုံး အနိုင်ရချင်ကြပါတယ်။ ဒီလိုအနိုင်ရဖို့က ကျနော့်ရဲ့ ခြေစွမ်းအပေါ် တိုက်ရိုက် တည်မီနေတယ်။ ကျနော်တို့မှာ နိုင်ငံတကာနဲ့ ကလပ် အသင်းအဆင့် အတွေ့အကြုံကောင်းတွေလည်းရှိတယ်။ ဂျာမနီက တောင့်တင်းပြီး ကစားသမားတွေကလည်း နာမည်ကြီးတွေပါ။ ကျနော်တို့အနေနဲ့ ဒီပြိုင်ပွဲရဲ့ ရှုံးထွက် အဆင့်ရောက်ရင် နှစ်ပေါင်း ၅၀ အတွင်း တစ်ပွဲပဲ အနိုင်ရဖူးပါတယ်။ သမိုင်းသစ်ရေးထိုးဖို့အတွက် အချိန်ကောင်းပါပဲ" လို့ ဟာရီကိန်းက ပြောကြားပါတယ်။
အင်္ဂလန်နဲ့ပွဲမှာ ဂျာမနီဘက်က ဂွမ်ဒိုဂမ်၊ ရူဒီဂါနဲ့ ဂိုင်ဆန်တို့ လွဲချော်မယ်လို့သိရပါတယ်။
