ဘရိုက်တန်အသင်းကို အရှက်ရစရာရှုံးနိမ့်ခဲ့မှုအတွက် အသင်းပရိသတ်တွေအား တောင်းပန်ကြောင်း နည်းပြ ရင်းနစ်ခ်က ပြောပါတယ်။ 

မန်ယူအသင်းဟာ ဘရိုက်တန်အသင်းကို ၄ ဂိုး ဂိုးမရှိနဲ့ရူံးနိမ့်ခဲ့ပြီး ခြေစွမ်းပြသနိုင်ခြင်း လည်းမရှိတဲ့အပေါ် အရှက်ရစရာဖြစ်ခဲ့ပြီး ပရိသတ်တွေကို တောင်းပန်ရုံသာရှိတယ်လို့ နည်းပြ ရင်းနစ်ခ်က ပြောခဲ့တာပါ။

“မှန်ပါတယ်။ ပထမဆုံးမိနစ်ကနေ နောက်ဆုံမိနစ်အထိ ခြေစွမ်းဆိုးရွားခဲ့ပါတယ်။ နေရာတိုင်းမှာ လုံလောက်မှုမရှိခဲ့ပါဘူး။ အလွန်ဆိုးရွားတဲ့စွမ်းဆောင်ရည်ဖြစ်ခဲ့ပြီး အရှက်စရာရှုံးနိမ့်မှုဖြစ်ခဲ့တယ်” လို့ ပွဲအပြီးမှာ နည်းပြရင်းနစ်ခ်က ပြောပါတယ်။ 

ယူနိုက်တက်အသင်းဟာ လက်ကျန်တပွဲသာကျန်ရှိတော့ချိန်မှာ ရမှတ် ၅၈ မှတ်သာရရှိထားပြီး ၆၄ မှတ်ရခဲ့တဲ့ ၂၀၁၃-၂၀၁၄ ဘောလုံး ရာသီ နောက်ပိုင်းမှာ ရမှတ်အနည်းဆုံးရာသီအဖြစ် မှတ်တမ်းဝင်ခဲ့ပါတယ်။ 

ဒါ့အပြင် ပေးဂိုး ၅၆ ဂိုးအထိ ပေးထားရတာကြောင့် ၆၃ ဂိုးပေးခဲ့ရတဲ့ ၁၉၇၈-၁၉၇၉ ဘောလုံးရာသီနောက်ပိုင်း ပေးဂိုး အများဆုံးရာသီအဖြစ် မှတ်တမ်းဝင်သွားခဲ့ပါတယ်။ 

ဒါ့အပြင် အဝေးကွင်း ၅ ပွဲဆက်တိုက်ရှုံးနိမ့်ခဲ့တာကြောင့် ၆ ပွဲဆက်ရူံးခဲ့တဲ့ ၁၉၈၁ ခုနှစ် နောက်ပိုင်း နှစ်ပေါင်း ၄ဝ ကျော်အတွင်း ပထမဆုံးအကြိမ် အဝေးကွင်းပွဲဆက်အများဆုံး ရှုံးနိမ့်ခဲ့ရပါတယ်။

နောက်ခံလူ မက်ဂွိုင်းယားဟာ စနေနေ့ ကစားမယ့် ဘရိုက်တန်နဲ့ပွဲမှာ ပြန်လည်ပါဝင်လာမယ်လို့ နည်းပြ ရင်းနစ်ခ်က ပြောပါတယ်။ 

မက်ဂွိုင်းယားဟာ ပြီးခဲ့တဲ့ ဧပြီ ၂ဝ ရက်က လီဗာပူးကို ရှုံးနိမ့်ခဲ့တဲ့ပွဲစဉ်မှာ ဒဏ်ရာရခဲ့တာကြောင့် အသင်းရဲ့နောက်ဆုံး ၃ ပွဲဆက်တိုက်လွဲချော်ခဲ့ပါတယ်။ 

မူလက ရာသီကုန်အထိ အနားယူရမယ်လို့ ခန့်မှန်းခဲ့ကြပေမယ့် လက်ရှိအချိန်မှာတော့ လေ့ကျင့်ခန်း အပြည့်အဝ ပြန်ဆင်းနိုင်ခဲ့တာကြောင့် ဘရိုက်တန်နဲ့ပွဲစဉ်မှာ ပြန်လည်ပါဝင်မယ်လို့ နည်းပြရင်းနစ်ခ်က အတည်ပြုခဲ့တာပါ။

“ဟာရီက လေ့ကျင့်ခန်းပြန်ဆင်းနေပြီ။ ဘရန့်ဖို့ဒ်နဲ့ပွဲအပြီး ဒုတိယမြောက်နေ့ကတည်းက တပတ်လုံး လေ့ကျင့်ခန်းဆင်းခဲ့ပါတယ်။ ဒါကြောင့် အသင်းလူစာရင်းမှာ သူပါဝင်ပါမယ်။ ပွဲထွက်ကစားခွင့်ရမလားဆိုတာကတော့ ဒီကနေ့လေ့ကျင့်ရေးအပြီးမှပဲ ဆုံးဖြတ်ရမှာပါ။ ပြိုင်ဘက် အသင်းကို ဘယ်လူစာရင်း နဲ့ ပွဲထွက်မယ်ဆိုတာ မပြောချင်ပါဘူး” လို့ နည်းပြရင်းနစ်ခ်က ပြောပါ တယ်။ 

တိုက်စစ်ပိုင်းမှာ ကာဗာနီ ကြံ့ခိုင်မှုပြည့်ဝေနေပြီဖြစ်ပေမယ့် ရက်ရှ်ဖို့ဒ်ကတော့ ကိုယ်ပူပြီး ချောင်းဆိုးနေတာကြောင့် အနားယူရဦးမယ်လို့ နည်းပြရင်းနစ်ခ်က ပြောသွားပါတယ်။