အာဂျင်တီးနားတရားရုံးဟာ ဖေဖော်ဝါရီ ၆ ရက်က ဆယ်ကျော်သက် ဖှာနန်ဒို ဘဲ့ဇ်ဆိုဆာကို သတ်ဖြတ်ခဲ့တဲ့ နာမည်ကြီးလူသတ်မှုမှာ ပါဝင်ပတ်သက်နေတဲ့ ရပ်ဂ်ဘီကစားသမား ၅ ဦးကို ထောင်ဒဏ်တသက်တကျွန်း ချမှတ်လိုက်ပြီး တခြား ၃ ဦးကို ထောင်ဒဏ် ၁၅ နှစ် ချမှတ်ခဲ့ပါတယ်။
မှုခင်းဖြစ်ပွားပြီးနောက် ၃ နှစ်နဲ့ ၁၇ ရက်အကြာမှာ ရုံးတင်စစ်ဆေးမှု ပြီးဆုံးခဲ့တာဖြစ်ပြီး အဓိကတရားခံတွေကို တသက်တကျွန်း စီရင်ချက်ချခဲ့ပြီးတော့ ဒီအမှုထဲက တဆင့်ခံ ကျူးလွန်ရာမှာ ပါဝင်သူတွေကို ထောင်ဒဏ် ၁၅ နှစ် ချမှတ်လိုက်တာပါ။
၂၀၂၀ ခုနှစ်က အသက် ၁၉ နှစ်အရွယ် ဖှာနန်ဒို ဘဲ့ဇ်ဆိုဆာကို သတ်ဖြတ်မှုဟာ တောင်အမေရိကနိုင်ငံကို တုန်လှုပ်သွားစေခဲ့ပါတယ်။
ဗြူနိုအေရီးစ်ပြည်နယ်ရှိ ဗီလာဂေဆဲလ် ကမ်းရိုးတန်း အပန်းဖြေစခန်းမှာ ဆိုဆာဟာ ရပ်ဂ်ဘီကစားသမားတွေနဲ့ စကားများ ရန်ဖြစ်နေချိန်အတွင်း ရိုက်နှက်ခံခဲ့ရပါတယ်။
အဲဒီအချိန် ဒဏ်ရာအပြင်းအထန်နဲ့ မြေကြီးပေါ်မှာ လဲကျနေတာတောင်မှ သူ့ကို ရန်လိုသူတွေဟာ ဝိုင်းဖွဲ့တိုက်ခိုက်ခဲ့ကြတဲ့အတွက် ဘဲ့ဇ်ဆိုဆာဟာ ၂၀၂၀ ခုနှစ် ဇန်နဝါရီ ၁၈ ရက်မှာ ဦးနှောက်ဒဏ်ရာနဲ့ ဆေးရုံမှာ သေဆုံးခဲ့တာ ဖြစ်ပါတယ်။
သြစတြေးလျလက်ရွေးစင် ရပ်ဂ်ဘီအသင်းကစားသမား ကာ့တ်လေဘီးလ်ကို ရဲတပ်ဖွဲ့က လိင်ပိုင်းဆိုင်ရာ စော်ကားမှု စွဲချက် ၃ ခုနဲ့ တရားစွဲခဲ့ပြီးနောက်မှာ ဇန်နဝါရီလ ၂၁ ရက်မှာ အာမခံ ရရှိခဲ့ပါတယ်။
၂၀၂၂ ခုနှစ်၊ ဒီဇင်ဘာလက ဘွန်ဒီကမ်းခြေရဲ့ ဆင်ခြေဖုံးရပ်ကွက်ရှိ ဘားတစ်ခုမှာ အမျိုးသမီး တဦးအပေါ် လိင်ပိုင်းဆိုင်ရာစော်ကားမှုနဲ့ ပတ်သက်ပြီး စုံစမ်းစစ်ဆေးဖို့ အသက် ၃၄ နှစ်အရွယ် ရပ်ဂ်ဘီ ကစားသမားကို ဇန်နဝါရီလ ၂၀ ရက်က ဖမ်းဆီးခဲ့တာလို့ ရဲတပ်ဖွဲ့က ပြောပါတယ်။
ဒီဖြစ်ရပ်ကြောင့် ချက်ချင်းအကျိုးသက်ရောက်မှုအဖြစ် ဇန်နဝါရီ ၂၀ မှာ ဘီးလ်ကို ရက်ဘီပြိုင်ပွဲ အားလုံးကနေ ရပ်ဆိုင်းလိုက်ပါတယ်။
"ရပ်ဂ်ဘီ သြစတြေးလျ အသင်းအနေနဲ့ ဥပဒေကြောင်းအရ တရားစွဲဆိုချက်တွေ အပြီးသတ်ဖို့ စောင့်ဆိုင်းနေရချိန်အတွင်း ကာ့တ်လေ ဘီးလ်ကို ရက်ဘီပြိုင်ပွဲ ပုံစံအားလုံးကနေ ဆိုင်းငံ့ထား တယ်" လို့ ရက်ဘီအားကစားအုပ်ချုပ်ရေးအဖွဲ့ရဲ့ ထုတ်ပြန်ချက်ထဲမှာ ဖော်ပြထားပါတယ်။
ဒီအမှုကို မတ် ၂၂ ရက်အထိ ရွှေ့ဆိုင်းထားပါတယ်။
