ယူကရိန်းနိုင်ငံမြို့တော် ကိယက်ဗ်အရှေ့ဘက် ဆင်ခြေဖုံးရှိ မူလတန်းကျောင်းအနီးမှာ ရဟတ်ယာဉ်တစင်း ပျက်ကျပြီးနောက် ယူကရိန်းပြည်ထဲရေးဝန်ကြီး အပါအဝင် လူ ၁၆ ဦး သေဆုံးခဲ့ပါတယ်။

သေဆုံးသူတွေထဲမှာ ကလေးငယ်နှစ်ယောက်ပါဝင်ပြီး နောက်ထပ် ၁၀ ယောက်ကိုလည်း ဆေးရုံမှာ ကုသပေးနေပါတယ်။ ရဟတ်ယာဉ်ပေါ်မှာ ယူကရိန်းပြည်ထဲရေးဝန်ကြီး ဒဲနစ်စ် မိုနာစတရ်စကီဟာ တခြားသူ ၈ ဦးနဲ့အတူ လိုက်ပါလာတာပါ။

ရဟတ်ယာဉ်ဟာ ဘရိုဗားရီမြို့ရဲ့ ဆင်ခြေဖုံးမှာ ဆင်းသက်ချိန် ပျက်ကျခဲ့တာဖြစ်ပြီး သူ့ရဲ့ ပထမလက်ထောက်ဝန်ကြီးနဲ့ ပြည်နယ်အတွင်းရေးမှူးတို့လည်း ကွယ်လွန်သွားကြောင်း တာဝန်ရှိသူတွေက ပြောပါတယ်။

ယူကရိန်းနိုင်ငံတော် အရေးပေါ်ဝန်ဆောင်မှုဌာနက ပိုင်ဆိုင်တဲ့ အဆိုပါ ရဟတ်ယာဉ် ပျက်ကျခဲ့ပြီးနောက် သူငယ်တန်းကျောင်းအနီး မီးလောင်မှုဖြစ်ပွားခဲ့လို့ ကလေးတွေနဲ့ ဝန်ထမ်းတွေကို အဆောက်အအုံကနေ ရွှေ့ပြောင်းပေးခဲ့ပါတယ်။

မီးလောင်နေတဲ့ အဆောက်အအုံအပြင်ဘက်မှာ ရဟတ်ယာဉ်က အပျက်အစီးတွေကို တွေ့မြင်ရပါတယ်။ ရဟတ်ယာဉ်ပျက်ကျချိန်မှာ မြူတွေမှိုင်းပြီး ထူထပ်နေလို့ ပတ်ဝန်းကျင်က မှောင်မည်းနေတယ်လို့ ဆိုပါတယ်။

အစောပိုင်းသတင်းတွေအရ ရဟတ်ယာဉ်ဟာ မူလတန်းကျောင်းကို တိုက်မိပြီးတော့ လူနေအဆောက်အအုံတခုနဲ့ အနီးကပ်မှာ ပျက်ကျခဲ့ကြောင်း သိရပါတယ်။

ကလေး ၁၀ ဦး အပါအဝင် လူ ၂၂ ဦးကို ဆေးရုံပို့ဆောင်ထားကြောင်း ရဲချုပ် ကလီမန်ကိုက ပြောပါတယ်။

အီတလီနိုင်ငံတက်စ်ကာနီနဲ့ အီမီလီယာ ရိုမဂ္ဂနာ ဒေသ နယ်စပ်က တောင်ထူတဲ့ ဒေသမှာ ရဟတ်ယာဉ်တစီး ပျက်ကျအပြီး လူငါးဦး သေဆုံးတယ်လို့ ဒေသန္တရ အုပ်ချုပ်ရေးမှူးက ဇွန် ၁၁ ရက်မှာ ပြောပါတယ်။

ရဟတ်ယာဉ်ဟာ ရေဒါကနေ ပျောက်သွားပြီးတဲ့နောက် ဇွန် ၁၁ ရက်မှာ အလောင်းငါးလောင်း ရှာတွေ့ခဲ့တာလို့ တက်စ်ကာနီ ဒေသန္တရ အုပ်ချုပ်ရေးမှူး ယူဂျီနီယွန် ဂီယာနီက သူ့ရဲ့ ဖေ့စ်ဘွတ်ခ် လူမှုကွန်ရက်ပေါ်မှာ ရေးခဲ့တာပါ။

“ခရီးသည် ၂ယောက် ပျောက်ဆုံးနေပါတယ်၊ ရဟတ်ယာဉ်ဟာ တက်စ်ကာနီ ဒေသ လက္ကာမြို့ကနေ ဇွန် ၉ ရက်က  ပျံတက်ခဲ့ပြီး နိုင်ငံမြောက်ပိုင်း ထရီဗစ်ဆိုမြို့ဆီ ဦးတည် ပျံသန်းခဲ့တာပါ။ လမ်းမှာ တောတောင် ထူထပ်တဲ့ ဒေသအတွင်း ဆိုးရွားတဲ့ ရာသီဥတုကို ရင်ဆိုင်ရအပြိး ရေဒါကနေ ပျောက်သွားခဲ့ပါတယ်။ ရဟတ်ယာဉ်ပေါ်မှာ တူရကီ စီးပွားရေးသမား လေးယောက် အပါအဝင် လူ ၇ ယောက် လိုက်ပါလာခဲ့တာပါ။ သူတို့ဟာ တူရကီ စက်မှုလုပ်ငန်းစု အိက်စ်ဇာဂျီဘာစီရဲ့ လုပ်ငန်းခွဲ လူသုံးကုန်ပစ္စည်းဌာနက စီးပွားရေးသမားတွေဖြစ်ပြီး အီတလီမှာ စက္ကူနည်းပညာပြပွဲကို လာတက်သူတွေ” လို့ ကုမ္ပဏီက ကြေညာချက် ထုတ်ပြန်ထားပါတယ်။

ပျောက်ဆုံး ခရီးသည် ၂ ယောက်ကတော့ လက်ဘနွန်နိုင်ငံသားတွေလို့ လက်ဘနွန် အစိုးရ သတင်းဌာန NNA က ဖော်ပြပါတယ်။