ပြည်သူတွေသဘာဝဘေးအန္တရာယ်ကြုံတဲ့အခါ ကူညီကယ်ဆယ်ပေးနိုင်ဖို့ ရဟတ်ယာဉ်၀ယ်ယူမှုနဲ့ နိုင်ငံတော်သမ္မတဦး၀င်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့အပေါ် စစ်ကောင်စီက တရားစွဲထားတဲ့အမှုကို ဧပြီ ၁၉ ရက် ဒီနေ့ ဆက်လက်ရုံးထုတ် စစ်ဆေးခဲ့တယ်လို့ တရားရုံးနဲ့ နီးစပ်တဲ့ အသိုက်အဝိုင်းကနေ သိရပါတယ်။
မနေ့ ရုံးချိန်းမှာ တရားလို ဦးအောင်ခန့်ကို ဆက်လက်စစ်ဆေးတာမှာ တရားလိုဘက်ကတင်ပြတဲ့ စာရွက်စာတမ်းနဲ့ပတ်သက်လို့ အငြင်းပွားတာတွေဖြစ်ခဲ့ပြီး ဘယ်လို အငြင်းပွားမှုတွေဖြစ်တယ်ဆိုတာတော့ အသေးစိတ်မသိရှိရဘူးလို့ တရားရုံးနဲ့နီးစပ်သူက ပြောပါတယ်။
၂၀၂၁ ခုနှစ်က သဘာဝဘေးအန္တရာယ်ကာကွယ်ရေးလုပ်ငန်းတွေမှာ အသုံးပြုဖို့ ရဟတ်ယာဉ် ဝယ်ယူ၊ ငှားရမ်း၊ သက်တမ်းတိုး၊ ပြုပြင်ထိန်းသိမ်းတာတွေနဲ့ ပတ်သက်ပြီး နိုင်ငံတော်သမ္မတဦး၀င်းမြင့်၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ လူကယ်ပြန်ဝန်ကြီး ဒေါက်တာ ဝင်းမြတ်အေးတို့ကို စစ်ကောင်စီက အဂတိလိုက်စားမှု တိုက်ဖျက်ရေး ဥပဒေပုဒ်မ ၅၅ နဲ့ တရားစွဲဆိုတားတာဖြစ်ပါတယ်။
ဒီရဟတ်ယာဉ်အမှုနဲ့ဆက်နွှယ်တဲ့ တခြားအမှုတွေကိုလည်း ဒီနေ့မှာ ဆက်လက်စစ်ဆေးခဲ့ပြီး ရုံးချိန်းကို ဧပြီ ၂၆ ရက်နေ့ကို ပြန်လည်ချိန်းဆိုထားပါတယ်။
ဒီနေ့ရုံးချိန်းကို လာရောက်တဲ့ နိုင်ငံတော်သမ္မတဦး၀င်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်တို့ ကျန်းမာရေးကောင်းမွန်တယ်လို့ တရားရုံးနဲ့ နီးစပ်သူက ဆိုပါတယ်။
နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အပေါ် စစ်ကောင်စီက စွဲဆိုထားတဲ့အမှုတွေထဲက ငါးမှုအတွက် ထောင်ဒဏ် ၆ နှစ် ချမှတ်ချပြီးလည်း ဖြစ်ပါတယ်။
ပြည်သူတွေအတွက် သဘာဝဘေးကယ်ဆယ်ရေး ရဟတ်ယာဉ်ဝယ်ယူခဲ့တာနဲ့ ပတ်သက်ပြီး သမ္မတဦး၀င်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ အပေါ် စစ်ကောင်စီက စွဲဆိုထားတဲ့ အဂတိအမှု ၅ မှုကို မတ်လ ၁ ရက် ဒီကနေ့ နေပြည်တော်တရားရုံးမှာ ရုံးထုတ်စစ်ဆေးခဲ့တယ်လို့ တရားရုံးနဲ့ နီးစပ်တဲ့အသိုင်းအဝိုင်းကနေ သိရပါတယ်။
ဒီနေ့ရုံးချိန်းမှာ တရားလိုဖြစ်တဲ့ စစ်ကောင်စီ အဂတိလိုက်စားမှုတိုက်ဖျက်ရေးကော်မရှင်အဖွဲ့ဝင် ဦးအောင်ခန့်ကို အမှု ၅ မှုလုံးအတွက် ဆက်လက်စစ်ဆေးခဲ့ပြီး နောက်ရုံးချိန်းမှာ အပြန်လှန်စစ်မေးမယ်လို့ သိရပါတယ်။
ဒါအပြင် ပြီးခဲ့တဲ့ရုံးချိန်းမှာ တရားလိုဘက်က သက်သေခံထပ်မံတင်သွင်းထားတာကို ဒီနေ့ရုံးချိန်းမှာ တရားရုံးက လက်ခံကြောင်း အမိန့်ချလိုက်တယ်လို့လည်း တရားရုံးနဲ့နီးစပ်သူတစ်ဦးက ပြောပါတယ်။
စစ်ကောင်စီက နိုင်ငံတော်သမ္မတ ဦး၀င်းမြင့်၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ လူကယ်ပြန်ဌာန ပြည်ထောင်စု၀န်ကြီး ဒေါက်တာ၀င်းမြတ်အေးတို့ကို ၂၀၂၁ ခုနှစ်အတွင်းမှာ သဘာဝဘေးအန္တရာယ် ကာကွယ်ရေး လုပ်ငန်းတွေ ဆောင်ရွက်တာမှာအသုံးပြုဖို့ ရဟတ်ယာဉ်တစ်စီး ဝယ်ယူ၊ ငှားရမ်းတာ၊ သက်တမ်း တိုးတာ၊ ပြုပြင်ထိန်းသိမ်းတာတွေနဲ့ပတ်သက်ပြီး အဂတိလိုက်စားမှုတိုက်ဖျက်ရေးဥပဒေ ပုဒ်မ ၅၅ နဲ့ တရားစွဲ ထားတာဖြစ်ပါတယ်။
