ရုရှားစစ်သားတွေက ယူကရိန်းစစ်သုံ့ပန်း တယောက်ကို ဓားနဲ့ခေါင်းဖြတ်သတ်နေပုံကို ရုရှားစစ်သားတွေ ကိုယ်တိုင်က ရိုက်ကူးထားတယ်လို့ ယူဆရတဲ့ ဗီဒီယိုတစ်ခု အွန်လိုင်းမှာ ထွက်ပေါ်လာပြီးနောက် ယူကရိန်းသမ္မတက ရုရှားကို အိုက်အက်စ်အဖွဲ့နဲ့ ခိုင်းနှိုင်းခဲ့ပါတယ်။

ယူကရိန်းစစ်သားတွေသုံးတဲ့ အဝါရောင်လက်ပတ်ကြိုးကို ဝတ်ထားတဲ့ အမျိုးသားတစ်ဦးကို စစ်တပ်ယူနီဖောင်းဝတ်ထားတဲ့ အမျိုးသားတစ်ဦးက ခေါင်းဖြတ်ထားတဲ့ ဗီဒီယိုရဲ့ စစ်မှန်မှု ဒါမှမဟုတ် သက်သေအထောက်အထားကို ချက်ချင်း အတည်မပြုနိုင်သေး ပါဘူး။

ရုရှားအစိုးရကလည်း ဗီဒီယိုနဲ့ ပတ်သက်ပြီး ချက်ချင်း မှတ်ချက် မပေးသေးဘဲ၊ ရုရှားတပ်တွေဟာ မနှစ်က စတဲ့ ရုရှားရဲ့ ကျူးကျော်မှုအတွင်း ရက်စက်ကြမ်းကြုတ်တာတွေ လုပ်ခဲ့တယ်ဆိုတဲ့ စွဲချက်ကို အရင်ကတည်းက ငြင်းဆိုထားပါတယ်။

"ကမ္ဘာပေါ်မှာ ဘယ်သူမှ လျစ်လျူမရှုနိုင်တဲ့အရာတစ်ခုရှိတယ်၊ ဒီသားရဲတိရစ္ဆာန်တွေက ဘယ်လောက်လွယ်လွယ်ကူကူသတ်ပစ်လဲ။ ယူကရိန်း စစ်သုံ့ပန်းကို ကွပ်မျက်လိုက်တဲ့ ဒီဗီဒီယိုကို ကမ္ဘာက မြင်တွေ့ရမှာပါ။ ဒါက ရုရှားနိုင်ငံရဲ့ တကယ့်ဗီဒီယိုတစ်ခုပါ"လို့ ယူကရိန်းသမ္မတ ဗိုလိုဒီမာ ဇလန်းစကီးက  ပြောပါတယ်။

"အရာရာတိုင်းအတွက် တရားဥပဒေအတိုင်း တာဝန်ရှိပါတယ်။ အကြမ်းဖက်မှုကို အနိုင်ယူဖို့ လိုအပ်ပါတယ်" လို့လည်း ဇလန်းစကီးက ပြောပါတယ်။ 

ယူကရိန်း နိုင်ငံခြားရေးဝန်ကြီး ဒမစ်ထရို ခူလေဘာက "ယူကရိန်း စစ်သုံ့ပန်းတစ်ဦးကို ဖြတ်တောက်နေတဲ့ ရုရှားတပ်ဖွဲ့ဝင်တွေရဲ့ ကြောက်စရာကောင်းတဲ့ ဗီဒီယိုဟာ အွန်လိုင်းမှာ ပျံ့နှံ့နေပါတယ်။ ISIS ထက် ပိုဆိုးတဲ့ ရုရှားက ကုလသမဂ္ဂ လုံခြုံရေးကောင်စီကို ဥက္ကဋ္ဌလုပ်ရတာ အဓိပ္ပာယ်မရှိဘူး” လို့ပြောပါတယ်။

ရုရှားဟာ ကုလသမဂ္ဂ လုံခြုံရေးကောင်စီကို အလှည့်ကျ ဥက္ကဋ္ဌအဖြစ် ဒီလထဲမှာ တာဝန်ယူခဲ့တာကို ရည်ညွှန်းပြီး သူက ပြောခဲ့တာပါ။ 

"ရုရှားအကြမ်းဖက်သမားတွေကို ယူကရိန်းနဲ့ ကုလသမဂ္ဂကနေ ထုတ်ပယ်ပြီး သူတို့ရဲ့ ရာဇ၀တ်မှုတွေအတွက် တာဝန်ခံခိုင်းရမယ်လို့လည်း သူက ဆက်ပြောပါတယ်။ 

အီရတ်နဲ့ ဆီးရီးယားမှာရှိတဲ့ အစ္စလာမ္မစ်နိုင်ငံတော် အမည်ခံ အိုင်အဲ့စ် စစ်သွေးကြွတွေဟာ ၂၀၁၄ ကနေ ၂၀၁၇ ခုနှစ်ကြား ကာလတွေတုန်းက အဲဒီနိုင်ငံတွေရဲ့ နယ်မြေတွေကို ထိန်းချုပ်ထားချိန်မှာ သုံ့ပန်းတွေကို ခေါင်းဖြတ်သတ်တဲ့ ဗီဒီယိုတွေထုတ်လွှင့်မှုကြောင့် နာမည်ဆိုးနဲ့ ကျော်ကြားခဲ့ဖူးပါတယ်။

ယူကရိန်းပြည်တွင်းလုံခြုံရေးအေဂျင်စီက ဒီဗီဒီယိုနဲ့ ပတ်သက်ပြီး စစ်ရာဇ၀တ်မှု သံသယကို စပြီး စုံစမ်းစစ်ဆေးခဲ့တယ်လို့ ပြောပါတယ်။

ရုရှားထိန်းချုပ်ရာ ဒွန်းနက်စ်ခ်ဒေသရှိ စက်မှုမြို့တော် မာကိအစ်ဗ်ကာကို ယူကရိန်း တိုက်ခိုက်မှုကြောင့် ရုရှားစစ်သား ၈၉ ဦး သေဆုံးခဲ့ပြီး တိုက်ခိုက်မှု ဖြစ်ပွားရခြင်းရဲ့ အဓိက အကြောင်းရင်းဟာ တပ်ဖွဲ့ဝင်တွေက မိုဘိုင်းလ်ဖုန်းတွေကို ခွင့်ပြုချက်မရှိဘဲ အသုံးပြုတာကြောင့်ဖြစ်ကြောင်း ရုရှားကာကွယ်ရေးဝန်ကြီးဌာနက ဇန်နဝါရီ ၄ ရက်မှာ ပြောကြားခဲ့ပါတယ်။

“ဖြစ်ပျက်ခဲ့သမျှရဲ့ အဓိကအကြောင်းရင်းက ရန်သူ့လက်နက်တွေ လက်လှမ်းမီတဲ့ဇုန်အတွင်း မိုဘိုင်းလ်ဖုန်းတွေကို တားမြစ်ပိတ်ပင်ထားတာတွေကို ဆန့်ကျင်ပြီးတော့ ခလုတ်ဖွင့်ပြီး ကြီးကြီးမားမား အသုံးပြုမှုကြောင့် ဖြစ်ရတယ်ဆိုတာ သိပ်သိသာထင်ရှားနေတယ်” လို့ ဝန်ကြီးဌာနရဲ့ ထုတ်ပြန်ချက်မှာ ဖော်ပြထားပါတယ်။

ဒီအချက်က ရန်သူကို ခြေရာခံနိုင်စေပြီး ရန်သူကို ဒုံးကျည်ပစ်လွှတ်ဖို့အတွက် စစ်သားတွေရဲ့ တည်နေရာ အတိအကျကို ကိုသြဒိနိတ်တွက်လို့ ရစေတယ်လို့လည်း ဆိုပါတယ်။

မာကိအစ်ဗ်ကာရှိ စစ်တန်းလျားတွေအသွင်ပြောင်းထားတဲ့ စာသင်ကျောင်း တကျောင်းပေါ်ကို နှစ်သစ်ကူးနေ့ ညသန်းခေါင်ကျော်မှာ ပစ်ခတ်တိုက်ခိုက်မှုကြောင့် ရုရှားအမျိုးသားရေးဝါဒီတွေနဲ့ လွှတ်တော်အမတ်တချို့ကို ဒေါသထွက်စေခဲ့ပြီး အဲဒီမှာသုံးတဲ့ စစ်ရေးဗျူဟာကို မေးခွန်းထုတ်ခဲ့ကြပါတယ်။

ရုရှားဟာ အစောပိုင်းက ရုရှားစစ်သား ၆၃ ဦး သေဆုံးခဲ့ကြောင်း ပြောကြားထားပါတယ်။

အမေရိကန်လုပ် HIMARS လောင်ချာတွေက ဒုံးကျည် ၄ စင်းဟာ အဆောက်အအုံကို ထိမှန်ခဲ့ကြောင်း ကာကွယ်ရေးဝန်ကြီးဌာနက ပြောကြားခဲ့ပါတယ်။ HIMARS ဒုံးပျံတွေရဲ့ ထိပ်ဖူးတွေက ဖောက်ခွဲမှုတွေကြောင့် အဆောက်အဦရဲ့ မျက်နှာကြက်တွေ ပြိုကျခဲ့ကြောင်းလည်း ထည့်သွင်းပြောကြားခဲ့ပါတယ်။

ကော်မရှင်ဟာ တိုက်ခိုက်မှုရဲ့ အခြေအနေတွေကို စုံစမ်းစစ်ဆေးနေကြောင်း ဝန်ကြီးဌာနရဲ့ တယ်လီဂရမ်အက်ပ်က ထုတ်ပြန်ချက်မှာ ထည့်သွင်းပြောကြားခဲ့ပါတယ်။