ယူကရိန်းစစ်တပ်ဟာ နိုင်ငံရဲ့အနောက်ဘက်မှာ ရုရှားကပစ်လွှတ်လိုက်တဲ့ နျူကလီးယားထိပ်ဖူးတပ် ဒုံးကျည် အပိုင်းအစတွေ တွေ့ရှိခဲ့ရကြောင်းနဲ့ ရုရှားရဲ့ရည်ရွယ်ချက်က လေကြောင်းရန်ကာကွယ်ရေးစနစ်ကို အာရုံပြောင်းအောင် လုပ်ချင်တာဖြစ်ကြောင်း သိသာထင်ရှားတယ်လို့ ယူကရိန်းစစ်တပ်က ဒီဇင်ဘာ ၁ရက်မှာ ပြောပါတယ်။
ဒီဒုံးကျည် အပိုင်းအစတွေဟာ ယူကရိန်း အနောက်ပိုင်းက လီဗစ်ဗ်နဲ့ ခမဲလ်နစ်စ်ကီး ဒေသတွေမှာ အောက်တိုဘာ ၃၁ ရက်က ကျရောက်ခဲ့တဲ့ Kh-55 ပဲ့ထိန်းဒုံးကျည်ရဲ့ အစိတ်အပိုင်းတွေလို့ ယူကရိန်းလက်နက်ကိုင်တပ်ဖွဲ့ရဲ့ သုတေသနအဖွဲ့ ကိုယ်စားလှယ်ဖြစ်သူ မိုက်ကိုလာ ဒါနိုက်လူ့ခ် က သတင်းစာ ရှင်းလင်းပွဲမှာ ပြောပါတယ်။
ဒီပဲ့ထိန်းဒုံးကျည်တွေကို အောက်တိုဘာ ၃၁ ရက် မတိုင်ခင်အထိ ရုရှားက အသုံးပြုခြင်းမရှိခဲ့ပေမယ့် ဒီဒုံးကျည်တွေရဲ့ အရွေ့စွမ်းအင်နဲ့ လောင်စာကြောင့် အတိုင်းအတာတခုအထိ အန္တရာယ် ရှိတယ်လို့ ဆိုပါတယ်။
Kh-55 ပဲ့ထိန်းဒုံးကျည် ကို ဗျူဟာမြောက် ပစ်မှတ်တွေအပေါ် တိုက်ခိုက်ဖို့ ၁၉၇၀ ပြည့်နှစ် ဝန်းကျင်မှာ ဆိုဗီယက်ခေတ်က ဒီဇိုင်း ရေးဆွဲခဲ့တာဖြစ်ပြီး အစပိုင်းက နျူကလီယားထိပ်ဖူးတွေတပ်ဆင်ဖို့နဲ့ ဗုံးကြဲလေယာဉ်တွေကနေ ပစ်လွှတ်ဖို့ ရည်ရွယ်ထားတာပါ။
ဒါပေမဲ့အခုတွေ့ရှိခဲ့တဲ့ ဒုံးကျည်အစိတ်အပိုင်းတွေမှာတော့ မူမမှန်တဲ့ ရေဒီယိုသတ္တုကြွအဆင့်တွေကို မတွေ့ရဘူးလို့ တာဝန်ရှိသူက ဆိုပါတယ်။ ရုရှားကာကွယ်ရေးဝန်ကြီးဌာနကတော့ မှတ်ချက်ပေးဖို့ တောင်းဆိုမှုအပေါ် ချက်ချင်း တုံ့ပြန်မှုမရှိပါဘူး။
ရုရှားက သူ့ရဲ့ နျူကလီးယားတပ်ဖွဲ့တွေ လေ့ကျင့်မယ့် အစီအစဉ်နဲ့ ပတ်သက်ပြီး အမေရိကန်ကို အကြောင်းကြားခဲ့တယ်လို့ ပင်တဂွန်စစ်ဌာနချုပ်က အောက်တိုဘာ ၂၅ ရက်မှာ ပြောပါတယ်။
ဒီလေ့ကျင့်မှုအတွင်း ပဲ့ထိန်းဒုံးကျည်တွေ စမ်းသပ်ပစ်လွှတ်နိုင်တဲ့ အသေးစိတ် အချက်အလက်တွေကိုတော့ ပေးဖို့ ငြင်းပါတယ်။
“အမေရိကန်ကို အသိပေးထားပြီး အရင်က ကျနော်တို့ မီးမောင်းထိုးပြခဲ့သလို ရုရှားရဲ့ နှစ်စဉ် လုပ်ရိုးလုပ်စဉ် လေ့ကျင့်ခန်းပါ” လို့ ပြောရေးဆိုခွင့်ရှိသူ အမေရိကန် လေတပ်ဗိုလ်မှူးချုပ် ပက်ထရစ် ရိုက်ဒါက သတင်းစာရှင်းလင်းပွဲမှာ ပြောပါတယ်။
“ဒါကြောင့် ဒီကိစ္စနဲ့ပတ်သက်လို့ ရုရှားက သူ့ရဲ့ လက်နက်ထိန်းချုပ်ရေး တာဝန်ဝတ္တရားတွေနဲ့ ပွင့်လင်းမြင်သာမှုရှိတဲ့ ကတိကဝတ်တွေကို လိုက်နာဆောင်ရွက်နေပါတယ်”လို့လည်း သူက သတင်းစာရှင်းလင်းပွဲမှာ ပြောခဲ့ပါတယ်။
