ရုရှားဘောလုံးအဖွဲ့ချုပ်ဟာ ကမ္ဘာနဲ့ဥရောပ ဘောလုံးအဖွဲ့ချုပ်တွေရဲ့ ထုတ်ပယ်ခံထားရတာကြောင့် အာရှဘောလုံးအဖွဲ့ချုပ်လက်အောက်ဆီ ကူးပြောင်းဖို့ စဉ်းစားနေပါတယ်။ 

ယူကရိန်းကို ကျူးကျော်မှုကြောင့် ရုရှားဘောလုံးအသင်းတွေအားလုံးကို ကမ္ဘာ့ပြိုင်ပွဲနဲ့ ဥရောပပြိုင်ပွဲတွေကနေ ထုတ်ပယ်ထားတာပါ။ 

ဒီအခြေအနေကြောင့် အားပေးထောက်ခံတဲ့ မဟာမိတ်နိုင်ငံတချို့ရှိတဲ့ အာရှဘောလုံးအဖွဲ့ချုပ် လက်အောက်ကို ကူးပြောင်းဖို့ ရုရှားဘက်က စဉ်းစားနေတာပါ။ 

အာရှဘောလုံးအဖွဲ့ချုပ်လက်အောက် ကူးပြောင်းမယ်ဆိုရင် လက်ခံမလားဆိုတာကတော့ မသိရှိရသေးပါဘူး။ 

အာရှဘောလုံးအဖွဲ့ချုပ်ဟာ သမုဒ္ဒရာပိုင်းဇုန်က သြစတြေးလျအသင်းကိုတော့ ၂၀၀၅ ခုနှစ်က အသင်းဝင်နိုင်ငံအနေနဲ့ လက်ခံခဲ့ဖူးပါတယ်။ 

အစ္စရေးနဲ့ ကာဇက်စတန် နိုင်ငံအသင်းတွေကတော့ အာရှဘောလုံးအဖွဲ့ချုပ် လက်အောက်ကနေ ဥရောပဘောလုံးအဖွဲ့ချုပ်လက်အောက်ကို ကူးပြောင်းခဲ့ဖူးပါတယ်။ 

မန်ယူကစားသမားဟောင်းဖြစ်သူ ရုရှားလက်ရွေးစင်ဟောင်း ကန်ချက်စကီးကတော့ ရုရှားအသင်းကို အာရှဘောလုံးအဖွဲ့ချုပ်က လက်ခံမလားဆိုတာ မသိပေမယ့် ရွေးချယ်ခွင့်ရှိမယ်ဆိုရင်တော့ ကူးပြောင်းသင့်တယ်လို့ မှတ်ချက်ပေးခဲ့ပါတယ်။ 

ရုရှားအသင်းဟာ လာမယ့် ၂၀၂၂ ကမ္ဘာ့ဖလားခြေစစ်ပွဲ ပလေးအော့ဖ်ပွဲစဉ်အဖြစ် ပိုလန်နဲ့ ကစားရမှာဖြစ်ပေမယ့် ကမ္ဘာ့ဘောလုံးအဖွဲ့ချုပ်က ပွဲပယ်ပြစ်ဒဏ်ချခဲ့တာကြောင့် ကမ္ဘာ့ဖလားနဲ့လည်း လွဲချော်ခဲ့ပါတယ်။

ရုရှားအသင်းတွေကို ပြိုင်ပွဲတွေကနေ ထုတ်ပယ်ခဲ့တာဟာ ဖီဖာနဲ့ ယူအီးအက်ဖ်အေတို့ရဲ့ ဥပဒေမဲ့ လုပ်ဆောင်မှုဖြစ်ကြောင်း ရုရှားဘောလုံးအဖွဲ့ချုပ်က အားကစားဆိုင်ရာခုံရုံးဆီ အယူခံတင်သွင်းရာမှာ ထည့်သွင်း တိုင်ကြားခဲ့ပါတယ်။
ရုရှားဘောလုံးအဖွဲ့ချုပ်ရဲ့ အယူခံတင်သွင်းမှုကို လက်ခံရရှိကြောင်းလည်း အားကစားဆိုင်ရာခုံရုံး (CAS) က မတ် ၈ ရက်နေ့မှာ သတင်းထုတ်ပြန်ပါတယ်။
ပြိုင်ပွဲတွေကနေ ထုတ်ပယ်ခဲ့တာက ဖီဖာနဲ့ ယူအီးအက်ဖ်အေ အဖွဲ့ဝင်နိုင်ငံ တနိုင်ငံရဲ့ အခွင့်အရေးကို ချိုးဖောက်တာဖြစ်သလို ပြိုင်ပွဲဝင်ပြိုင်ခွင့်ကိုလည်း ချိုးဖောက်ခဲ့တာလို့ ရုရှားရဲ့ အယူခံတင်သွင်းလွှာမှာ စွပ်စွဲထားပါတယ်။
ဒါ့အပြင် ကမ္ဘာ့ဖလားခြေစစ်ပွဲ ပလေးအော့ဖ်အဆင့်ကနေ ထုတ်ပယ်ခဲ့တာဟာလည်း အားကစားရဲ့ အခြေခံစည်းမျဉ်းတွေနဲ့ တရားမျှတမှုတွေကို ချိုးဖောက်ခဲ့တာလို့ ဆိုပါတယ်။
အားကစားဆိုင်ရာခုံရုံးအနေနဲ့ ရုရှားရဲ့ အယူခံတင်သွင်းမှုအပေါ် လုပ်ထုံးလုပ်နည်းတွေအတိုင်း ဆက်လက်ကြားနာ စစ်ဆေးသွားမယ်လို့ သတင်းထုတ်ပြန်ထားပါတယ်။