ရေကြီးမှုနဲ့ကြုံတွေ့ရေတဲ့ ဘင်္ဂလားဒေ့ရှ်နိုင်ငံမှာ သီတင်းပတ်ကုန်ရက်က မိုးကြိုးပစ်တာနဲ့ မြေပြိုတာတွေကြောင့် လူ ၂၅ ယောက်ထက် မနည်း သေဆုံးတယ်လို့ အရာရှိတွေက ပြောပါတယ်။

နိုင်ငံရဲ့ လတ်တလော သမိုင်းမှာ အဆိုးဆုံး မုတ်သုံရာသီ ရေကြီးမှုကြောင့် နိုင်ငံအရှေ့မြောက်ပိုင်း ဒေသက မြေနိမ့်ပိုင်းမှာ လူသန်းချီ အိုးအိမ်မဲ့ ဖြစ်ခဲ့ရတာပါ။

နိုင်ငံအတွင်း မြစ်အများအပြားက အန္တရာယ်ရှိတဲ့အဆင့်ထိ မြစ်ရေ မြင့်တက်ခဲ့ပြီး တောင်တွေပေါ်မှာ မိုးကြီးလို့ စီးလာတဲ့ ရေတွေကြောင့် အခြေအနေ ပိုဆိုးခဲ့တာလို့ ရေကြီးမှုဆိုင်ရာ ခန့်မှန်းသတိပေးဌာန အကြီးအကဲ အာရီဖက်ဇ်ဇာမန် ဘူအီယန်က ပြောပါတယ်။

နိုင်ငံတဝန်း ရှာဖွေ ကယ်ဆယ်ရေးလုပ်ငန်းတွေအတွက် စစ်တပ်နဲ့ ရဲအရာရှိ ထောင်ချီကို တာဝန်ချထားရပါတယ်။

ခုချိန်ထိ လူ တစ်သိန်းခွဲလောက်ကို  ဘေးကင်းရာ ရွှေ့ပေး ထားရပြီး လူအယောက် လေးသန်းကျော် ရေဘေးမှာ သောင်တင်နေတယ်လို့ ရဲအရာရှိတွေက ခန့်မှန်း ထားပါတယ်။

တကယ်လို့ ကယ်ဆယ်ရေးလုပ်ငန်းတွေ သင့်တော်အောင် ဆောင်ရွက်တာ မရှိရင် တနိုင်ငံလုံး လူသားချင်းစာနာမှုဆိုင်ရာ အကျပ်အတည်းကိုရင်ဆိုင်နေရလိမ့်မယ်လို့ ဆူနမ်ဂန့်ဂျ် ခရိုင်က လက်ရှိ အာဏာရပါတီရဲ့ နိုင်ငံရေးသမားနဲ့အမတ်ဟောင်း ဆေးယတ်ရာဖစ်ကယ်ဟာကေးက ပြောပါတယ်။ 

မြေအမြင့်ပိုင်းတွေက အစိုးရစီမံနေတဲ့ ယာယီ ခိုလှုံရေးစခန်းတွေမှာ လူ ၂ သိန်းလောက် နေနေရပြီး လူ ၃ ဒသမ ၁ သန်း အိုးအိမ်စွန့်ခွာ ရွှေ့ပြောင်းခဲ့ရတယ်လို့ ဒေသန္တရ အရာရှိတွေက ပြောပါတယ်။

ဘင်္ဂလားဒေ့ရှ်နဲ့ အိန္ဒိယနိုင်ငံတွေဟာ လတ်တလော နှစ်တွေမှာ အစွန်းရောက် ရာသီဥတုတွေ ပိုတိုးလာနေတာလို့ အကြီးစား အပျက်အစီးတွေကို ရင်ဆိုင်နေရပါတယ်။

ရာသီဥတု ပြောင်းလဲမှုကြောင့် မြေနိမ့်ပြီး လူနေသိပ်သည်းတဲ့ ဘင်္ဂလားဒေ့ရှ်နိုင်ငံမှာ ကပ်ဘေးတွေ ပိုများလာနိုင်တယ်လို့ သဘာဝပတ်ဝန်းကျင်ပညာရှင်တွေက သတိပေးထားပါတယ်။

အိန္ဒိယနိုင်ငံ အရှေ့မြောက်ပိုင်း အာသံပြည်နယ်မှာ လွန်ခဲ့တဲ့ ၁၀ ရက်အတွင်း လျှပ်တပြက် ရေကြီးမှုနဲ့ မြေပြိုမှုတွေကြောင့် လူ ၂၅ ဦးထက်မနည်း သေဆုံးပြီး လူပေါင်း ၆၅၀,၀၀၀ ကျော် အိုးမဲ့အိမ်မဲ့ ဖြစ်ခဲ့ရတယ်လို့ တာဝန်ရှိသူတွေက မေ ၂၄ ရက်မှာ ပြောကြားခဲ့ပါတယ်။

အာသံပြည်နယ်မှာ မုတ်သုံမိုးသည်းထန်တာ နှစ်စဉ်ဖြစ်ပွားလေ့ရှိသလို ရေကြီးမြေပြိုမှုတွေကြောင့် ဒေသခံတွေ အိုးအိမ်စွန့်ခွာ ထွက်ပြေးရပြီး မကြာခဏဆိုသလို သူတို့ပိုင်ဆိုင်သမျှတွေကို ထားပစ်ခဲ့ရတာပါ။

တိဘက်ကနေ အိန္ဒိယကို စီးဆင်းပြီး နောက်ဆုံး ဘင်္ဂလားဒေ့ရှ်နိုင်ငံထဲ အဆုံးသတ် စီးဝင်သွားတဲ့ ဗြဟ္မပုတ္တရမြစ်ရေလျှံလို့ အာသံပြည်နယ်ထဲမှာ ကမ်းပါးတွေ ပြိုကျခဲ့ပြီး အခုလအတွင်း ခရိုင် ၂၆ ခုရှိ ကျေးရွာပေါင်း ၁,၈၀၀ ကျော် ရေနစ်မြုပ်ခဲ့ရပါတယ်။ မီးရထားလမ်းကွန်ရက်ရဲ့ အစိတ်အပိုင်းတွေလည်း ပျက်စီးခဲ့ပါတယ်။

အာဏာပိုင်တွေဟာ ခရိုင် ၂၀ မှာ ကယ်ဆယ်ရေးစခန်း ၃၆၆ ခု ထူထောင်ထားပြီး လူပေါင်း ၉၅,၀၀၀ ကျော်အတွက် ယာယီခိုလှုံဖို့ နေရာတွေ စီစဉ်ပေးနေပါတယ်။

ပြည်နယ်ရဲ့ နေရာတချို့မှာလည်း ရေလွှမ်းမိုးမှုကြောင့် လမ်းတွေ၊ နေအိမ်တွေနဲ့ အဆောက်အအုံတွေလည်း ရေနစ်မြုပ်ခဲ့ပါတယ်။