တိုက်စစ်မှူးဟာလန်းဟာ မက်ဆီနဲ့ ရော်နယ်ဒိုတို့ရဲ့ အဆင့်အတန်းကိုရောက်ရှိနေပြီလို့ နည်းပြဂွာဒီယိုလာက ချီးကျူးသွားပါတယ်။
ပြီးခဲ့တဲ့ဆယ်စုနှစ် နှစ်ခုစာလောက်အတွင်းမှာ ရော်နယ်ဒိုနဲ့ မက်ဆီတို့သာ အပြိုင်အဆိုင်ဖြစ်ခဲ့ပေမဲ့ လက်ရှိအချိန်မှာတော့ ဟာလန်းက သူတို့နှစ်ဦးရဲ့ အဆင့်အတန်းကိုရောက်ရှိ နေပြီလို့ ဂွာဒီယိုလာကပြောခဲ့တာပါ။
နော်ဝေတိုက်စစ်မှူးဟာ စနေနေ့က ကစားခဲ့တဲ့ ဆောက်သမ်တန်နဲ့ ပွဲစဉ်မှာ နှစ်ဂိုးသွင်းခဲ့ပြီးနောက် ပရီးမီးယားလိဂ် သွင်းဂိုး ၃၀ ပြည့်မြောက်ခဲ့ပြီး ပြိုင်ပွဲစုံမှာ ၄၄ ဂိုးရှိသွားခဲ့တာပါ။
ဂွာဒီယိုလာက “ဟာလန်းက ခရစ္စတီယာနိုနဲ့ အတော်လေးတူညီပါတယ်။ လီယွန်နယ်ကတော့ ပိုပြီး ပြီးပြည့်စုံတဲ့ ကစားသမားပါ။ ဒါပေမဲ့ ဟာလန်းက စက်ရုပ်တရုပ် လိုပါပဲ။ ဆယ်စုနှစ် နှစ်ခုလောက် သူတို့နှစ်ဦးကပဲ လွှမ်းမိုးလာခဲ့ပြီးနောက်မှာတော့ ဟာလန်းက သူတို့နေရာ ဝင်ဖို့ မယုံကြည်နိုင်လောက်အောင် မှန်ကန်တဲ့စိတ်ဓာတ်ရှိတယ်”လို့ ပြောပါတယ်။
လက်ကျန် ၉ ပွဲအလို လိဂ်သွင်းဂိုး ၃၀ ရရှိထားတဲ့ ဟာလန်းဟာ ၂၀၁၇-၂၀၁၈ ရာသီက တစ်ရာသီတည်း ၃၂ ဂိုးသွင်းခဲ့တဲ့ ဆာလာရဲ့စံချိန်ကို ကျော်ဖြတ်ဖို့လည်း အလားအလာ ကောင်းမွန်နေပါတယ်။
ရော်နယ်ဒိုကစားနေတဲ့ ဆော်ဒီကလပ် အယ်လ်နာဆာအသင်းဆီပြောင်းရွှေ့မှာ မဟုတ်ဘဲ ရီးရဲလ် မှာပဲ ကစားသမားဘဝကုန်ဆုံးချင်ကြောင်း ကွင်းလယ်လူမိုဒရစ်က ပြောပါတယ်။
အသက် ၃၇ နှစ် ရှိပြီဖြစ်တဲ့ ခရိုအေးရှားကွင်းလယ်လူဟာ အသင်းဖော်ဟောင်း ရော်နယ်ဒိုကစားနေတဲ့ အယ်လ်နာဆာအသင်းဆီပြောင်းရွှေ့မယ်လို့ သတင်းထွက်ပေါ်နေတာပါ။
မိုဒရစ်ဟာ လာမယ့်နွေရာသီမှာ စာချုပ်သက်တမ်းကုန်ဆုံးတော့မှာဖြစ်ပေမဲ့ သူ့ရဲ့ဆန္ဒက ရီးရဲလ်မက်ဒရစ်မှာ ဆက်ရှိနေဖို့ဖြစ်ပြီး အဲဒီအတိုင်းဖြစ်လာဖို့ ယုံကြည်ကြောင်း မိုဒရစ်က ပြောပါတယ်။
မိုဒရစ်ဟာ အသက် ၃၇ နှစ်ရှိ နေပြီဖြစ်လို့ ကလပ်အသင်းအပေါ် အပြည့်အဝ အာရုံစိုက်နိုင်ဖို့အတွက် နိုင်ငံအသင်းကနေ အနားယူသင့်ပြီဆိုတဲ့ အကြံပေးချက်အပေါ်မှာလည်း ငြင်းဆန်သွားခဲ့ပါတယ်။
မိုဒရစ်ဦးဆောင်တဲ့ ခရိုအေးရှားဟာ မနေ့ညက ဝေးလ်အသင်းနဲ့ ကစားခဲ့ပြီး တူရကီနဲ့ ဆက်ပြီးရင်ဆိုင်သွားရမှာဖြစ်ပါတယ်။
