မွန်ပြည်နယ်၊ ရေးမြို့၊ အာရှလမ်းမကြီးဘေးမှာရှိတဲ့ တပ်ရင်း ၅၈၆ ထဲက စစ်ကောင်စီ တပ်ဖွဲ့ဝင်တွေကို ဒီဇင်ဘာ ၂၀ ရက် ဒီနေ့ နေ့လယ် ၁၁ နာရီကျော်လောက်က RPG နဲ့ ပစ်ခတ်ခဲ့တယ်လို့ ရေးဘီလူးတပ်ဖွဲ့ ခေါင်းဆောင်က ပြောပါတယ်။
“ဒီနေ့မနက် ၁၁ နာရီ ၄၉ မိနစ်လောက်မှာ ရေးမြို့ထဲက ၅၈၆ တပ်ရင်းထဲကို ကျနော် RPG နဲ့ ဝင်ထုတယ်။ ပြီးတော့ လက်နက်ငယ်တွေနဲ့ နည်းနည်းပါးပါး မွှေ့ယမ်းပစ်ခတ်တယ်။ သူတို့ စစ်ဆင်ရေးဘန်ကာတွေကို ကျနော်တို့ အရင်ထုချေတာပေါ့။”
အဆိုပါတိုက်ခိုက်မှုမှာ ရေးဘီလူးတပ်ဖွဲ့ဝင်တွေ ထိခိုက်မှုမရှိကြောင်းနဲ့ စစ်ကောင်စီ တပ်ဖွဲ့ဝင်တွေ သေဆုံး ဒဏ်ရာရတာတွေ ရှိတယ်လို့လည်း ဆိုပါတယ်။
“အခုပစ်ခတ်တာကြောင့် စစ်ကောင်စီက လေးဦးကျတယ်၊ ဒဏ်ရာရတာတွေလည်း ရှိတယ်။ ကျနော်တို့တပ်ဖွဲ့ဝင်တွေကတော့ ပြောက်ကျားစနစ်နဲ့ အလျင်အမြန် တိုက်ခိုက်နိုင်ခဲ့တာကြောင့် အထိအခိုက်မရှိဘဲ ဆုတ်ခွာနိုင်ခဲ့ပါတယ်။”
မွန်ပြည်နယ်၊ ရေးမြို့အတွင်းမှာ စစ်ရေးအခြေအနေတွေ ခပ်စိပ်စိပ် မြှင့်တင်လာဖို့ရှိပြီး လက်ရှိမှာ တိုက်ပွဲတွေအတွက် လက်နက်ကြီးတွေလည်း ပိုင်ဆိုင်ထားတာကြောင့် မြို့ခံတွေအနေနဲ့ အားမငယ်ဖို့နဲ့ ရေးမြို့ကို ပြန်လည်ထိန်းနိုင်အောင် ကြိုးစားသွားမှာ ဖြစ်တယ်လို့လည်း ရေးဘီလူးခေါင်းဆောင်က ပြည်သူတွေကို အသိပေး ပြောပါတယ်။
ပြီးခဲ့တဲ့ ဒီဇင်ဘာ ၁၆ ရက်ကလည်း ရေးဘီလူးအဖွဲ့က ရေးမြို့အခြေစိုက် အမတ ၃၁၆ လိုင်းခန်းကို ၄၀ မမနဲ့ ပစ်ခတ်ခဲ့ရာ စစ်ကောင်တပ်ဖွဲ့ဝင် အများအပြား ထိခိုက်ခဲ့ပါတယ်။
မွန်ပြည်နယ်၊ ရေးမြို့နယ်၊ ရေး-မော်လမြိုင်သွား ကားလမ်းဘေးမှာ အခြေစိုက်တဲ့ စစ်ကောင်စီ စကခ ၁၉ ဌာနချုပ်လက်အောက်ခံ တပ်ရင်း ၅၈၆ ကို ဧပြီ ၂၁ ရက် ညနေ ၃ နာရီ ၄၅ မိနစ်က ရေးဘီလူးတပ်ဖွဲ့ဝင်တွေ ဝင်ရောက်စီးနင်းပြီး အပြန်အလှန် ပစ်ခတ်မှု ဖြစ်ပွားခဲ့တယ်လို့ ဒေသခံတွေက ပြောပါတယ်။
မိနစ်အနည်းငယ်ကြာ နှစ်ဖက် အပြန်အလှန် ပစ်ခတ်မှုအတွင်း စစ်ကောင်စီဘက်က ၃ ဦး ကျဆုံးခဲ့တယ်လို့လည်း ရေးဘီးလူးအဖွဲ့ တာဝန်ရှိသူတဦးက ပြောပါတယ်။
အဆိုပါပစ်ခတ်မှုအတွင်း စစ်ကောင်စီတပ်တွေ ထိခိုက်သေဆုံးမှုအခြေအနေကို စစ်ကောင်စီ ပြန်ကြားရေးက သတင်းထုတ်ပြန်ခြင်းမရှိသေးသလို ဒီဗွီဘီ အနေနဲ့လည်း သီးခြား အတည်ပြုနိုင်ခြင်းမရှိသေးပါဘူး။
အပြန်အလှန် ပစ်ခတ်နေချိန် ခရီးသည်ကားတွေနဲ့ ပြည်သူတွေ ထိခိုက်မှုမရှိဘဲ စစ်ကောင်စီတပ်ဖွဲ့ဝင်တွေကတော့ ၂ ဖာလုံလောက် အကွာအဝေးမှာ အသင့်အနေအထားနဲ့ ပိတ်ဆို့ နေရာယူထားပြီး စောင့်ဆိုင်းနေတယ်လို့ ဆိုပါတယ်။
အခုစီးနင်းခံရတဲ့ တပ်ရင်း ၅၈၆ စစ်ဆေးရေးဂိတ်နဲ့ တပ်ရင်း ၃၄၃ တွေကို ဇန်နဝါရီ ၂၈ ရက်နေ့ကလည်း ဒေသဆိုင်ရာ ကာကွယ်ရေးတပ်တွေက ပထမအကြိမ် စီးနင်းတိုက်ခိုက်ခဲ့ပြီး အခုတိုက်ခိုက်မှုက ဒုတိယအကြိမ် ဖြစ်ပါတယ်။
ရေးဘီးလူးတပ်ဖွဲ့ဝင်တွေဟာ အဲဒီစီးနင်းမှုအပြီး အပြန်မှာ တရုတ်နိုင်ငံသားပိုင် အထပ်သားစက်ရုံရှေ့အရောက် တောခေါင်းအရာရှိတဦး ငွေကောက်ခံနေတာ တွေ့တာကြောင့် ပစ်ခတ် ရှင်းလင်းလိုက်တယ်လို့ ရေးဘီးလူးအဖွဲ့ တာဝန်ရှိသူတဦးက ပြောပါတယ်။
ကရင်အမျိုးသားအစည်းအရုံး (ကေအန်ယူ) တပ်ဖွဲ့တွေနဲ့ ဒေသဆိုင်ရာ ကာကွယ်ရေးတပ် (PDF) ပူးပေါင်းအဖွဲ့တွေဟာ ရေး-မော်လမြိုင် ကားလမ်းပေါ်က စစ်ကောင်စီတပ်တွေကို မကြာခဏ တိုက်ခိုက်လေ့ ရှိပါတယ်။
