မန်ချက်စတာ ယူနိုက်တက်မန်နေဂျာ အဲရစ်ခ်တန်ဟတ်ဟာ သူ့ရဲ့ ကစားသမားတွေကို ယူရိုပါလိဂ်ရှုံးကနေ ထွက်ခဲ့ရတဲ့ စိတ်ပျက်ဖွယ်ရာ ပွဲစဉ်ကနေ ပြန်လည် ရုန်းထလာနိုင်ဖို့ ဒီကနေ့ညကစားမယ့် အက်ဖ်အေဖလားပွဲစဉ်မှာ မျှော်မှန်းထားတယ်လို့ ပြောဆိုလိုက်ပါတယ်။
ယူရိုပါလိဂ် ဒုတိယအကျော့ ကွာတားဖိုင်နယ်မှာ ဆီဗီလာကို ၃ ဂိုး ဂိုးမရှိနဲ့ ရှုံးနိမ့်ခဲ့ပြီး ၂ ပွဲပေါင်း ရလဒ် ၅ ဂိုး ၂ ဂိုးနဲ့ ထွက်ခဲ့ရတဲ့ ပွဲစဉ်အပြီးနောက်ရက်မှာ ပြောကြားခဲ့တာပါ။
အသင်းသားတွေဟာ သူတို့ရဲ့ စွမ်းဆောင်ရည်ကျဆင်းနေတာကို သိဖို့လိုအပ်တယ်လို့လည်း ပြောဆိုခဲ့ပါတယ်။
“ကျနော်တို့ အားလုံး တိုးတက်ဖို့လိုအပ်ပါတယ်။ နည်းပြဖြစ်သူက အသင်းသားတွေကို သင်ကြားပေးရမှာဖြစ်ပြီး အသင်းသားတွေက အကောင်အထည်ဖော်ရမှာပါ။ ဒီရာသီမှာ ဆိုးဝါးတဲ့ ရလဒ်တွေ ရှိခဲ့တယ် ဆိုးဝါးတဲ့ စွမ်းဆောင်ရည်တွေ ရှိခဲ့တယ်ဆိုတာကို သိထားတယ်”လို့လည်း နည်းပြက ပြောကြားခဲ့ပါတယ်။
ကျနော်တို့ ဒီလိုပုံစံမျိုးအတွေ့အကြုံတွေ ရှိထားတာကြောင့် ကျနော်တို့ ပြန်လည် ရုန်းထနိုင်မယ်လို့ ယုံကြည်ထားသလို ဒါကို လုပ်ဆောင်နိုင်မယ်လို့လည်း ခိုင်ခိုင်မာမာ ယုံကြည်ထားပါတယ်လို့ နည်းပြတန်ဟက်က ပြောပါတယ်။
မနေ့ညကကန်သွားတဲ့ ဗီလာအသင်းနဲ့ပွဲစဉ်မှာ အခွင့်အရေးတွေရပေမဲ့ ဂိုးမသွင်းနိုင်ခဲ့တာက ရှုံးပွဲတွေ့ခဲ့ရတဲ့ အဖြေ ဖြစ်ကြောင်း ချဲလ်ဆီးနည်းပြဂရေဟမ်ပေါ်တာကပြောသွားပါတယ်။
ချဲလ်ဆီးအသင်းဟာ ဗီလာဘက်ကို ဂိုးပါက်ကန်သွင်းချက် ၂၇ ကြိမ်အထိရရှိခဲ့ပေမဲ့ ဂိုးမသွင်းနိုင်ခဲ့ပါဘူး။
အက်စတန်ဗီလာဘက်ကတော့ ဂိုးကန်သွင်းချက် ၅ ကြိမ်သာရရှိခဲ့ပေမဲ့ နှစ်ဂိုးသွင်းယူနိုင်ခဲ့ပြီး ၂ဂိုး ဂိုးမရှိနဲ့ ချဲလ်ဆီးအသင်းကို အနိုင်ယူခဲ့တာပါ။
ဗီလာအသင်းကိုရှုံးနိမ့်ခဲ့တာဟာ ကစားသမားတွေကြိုးစားအားထုတ်မှုနဲ့ မသက်ဆိုင်ပေမဲ့ သေးငယ်တဲ့ အခိုက်အတန့်တွေမှာ ပိုကောင်းတဲ့ စွမ်းဆောင်ရည်ရဖို့တော့ လိုအပ်ကြောင်း နည်းပြပေါ်တာကပွဲအပြီးမှာ ပြောပါတယ်။
ဒါပေမဲ့ရှုံးပွဲ အတွက် ဘယ်သူ့ကိုမှ ပြစ်တင်စရာမလိုအပ်ဘဲ နည်းပြချုပ်ဖြစ်တဲ့ သူကိုယ်တိုင် တာဝန်ယူမှာဖြစ်ကြောင်း နိုင်သည်ဖြစ်စေ၊ ရှုံးသည်ဖြစ်စေ အတူတကွရှိနေဖို့လို အပ်ကြောင်းနည်းပြပေါ်တာက ပြောသွားပါတယ်။
