လက်နက်ထိန်းချုပ်ရေးကို တောင်းဆိုတဲ့ လူထုစုဝေးပွဲတွေကို နယူးယော့ခ်မြို့အပါအဝင် အမေရိကန် ပြည်ထောင်စုတဝန်းမှာ ဇွန် ၁၁ ရက်က  ပြုလုပ်ခဲ့ကြပါတယ်။

အရင်လတုန်းက တက္ကဆက်ပြည်နယ်က မူလတန်းကျောင်းကို သေနတ်နဲ့ ဝင်ပစ်လို့ ကလေးတွေ အစုလိုက်အပြုံလိုက် သေဆုံးခဲ့ရတဲ့ အဖြစ်အပျက် နောက်ပိုင်း ဆန္ဒပြပွဲတွေ အခုလို ကျယ်ပြန့်လာတာပါ။

နယူးယော့ခ်က ဆန္ဒပြပွဲမှာ ကျောင်းသား ကျောင်းသူတွေကိုလည်း ဆန္ဒပြပွဲမှာ တွေ့ရပါတယ်။ ကိုးတန်းကျောင်းသူ အန်ယာဘစ်က “ဒီအတိုင်းပဲ ဆက်သွားနေဦးမယ်။ ဒါကိုပြန်တိုက်ဖို့ နည်းလမ်းမရှာဘူးဆိုရင် ဒီသံသရာက ဆုံးတော့မှာ မဟုတ်ဘူး”လို့ ပြောပါတယ်။ 

ဒီဆန္ဒပြပွဲကို  “တို့အသက်အတွက် တို့ ချီတက် March for Our Lives (MFOL)” လှုပ်ရှားမှု အဖွဲ့က စီစဉ်တာပါ။ ဒီအဖွဲ့ဟာ ၂၀၁၈ ခုနှစ်တုန်းက ဖလော်ရီဒါပြည်နယ်  ပါခ်လန်းမြို့က အထက်တန်းကျောင်းမှာ သေနတ်ပစ်ခတ်မှုကို ကိုယ်တိုင်ကြုံတွေ့ခဲ့ရပြီး အသက်ရှင်လွတ်မြောက်ခဲ့တဲ့ ကျောင်းသား ကျောင်းသူတွေက ထူထောင်ထားတာ ဖြစ်ပါတယ်။

စနေနေ့ တရက်တည်းမှာ နယူးယော့ခ်၊ လော့စ်အိန်ဂျလိစ်နဲ့ ချီကာဂိုမြို့တွေမှာ ဆန္ဒပြပွဲတွေကို တပြိုင်တည်းပြုလုပ်ဖို့ ဒီအဖွဲ့က စီစဉ်ပါတယ်။ 

၂၀၁၈ ခုနှစ်တုန်းက ပါခ်လန်းအထက်တန်းကျောင်း သေနတ်ပစ်ခတ်မှုမှာ ကျောင်းသား ကျောင်းသူ ၁၇ ယောက် သေဆုံးခဲ့ပြီး နောက်ထပ် ရက်သတ္တပတ်တွေအကြာမှာ ကျောင်းသားကျောင်းသူတွေက ဦးဆောင်ပြီး လူရာပေါင်းများစွာဟာ ကွန်ဂရက်လွှတ်တော်အထိ ချီတက်ပြီး လက်နက်ထိန်းချုပ်ရေး ဥပဒေကို ပြဋ္ဌာန်း တောင်းဆိုခဲ့ပေမယ့် ရီပက်ဘလစ်ကန် အမတ်တွေက ကန့်ကွက်တဲ့အတွက် မအောင်မြင်ခဲ့ပါဘူး။

ချေမှုန်းရေး လက်နက်တွေကို ပိတ်ပင်ဖို့၊ တခြားလက်နက်တွေကိုင်ဆောင်ခွင့်ကိုလည်း စိစစ်ဖို့   ဒီလအစောပိုင်းမှာ ကွန်ဂရက်လွှတ်တော်ကို တိုက်တွန်းထားတဲ့ အမေရိကန်သမ္မတ ဂျိုးဘိုင်ဒင်ကလည်း အခု စနေနေ့ ဆန္ဒပြပွဲတွေကို သူလည်း ထောက်ခံတယ်လို့ ပြောပါတယ်။

တက္ကဆက်ပြည်နယ်ရှိ စာသင်ကျောင်းတခုမှာ ကလေးငယ် ၁၉ ဦးထက်မနည်း သေဆုံးခဲ့ရတဲ့ ပစ်ခတ်မှုကြောင့် စိတ်နှလုံးကြေကွဲခဲ့ရကြောင်း ပုပ်ရဟန်းမင်းကြီး ဖရန်စစ်က ပြောကြားခဲ့ပြီး လက်နက်တွေကို ပိုမိုထိန်းချုပ်ပေးဖို့ တောင်းဆိုလိုက်ပါတယ်။

အမေရိကန်ပြည်ထောင်စုမှာ ဆယ်စုနှစ်အတွင်း အဆိုးရွားဆုံး ကျောင်းပစ်ခတ်မှုအပြီး တရက်အကြာ မေ ၂၅ ရက်မှာ ပုပ်ရဟန်းမင်းကြီးက သူ့ကို အပတ်စဉ်လာရောက် ဂါရဝပြုတဲ့ စိန့်ပီတာရင်ပြင်ရှိ လူထုပရိတ်သတ်တွေကို မိန့်ကြားရာမှာ ထည့်သွင်းပြောဆိုခဲ့တာဖြစ်ပါတယ်။

ပုပ်ရဟန်းမင်းကြီး ဖရန်စစ်က "တက္ကဆက်ပြည်နယ် မူလတန်းကျောင်းမှာ အစုလိုက်အပြုံလိုက် သတ်ဖြတ်ခံရမှုကြောင့် ကျနော် စိတ်ကြေကွဲခဲ့ပါတယ်။ သေဆုံးခဲ့ရတဲ့ ကလေးတွေ၊ လူကြီးတွေနဲ့ သူတို့ရဲ့ မိသားစုတွေအတွက် ဆုတောင်းပေးပါတယ်"လို့ တက္ကဆက်ပြည်နယ် ယူဗဲဒီမြို့က ပစ်ခတ်မှုနဲ့ပတ်သက်ပြီး ပြောကြားခဲ့ပါတယ်။

"သေချာစိစစ်ခြင်းမရှိဘဲ လက်နက်မှောင်ခိုရောင်းဝယ်မှု လုပ်နေတာတွေ တော်လောက်ပါပြီလို့ ပြောရတော့မယ့် အချိန်ပါ။ ဒီလိုအဖြစ်ဆိုးတွေ ထပ်မဖြစ်ရအောင် ကျနော်တို့အားလုံး ကတိကဝတ်ပြုကြစို့" လို့လည်း မိန့်ကြားပါတယ်။

ပုပ်ရဟန်းမင်းကြီး ဖရန်စစ်ဟာ လက်နက်အရောင်းအဝယ်ကို တစိုက်မတ်မတ် ဝေဖန်ခဲ့တာပါ။ လက်နက်ထုတ်လုပ်သူတွေ ဒါမှမဟုတ် လက်နက်လုပ်ငန်းမှာ ရင်းနှီးမြှုပ်နှံသူတွေဟာ သူတို့ကိုယ်ကို ခရစ်ယာန်လို့ ခေါ်ဆိုနေရင် လူကောင်းယောင်ဆောင်သူ ကြောင်သူတော်တွေပဲလို့ ၂၀၁၅ ခုနှစ်တုန်းက ပြောကြားခဲ့ပါတယ်။

အမေရိကန်သမ္မတ ဂျိုးဘိုင်ဒင်ကလည်း ပစ်ခတ်မှုအပြီး နာရီပိုင်းအတွင်းမှာပဲ အိမ်ဖြူတော်မှ မိန့်ခွန်းပြောရာမှာ သိသိသာသာ ထိတ်လန့်တုန်လှုပ်သွားတဲ့ နိုင်ငံရေးအင်အားကြီးမားတဲ့ သေနတ်ကိုင်ဆောင်လိုသူအုပ်စုကို ဆန့်ကျင်ရပ်တည်ပေးကြဖို့ အမေရိကန်တွေကို တိုက်တွန်းလိုက်ပါတယ်။

အဲဒီအုပ်စုဟာ အန္တရာယ်ပိုရှိတဲ့၊ ပိုအားပြင်းတဲ့ သေနတ်တွေရဲ့ အန္တရာယ်ကင်းရှင်းရေး ဥပဒေတွေ ပြဋ္ဌာန်းခြင်းကို တားမြစ်ပိတ်ပင်နေတာကြောင့် သမ္မတဘိုင်ဒင်က အပြစ်တင်ထားတာပါ။