ယူကရိန်းနိုင်ငံရဲ့ အရေးပေါ်ဝန်ဆောင်မှုဌာနဟာ ပြီးခဲ့တဲ့နှစ်က ရှေ့တန်းစစ်မျက်နှာဖြစ်ခဲ့တဲ့ မိုင်ကိုလေ့ဗ်ဒေသ ကျေးလက်မြေမှာ ရုရှားတပ်ဆုတ်ခွာပြီး လပိုင်းအတွင်း မပေါက်ကွဲသေးတဲ့ လက်နက်တွေကို ရှင်းလင်းနေပါတယ်။

၂၀၂၂ နိုဝင်ဘာမှာ ယူကရိန်းရဲ့ တန်ပြန်ထိုးစစ်ဟာ မိုင်ကိုလေ့ဗ်နဲ့ ခါဆွန်ဒေသ အစိတ်အပိုင်းတွေကနေ ရုရှားစစ်တပ်တွေကို မောင်းထုတ်နိုင်ခဲ့ပါတယ်။

ယူကရိန်းတပ်တွေ ပြန်မသိမ်းမီ လပေါင်းများစွာ ရှေ့တန်းဖြစ်ခဲ့တဲ့ ဘလာဟိုဒတ်နေရွာဟာ စစ်ဒဏ်ကို အကြီးအကျယ် ခံခဲ့ရတာပါ။

ရဟတ်ယာဉ်ကနေ ပစ်ခတ်တဲ့ ဒုံးကျည်အကြွင်းအကျန်တွေကို အောင်အောင်မြင်မြင် ထိန်းချုပ် ဖောက်ခွဲအပြီးမှာ ဒီလို လက်နက်တွေကို စစ်စခန်းတွေ၊ ယာဉ်တွေကို ပစ်ခတ်ရာမှာ သုံးခဲ့တယ်လို့ မိုင်းရှင်းရေးအရာရှိ ဗလာဒီဆလဗ် ဟရီးစိန်းက ပြောပါတယ်။

သူ့တပ်ဖွဲ့ မိုင်းရှင်းနေတဲ့ လယ်ကွင်းထဲမှာ ရုရှားတပ်တွေ တပ်စွဲဖူးတယ်လို့လည်း သူက ဆက်ပြောပါတယ်။

ယူကရိန်းနယ်မြေ ၃၀ ရာခိုင်နှုန်းကို ရုရှားက မိုင်းထောင်ခဲ့တယ်လို့ ယူကရိန်းဝန်ကြီးချုပ် ဒဲနစ် ရှင်မ်ဟယ်က ဧပြီနှောင်းပိုင်းမှာ ပြောပါတယ်။

အစိုးရက စိုက်ပျိုးမြေတွေမှာ မိုင်းရှင်းတာကို ဖြစ်နိုင်သမျှ အမြန်ဆုံးလုပ်ဖို့ အာရုံစိုက်ထားတယ်လို့လည်း သူက ပြောပါတယ်။

ဟဲဗီးဝိတ်လက်ဝှေ့ချန်ပီယံဟောင်း ဒွန်တေးဝဲလ်ဒါကို မေလ ၂ ရက် မနက်အစောပိုင်းက ဆေးခြောက်နံ့ရတယ်ဆိုပြီး ကားပေါ်ကဆွဲချကာ ဖုံးကွယ်ထားတဲ့ လက်နက်ရှိတယ်ဆိုပြီး ရဲက ဖမ်းဆီးထောင်ချခဲ့ပါတယ်။

ကမ္ဘာ့ဟဲဗီးဝိတ် ချန်ပီယံဟောင်းဟာ ဒေါ်လာ ၃၅,၀၀၀ တန်စာချုပ် လက်မှတ်မထိုးခင် ဖမ်းဆီးထိန်းသိမ်းထားကြောင်း လော့စ်အိန်ဂျလိစ် ရဲဌာနက အတည်ပြုထားပါတယ်။

၄၆ ကြိမ် ထိုးသတ်ထားပြီး ၄၃ ကြိမ်အနိုင်ရ၊ ၂ ကြိမ်ရှုံးပြီး ၁ ပွဲသရေ စံချိန်ရှိတဲ့ ဝဲလ်ဒါဟာ မေလ ၂ ရက် မနက် ၁ နာရီ ၁၅ မိနစ်မှာ ဟောလိဝုဒ်ဧရိယာတဝိုက်ကို သူရဲ့ Rolls Royce ကားနဲ့ မောင်းနှင်ခဲ့တယ်လို့ TMZ အရ သိရပါတယ်။

ကားထဲမှာ ၉ မမ ပစ္စတိုတလက်ကို တွေ့ရှိခဲ့ပြီးနောက် တာဝန်ရှိသူတွေက ဝဲလ်ဒါကို ဖမ်းဝရမ်းထုတ်ခဲ့ပြီး ဝဲလ်ဒါဟာ လွတ်မြောက်ပြီး နာရီပိုင်းအကြာမှာပဲ “ကျနော် တောင်းပန်တာထက် လုံခြုံချင်တယ်၊ ဒါပါပဲ” လို့ တွစ်တာမှာ မျှဝေခဲ့ပါတယ်။

သူ့မှာ တရားမဝင် နံပါတ်ပြားတခုရှိကြောင်း သိရပြီး သူ့ရဲ့ကားပေါ်မှာ တွေ့ရတဲ့ လက်နက်ကိုလည်း ကိုင်‌ဆောင်ဖို့ လိုင်စင်ရှိမရှိ ရှင်းရှင်းလင်းလင်း မသိရသေးဘူးလို့ ရဲတွေက ပြောခဲ့ပြီး ဝဲလ်ဒါဟာ မေလ ၂၃ ရက်နေ့မှာ LA တရားရုံးကို သွားရောက်ရမှာ ဖြစ်ပါတယ်။

လျှို့ဝှက် အင်တာနက်စာမျက်နှာပေါ်မှာ ဖန်တနောနဲ့ တခြား အန္တရာယ်ရှိတဲ့ ဆေးဝါးတွေ ရောင်းဝယ်ဖောက်ကားမှုကို တားဆီးဖို့ ရည်ရွယ်တဲ့ နိုင်ငံတကာ တရားဥပဒေစိုးမိုးရေး စစ်ဆင်ရေးရဲ့ တစိတ်တပိုင်းအဖြစ် သံသယရှိသူ ၂၈၈ ဦးကို အမေရိကန် တရားရေးဌာနက မေ ၂ ရက်မှာ ကြေညာခဲ့ပါတယ်။

စပက်တာ အော်ပရေးရှင်းလို့ နာမည်ပေးထားတဲ့ ဒီစစ်ဆင်ရေးမှာ ဥပဒေစိုးမိုးရေးအေဂျင်စီ အမြောက်အမြား ပါဝင်ပြီး အမေရိကန်၊ ဥရောပနဲ့ တောင်အမေရိက တလွှားမှာ စီးနင်းခဲ့တာပါ။

လက်နက် ၁၁၇ လက်၊ မူးယစ်ဆေးဝါး ၈၅၀ ကီလိုဂရမ်နဲ့ ငွေသားနဲ့ virtual ငွေကြေး ဒေါ်လာ ၅၃ ဒသမ ၄ သန်းတို့ကို သိမ်းဆည်းရမိခဲ့တယ်လို့ အမေရိကန်ရှေ့နေချုပ် မားရစ်ခ် ဂါးလန်းက ပြောပါတယ်။

ဖမ်းဆီးမှု ၂၈၈ မှုအနက် တရားခံ ၁၅၃ ဦးကို အမေရိကန်မြေပေါ်မှာ ဖမ်းမိထားတယ်လို့ သူက ဆက်ပြောပါတယ်။

လျှို့ဝှက် အင်တာနက်စာမျက်နှာတွေပေါ်မှာရှိတဲ့ ရာဇဝတ်ကောင်တွေအတွက် သတင်းစကားက အင်တာနက်ရဲ့ အဝေးဆုံးအစွန်အဖျားတွေမှာ ပုန်းနေဖို့ ကြိုးစားနိုင်ပေမဲ့ တရားရေးဌာနကတော့ မရမကရှာဖွေပြီး ခင်ဗျားရဲ့ ရာဇဝတ်မှုတွေအတွက် တာဝန်ယူလိမ့်မယ်လို့ ဂါးလန်းက သတင်းစာရှင်းလင်းပွဲမှာ ပြောကြားခဲ့ပါတယ်။