မန်ယူအသင်းကွင်းလယ်လူ လင်ဂတ်ကို ခေါ်ယူဖို့ ဂျူဗင်တပ်၊ ပီအက်စ်ဂျီနဲ့ အေစီမီလန်အသင်းတွေ အပြိုင်ကြိုးပမ်းနေတယ်လို့ သိရပါတယ်။
အသက် ၂၉ နှစ်ရှိ အင်္ဂလန်ကွင်းလယ်လူဟာ ရာသီအကုန်မှာ အသင်းနဲ့ စာချုပ်သက်တမ်း ကုန်ဆုံးမှာဖြစ်ပြီး အလွတ်ပြောင်းရွှေ့ကြေးနဲ့ ခေါ်ယူခွင့်ရမှာပါ။
လင်ဂတ်အနေနဲ့ ၂၀၂၂ ကမ္ဘာ့ဖလားမှာ အင်္ဂလန်အသင်းနဲ့အတူ ပါဝင်ကစားချင်တာကြောင့် ပုံမှန်ပွဲထွက်ခွင့်ရရှိမယ့် အသင်းတသင်းဆီ ပြောင်းရွှေ့လိုနေပါတယ်။
ယူနိုက်တက်ကနေ ထွက်ခွာဖို့ သေချာသွားတဲ့ လင်ဂတ်ကို အီတလီ ထိပ်သီးကလပ်တွေဖြစ်တဲ့ ဂျူဗင်တပ်နဲ့ အေစီမီလန်၊ ပြင်သစ်ထိပ်တန်းကလပ် ပီအက်စ်ဂျီ အသင်းတွေက ခေါ်ယူဖို့ စိတ်ဝင်စားနေတာပါ။
ပရီးမီးယားလိဂ်ကလပ် နယူးကာဆယ်အသင်းကလည်း ခေါ်ယူလိုနေပြီး လင်ဂတ်အနေနဲ့ ရာသီကုန်ဆုံးချိန်မှာ ဆုံးဖြတ်ချက်ချရဖို့ ရှိနေပါတယ်။
လင်ဂတ်ဟာ အသက် ၇ နှစ်ကတည်းက မန်ယူအသင်းမှာ ရောက်ရှိနေတာဖြစ်ပြီး အသင်းနဲ့ ၂၂ နှစ်တာ ကာလအတွင်းမှာ စုစုပေါင်း ၂၃၂ ပွဲမှာ ၃၅ ဂိုး သွင်းယူထားပါတယ်။
တောင်ပံတိုက်စစ်ကစားသမား ဂရင်းဝုဒ်ရဲ့ အမှုကိစ္စကြောင့် ကွင်းလယ်လူ လင်ဂတ်ကို တခြားအသင်းဆီ အငှားမချဖို့ ဆုံးဖြတ်ခဲ့ရတယ်လို့ နည်းပြ ရင်းနစ်ခ်ကပြောပါတယ်။
ဂရင်းဝုဒ်ဟာ အတူနေချစ်သူ အမျိုးသမီးကို မုဒိမ်းမှုနဲ့ ကိုယ်ထိလက်ရောက်ကျူးလွန်မှုတွေကြောင့် ရဲတပ်ဖွဲ့ရဲ့ ဖမ်းဆီးတာခံခဲ့ရပါတယ်။
အဲဒီအချိန်မှာ လင်ဂတ်ကိုခေါ်ယူဖို့ ဝက်စ်ဟမ်းနဲ့ နယူးကာဆယ်အသင်းတွေက ကမ်လှမ်းခဲ့ပေမယ့် ဂရင်းဝုဒ်ရဲ့အခြေအနေကြောင့် အပြောင်းအလဲဖြစ်ခဲ့တယ်လို့ နည်းပြ ရင်းနစ်ခ်ကဝန်ခံခဲ့တာပါ။
“လင်ဂတ်ကို အငှားမချဖြစ်တာက အချက်နှစ်ချက်ရှိပါတယ်။ ပထမတချက်ကတော့ မာဆန်ဂရင်းဝုဒ်ရဲ့ ပြဿနာကြောင့် သူအချိန်အတော်ကြာကစားလို့ မရနိုင်တာကြောင့်ဆိုတာ ရှင်းလင်းပါတယ်။ နောက်တချက်ကတော့ လင်ဂတ်အတွက် တခြားကလပ်အသင်းတွေနဲ့လည်း သဘောတူညီမှုမရတာတွေ ရှိပါတယ်” လို့ နည်းပြ ရင်းနစ်ခ်ကပြောပါတယ်။
မန်ယူအသင်းဟာ အမှုရင်ဆိုင်နေရတဲ့ ဂရင်းဝုဒ်ကို လူစာရင်းကနေ ထုတ်ပယ်ခဲ့သလို သူနဲ့ သက်ဆိုင်တဲ့ ပိုစတာတွေနဲ့ အရောင်းပစ္စည်းတွေကိုလည်း ပြန်လည်ဖြုတ်သိမ်းထားပါတယ်။
ဂရင်းဝုဒ်ဟာ ၃ ရက်ကြာ ဖမ်းဆီးခံခဲ့ရပြီးနောက် ရဲတပ်ဖွဲ့က ပြန်လည်စေလွှတ်ခဲ့ပေမယ့် ယူနိုက်တက်ဘက်က အသင်းကနေ ထုတ်ပယ်ထားဆဲဖြစ်ပြီး အမှုပြီးပြတ်တဲ့ အချိန်ရောက်မှ ပြန် လည်ခေါ်ယူဖို့ရှိနေပါတယ်။
