လိဒ်ယူနိုက်တက်အသင်းဟာ နည်းပြ ဘီယယ်ဆာကို ရာထူးကနေ ထုတ်ပယ်လိုက်ပြီးနောက် လိုက်ဇစ်နည်းပြဟောင်း ဂျက်စီမာ့ရှ်ကို ခန့်အပ်ဖို့စီစဉ်နေပါတယ်။
ပရီးမီးယားလိဂ်ကို တန်းတက်အောင်စွမ်းခဲ့တဲ့ အာဂျင်တီးနားနည်းပြ ဘီယယ်ဆာဟာ နောက်ဆုံး ၆ ပွဲမှာ ၅ ပွဲအထိ ရှုံးနိမ့်ခဲ့ပြီး တန်းဆင်းဇုန်နဲ့ ၂ မှတ်သာကွာတော့တာကြောင့် ရာထူးကနေ ထုတ်ပယ်ဖို့ လိဒ်အသင်းက ဆုံးဖြတ်ခဲ့တာပါ။
အသင်းရဲ့ဘောလုံးကစားပုံကို အပြောင်းအလဲတခုလုပ်ဆောင်ခဲ့ပြီး တန်းတက်အောင်လည်းစွမ်း ဆောင်ပေးခဲ့တဲ့ ဘီယယ်ဆာကို ထုတ်ပယ်ဖို့ ဆုံးဖြတ်ခဲ့ရတာက အလွန်ခက်ခဲပေမယ့် အသင်းရဲ့ အကျိုးအတွက် ကြည့်ပြီးလုပ်ဆောင်ခဲ့ရတာလို့ လိဒ်အသင်းပိုင်ရှင် ရာဒရီဇာနီက ပြောပါတယ်။
ဘီယယ်ဆာဟာ လိဒ်ယူနိုက်တက်ကို ဆွဲဆောင်မှုရှိတဲ့ တိုက်စစ်အသားပေးကစားပုံနဲ့ ကစားစေခဲ့ပြီး ပရိသတ်တွေရဲ့ အားပေးမှုရခဲ့ပေမယ့် ၃ ရာသီကျော် ဖြတ်သန်းခဲ့ပြီးမှာ အသင်းနဲ့ လမ်းခွဲခဲ့ရတာပါ။
လိဒ်အသင်းတာဝန်ရှိသူတွေဟာ ပြီးခဲ့တဲ့နှစ်က ဂျာမန်ကလပ် လိုက်ဇစ်အသင်းနဲ့လမ်းခွဲခဲ့တဲ့ အမေရိကန်နည်းပြ ဂျက်စီမာ့ရှ်ကို ခေါ်ယူဖို့စီစဉ်နေပြီး ရက်ပိုင်းအတွင်းမှာ စာချုပ်ချုပ်ဆိုသွားဖို့ရှိပါတယ်။
လိဒ်ယူနိုက်တက် ပရိသတ်တစ်ဦးဟာ မန်ယူလူငယ်ကစားသမား အီလန်ဂါကို အကြွေစေ့နဲ့ ပစ် ပေါက်ခဲ့တာကြောင့် အရေးယူခံရဖို့ရှိပါတယ်။
၂ ဂိုးစီ သရေကျနေချိန်မှာ မန်ယူကွင်းလယ်လူ ဖရက်ဒ်က တတိယဦးဆောင်ဂိုးသွင်းယူပြီးနောက် အောင်ပွဲခံတဲ့အချိန်မှာ တောင်ဘက်ပွဲကြည့်စင်မှ ပရိသတ်တစ်ဦးက အကြွေစေ့နဲ့ ပစ်ပေါက်ခဲ့တာဖြစ်ပြီး မန်ယူလူငယ်ကစားသမားအီလန်ဂါရဲ့ ဦးခေါင်းကို ထိမှန်ခဲ့တာပါ။
အီလန်ဂါဟာ နာကျင်မှုတချို့ရှိခဲ့လို့ ကွင်းဘေးမှာ ဆေးကုသခဲ့ရပေမယ့် ပွဲကို ပြန်လည်ကစားခဲ့ပြီးနောက် ပွဲချိန် ၈၈ မိနစ်မှာ စတုတ္ထမြောက်အနိုင်ဂိုးသွင်းယူနိုင်ခဲ့ပါတယ်။
ပွဲအပြီးမှာတော့ ကွင်းလယ်ဒိုင်က လိဒ်ပရိသတ်တစ်ဦးကအကြွေစေ့နဲ့ ပစ်ပေါက်ခဲ့တဲ့ဖြစ်ရပ်ကို အင်္ဂလန်အက်ဖ်အေဆီ Match Report တင်ခဲ့တာကြောင့် ဆက်ပြီး စုံစမ်းစစ်ဆေးဖို့ရှိပါတယ်။
မန်ယူနည်းပြရန်းနစ်ခ်ကတော့ လိဒ်အသင်းဘက်က စုံစမ်းစစ်ဆေးမှုတချို့ လုပ်ခဲ့တာတွေ့ရပြီး ဒီလိုဖြစ်ရပ်မျိုးဟာ မဖြစ်သင့်ကြောင်း ပြောပါတယ်။
စကိုင်းစပေါ့ကနေ သုံးသပ်တင်ဆက်ခဲ့တဲ့ ဂိုးသမားဟောင်း ပေါလ်ရော်ဘင်ဆန်ကလည်း အကြွေစေ့နဲ့ ပစ်ပေါက်တဲ့လုပ်ရပ်ဟာ ရုပ်ဆိုး အကျည်းတန်တဲ့ အပြုအမူဖြစ်တယ်လို့ ဝေဖန်သွားခဲ့ပါတယ်။
