အမှုကနေ လွတ်မြောက်ခဲ့တဲ့ ဂရင်းဝုဒ်ကို မန်ယူအသင်းက လေ့ကျင့်ခန်းဆင်းခွင့်မပေးသေးဘူးလို့သိရပါတယ်။
လူငယ်တိုက်စစ်မှူး ဂရင်းဝုဒ်ဟာ ပြီးခဲ့တဲ့ ၂၀၂၂ ခုနှစ် ဇန်နဝါရီလပိုင်းက အမျိုးသမီးတစ်ဦးကို အဓ္ဓမကျင့်ဖို့ကြိုးပမ်းမှု၊ အတင်းအကျပ်ချုပ်ကိုင်မှု၊ ထိခိုက်နာကျင်စေမှုတွေနဲ့ တရားစွဲဆိုခံခဲ့ရတာပါ။
အဲဒီနောက် မန်ယူအသင်းက အသင်းလူစာရင်းကနေထုတ်ပယ်ခဲ့ပြီး ဂရင်းဝုဒ်ဟာလည်း အာမခံနဲ့ တရားရင်ဆိုင်ခဲ့ရတာပါ။
သူဟာ ဖေဖော်ဝါရီ ၂ ရက်နေ့မှာတော့ အဲဒီအမှုတွေ အားလုံးကနေ ကွင်းလုံးကျွတ်လွတ်မြောက်လာခဲ့ပြီး အဓိကသက်သေတွေ နုတ်ထွက်သွားခဲ့တာကြောင့် တာဝန်အရ အမှုကို ရုပ်သိမ်းဖို့ ဆုံးဖြတ်ခဲ့ရကြောင်း မန်ချက်စတာတရားရုံရဲ့ ပြောရေးဆိုခွင့် ရှိသူတစ်ဦးကဆိုပါတယ်။
မန်ယူအသင်းဟာ ဂရင်းဝုဒ်ကို အသင်းလူစာရင်းထဲကို တခါတည်းထည့် သွင်းလေ့ကျင့်စေမှာမဟုတ်ဘဲ ကစားသမားနဲ့ ဦးစွာဆွေးနွေးညှိနှိုင်းမှုတွေလုပ်ဆောင်သွားမှာပါ။ အဲဒီ အစီအစဉ်တွေလုပ်ဆောင်လို့ မပြီးမချင်း နောက်ထပ်အကြောင်းအရာတွေကို ထုတ်ပြန်နိုင်ဦးမှာမဟုတ်ကြောင်း မန်ယူအသင်းက တရားဝင်သတင်းထုတ်ပြန်ထားပါတယ်။
ဘရာဇီးအသင်းဟာ မနေ့ကပြုလုပ်ခဲ့တဲ့လေ့ကျင့်ခန်းအစီအစဉ်မှာ တိုက်စစ်မှူးနေမာ အပါအဝင် ကစားသမား ၅ ဦးလောက် လေ့ကျင့်ခန်းမဆင်းနိုင်ခဲ့ပါဘူး။
ဆားဘီးယားကို ၂ ဂိုး ဂိုးမရှိနဲ့ အနိုင်ရခဲ့တဲ့ အုပ်စုအဖွင့်ပွဲစဉ်မှာ တိုက်စစ်မှူးနေမာနဲ့ နောက်ခံလူ ဒယ်နီလိုတို့ ဒဏ်ရာအသီးသီးရရှိခဲ့ကြတာပါ။ နေမာရဲ့ဒဏ်ရာအခြေအနေက ပြင်းထန်မှုရှိလို့ ရှုံးထွက်အဆင့်ရောက်မှ ပွဲထွက်နိုင်မယ်လို့ဆိုကြပါတယ်။
မနေ့ကပြန်လုပ်ခဲ့တဲ့လေ့ကျင့်ခန်းအစီအစဉ်မှာတော့ တောင်ပံတိုက်စစ်မှူး အန်တိုနီက ဖျားနာနေလို့ မပါဝင်နိုင်ခဲ့သလို ဒယ်နီလို၊ အလစ်ဆန်နဲ့ ပါကေတာ တို့ဟာလည်း ပျက်ကွက်ခဲ့တယ်လို့ The Sun သတင်းမှာဖော်ပြပါတယ်။
ဘရာဇီးအသင်းဟာ တနင်္လာနေ့မှာ ဆွစ်ဇာလန်နဲ့ ကစားသွားရမှာပါ။ နည်းပြတက်တေ အနေနဲ့ နေမာရဲ့နေရာမှာ ရိုဒရိုင်ဂို သို့မဟုတ် ဂါဘရီယယ်ဂျေဇူးကို အစားထိုးအသုံးပြုသွားဖို့ရှိပါတယ်။
