တနင်္သာရီတိုင်း၊ ထားဝယ်ခရိုင်၊ ရေဖြူမြို့ စျေးအနီးမှာ ဇန်နဝါရီ ၄ ရက် လွတ်လပ်ရေးနေ့ အခမ်းအနားအပြီး မနက် ၆ နာရီလောက်မှာ ပေါက်ကွဲခဲ့တယ်လို့ မြို့ခံတွေဆီက သိရပါတယ်။

မြို့ခံတဦးက “ပေါက်သံတချက်ကြားပြီး ရဲစခန်းဘက် ပြန်ပစ်တဲ့အသံ လေးငါးချက်လောက် ကြားရတယ်။ မနက်အစောကြီးရှိသေးတယ်” လို့ ပြောပါတယ်။

အဲဒီပေါက်ကွဲမှုကြောင့် လူထိခိုက်ဒဏ်ရာရတာမျိုး မရှိဘူးလို့ သိရပြီး ဘယ်အဖွဲ့အစည်းက လုပ်ဆောင်ခဲ့တယ် ဆိုတာကိုတော့ မသိရသေးပါဘူး။

စစ်ကောင်စီလက်အောက်ခံ ထွေအုပ်၊ ပြန်ဆက်နဲ့ စစ်တပ်၊ ရဲတွေ ပူးပေါင်းပြီး ရေဖြူမြို့၊ (က) ရပ်ကွက်မှာရှိတဲ့ ထွေအုပ်ရုံး (စုပေါင်းရုံး) နဲ့ လွတ်လပ်ရေးကျောက်တိုင်မှာ ဇန်နဝါရီ ၄ ရက် မနက်က လွတ်လပ်ရေးနေ့ အခမ်းအနား ပြုလုပ်ခဲ့တယ်လို့ မြို့ခံတွေက ပြောပါတယ်။

အာဏာမသိမ်းမီ ၂၀၂၀ ပြည့်နှစ်အထိ ရေဖြူမြို့မှာ လွတ်လပ်ရေးနေ့ ဖိတ်ခေါ်လှေပြိုင်ပွဲ ကျင်းပတာရှိခဲ့ပြီး အာဏာသိမ်းပြီးတဲ့နှစ်တွေမှာတော့ လွတ်လပ်ရေးနေ့ အခမ်းအနားကို စစ်ကောင်စီ ဌာနဆိုင်ရာ ဝန်ထမ်းတွေနဲ့ အကျဉ်းချုံး ပြုလုပ်ခဲ့ပါတယ်။

ရေဖြူမြို့ပေါ်မှာ ပြီးခဲ့တဲ့နှစ်က စစ်ကောင်စီလက်အောက်ခံ  ဌာနဆိုင်ရာရုံး ၃ နေရာထက် မနည်း ဒေသတွင်း ပြည်သူ့ကာကွယ်ရေးတပ်တွေရဲ့ တိုက်ခိုက်တာ ခံခဲ့ရပါတယ်။

တနင်္သာရီတိုင်း၊ ထားဝယ်မြို့၊ ထားဝယ်အကျဥ်းထောင်ကနေ ဇန်နဝါရီ ၄ ရက် နေ့လယ်ပိုင်းက နိုင်ငံရေးအကျဥ်းသားနဲ့ အကျဥ်းသူ စုစုပေါင်း အယောက် ၄၀ ကျော် အပါအဝင် အကျဉ်သား ၉၀ လောက်  ပြန်လွတ်လာတယ်လို့ ထားဝယ် နိုင်/ကျဥ်းဟောင်းတွေထံကနေ သိရပါတယ်။

၇၅ နှစ်ပြည့် လွတ်လပ်ရေးနေ့ အထိမ်းအမှတ်အနေနဲ့ ထားဝယ်အကျဥ်းထောင်ကနေ အကျဥ်းသား အကျဥ်းသူ စုစုပေါင်း ၉၀ ခန့် လွှတ်ပေးတဲ့အထဲ နိုင်ငံရေးအကျဥ်းသား ၃၄ ဦးနဲ့ နိုင်ငံရေးအကျဥ်းသူ ၁၂ ဦး ပါဝင်တာပါ။

အခုပြန်လွတ်လာတဲ့ နိုင်/ကျဥ်းအများစုဟာ ရာဇသတ်ကြီး ဥပဒေပုဒ်မ ၅၀၅(က) တခုတည်းနဲ့ ထောင်ဒဏ်ချမှတ်ခံထားရပြီး ပြစ်ဒဏ်တဝက်လောက်  ကျခံခဲ့ပြီးသူတွေ ဖြစ်ပါတယ်။

ရာဇသတ်ကြီး ဥပဒေပုဒ်မ ၅၀၅(က) အပါအဝင် တခြားအမှုတွေနဲ့ပါ ထောင်ဒဏ်ချမှတ်ခံထားရတဲ့ တခြား နိုင်/ကျဥ်းတချို့ကတော့ ပြစ်ဒဏ်ရဲ့ ခြောက်ပုံတပုံ လွတ်ငြိမ်းချမ်းသာခွင့်ရရှိကြပြီး အကြမ်းဖက်ပုဒ်မတွေနဲ့ ထောင်ချခံထားရသူတွေတော့ မပါဘူးလို့ ထားဝယ်အကျဥ်းထောင်က နိုင်/ကျဥ်းတွေကို ကူညီပေးနေသူတဦးက ပြောပါတယ်။

ဒီကနေ့ ပြန်လွတ်လာတဲ့သူတွေထဲမှာ ထားဝယ်တပ်ပေါင်းစုသပိတ်ကော်မတီဝင် ကိုထူးမြတ်လွင်၊ 7 Day News သတင်းထောက်ဟောင်း ကိုစိုင်းကိုကိုထွန်းနဲ့ ပြီးခဲ့တဲ့ ၂၀၂၁ ခုနှစ် အောက်တိုဘာလအတွင်း ထားဝယ်မြို့ မြို့တွင်းလမ်းက နေအိမ်တခုမှာ ဖမ်းဆီးခံခဲ့ရသူ ၈ ဦးလည်း ပါဝင်ပါတယ်။

ထားဝယ်အကျဥ်းထောင်က နိုင်/ကျဥ်းအများစုဟာ ရာဇသတ်ကြီးဥပဒေပုဒ်မ ၅၀၅(က)၊ ၅၀၅(ခ)၊ အကြမ်းဖက်မှုတိုက်ဖျက်ရေးဥပဒေပုဒ်မတွေဖြစ်တဲ့ ၅၀(ည)၊ ၅၂(က)၊ ပုဒ်မ ၅၄ တို့နဲ့ ထောင်ဒဏ်အသီးသီး ချမှတ်ခံထားရသူတွေပါ။

ထားဝယ်ခရိုင်ထဲမှာ စစ်အာဏာသိမ်းကာလအတွင်း စစ်အာဏာရှင်စနစ်ဆန့်ကျင်ရေး လှုပ်ရှားမှုတွေကြောင့် အဖမ်းခံခဲ့ရသူတွေနဲ့ စွပ်စွဲဖမ်း​ဆီးခံခဲ့ရသူဦးရေ ၆၅၀ ခန့်ရှိပြီး ၂၀၂၁ ခုနှစ် အောက်တိုဘာလထဲမှာ စုစုပေါင်း နိုင်/ကျဥ်း အယောက် ၁၄၀ ခန့် လွတ်ငြိမ်းချမ်းသာခွင့်နဲ့ ထားဝယ်အကျဥ်းထောင်ကနေ ပြန်လွတ်လာခဲ့တဲ့အပြင် လွတ်ရက်စေ့လို့ ပြန်လွတ်လာသူတွေလည်း ရှိပါတယ်။

ထားဝယ်အကျဥ်းထောင်က နိုင်ငံရေးအကျဥ်းသားတွေထဲမှာ ထောင်ဒဏ်တသက်အထိ အမြင့်ဆုံးချမှတ်ခံထားရသူ ၂ ဦးရှိပြီး တတိယအမြင့်ဆုံးကတော့ ထောင်ဒဏ် ၄၈ နှစ်အထိ ချမှတ်ခံထားရတဲ့ ကိုရာဇာထွန်း ဖြစ်ပါတယ်။

ဓာတ်ပုံ - ဇန်နဝါရီ ၄ ရက်နေ့ မနက်ပိုင်း ထားဝယ်အကျဥ်းထောင်အနီး

အများပါဝင်နိုင်တဲ့ ဒီမိုကရေစီနိုင်ငံတစ်နိုင်ငံထူထောင်လိုကြတဲ့ မြန်မာပြည်သူတွေနဲ့အတူ အမေရိကန်နိုင်ငံက တသားတည်း ရပ်တည်သွားမယ်လို့ အမေရိကန်နိုင်ငံခြားရေးဝန်ကြီး အန်တိုနီ​ ဂျေ ဘလင်ကန်က ပြောပါတယ်။

ဇန်နဝါရီ ၄ ရက် ဒီကနေ့ကျရောက်တဲ့ မြန်မာနိုင်ငံရဲ့ ၇၅ နှစ်မြောက် လွတ်လပ်ရေးနေ့အတွက် အမေရိကန်နိုင်ငံခြားရေးဝန်ကြီး အန်တိုနီ​ ဂျေ ဘလင်ကန်က ကြေညာချက်တစောင် ထုတ်ပြန်ရာ မှာ ခုလိုပြောလိုက်တာဖြစ်ပြီး မြန်မာပြည်သူတွေအပေါ်ထားရှိတဲ့ ကတိကဝတ်ကို အမေရိကန် ပြည်ထောင်စုကိုယ်စား ထပ်လောင်းအတည်ပြုကြောင်းလည်း ဖော်ပြထားပါတယ်။

ဒါ့အပြင် မိမိတို့ရဲ့ အနာဂတ်ကို ကိုယ်တိုင်ပုံဖော်လိုကြတဲ့ မြန်မာပြည်သူတွေကို အမေရိကန်ပြည် ထောင်စုက ကာလရှည်ကြာကတည်းက အားပေးထောက်ခံလာခဲ့ကြောင်းနဲ့ အခုအခါ ဒီမိုကရေစီ တိုးတက်ပြောင်းလဲမှုနဲ့ ပြည်သူတွေရဲ့ ဆန္ဒအတွက် မြန်မာစစ်အာဏာရှင်အဖွဲ့အစည်းက အဆီး အတားပြုနေတယ်လို့ ‌ဆိုပါတယ်။

ဒါပေမဲ့စစ်တပ်ရဲ့ ရက်စက်ကြမ်းကြုတ်ပြီး ကြောက်မက်ဖွယ်ကောင်းတဲ့ အကြမ်းဖက်လုပ်ရပ်တွေက အများပါဝင်နိုင်တဲ့ ဒီမိုကရေစီနိုင်ငံတစ်နိုင်ငံထူထောင်လိုကြတဲ့ မြန်မာပြည်သူတွေရဲ့ ပြင်းပြသော ကတိကဝတ်ကို တားဆီးနိုင်ခြင်းမရှိခဲ့ကြောင်းနဲ့ မိမိတို့နိုင်ငံအတွက်​ ဒီမိုကရေစီဆောင်ကြဉ်းဖို့ သံန္နိဋ္ဌာန်ချထားတဲ့ မြန်မာပြည်သူတွေနဲ့အတူ အမေရိကန်နိုင်ငံက တသားတည်း ရပ်တည်သွားမယ်လို့ ဆိုပါတယ်။

စစ်အာဏာရှင်အဖွဲ့အစည်းက သူတို့ရဲ့ အကြမ်းဖက်မှုတွေကို ရပ်တန့်ရမှာဖြစ်ကာ မတရားဖမ်းဆီးထိန်းသိမ်းထားသူတွေကို လွှတ်ပေးဖို့ လူသားချင်းစာနာမှုအကူအညီတွေ အဆီးအတားမရှိ ပေးခွင့်ပြုဖို့နဲ့ မြန်မာနိုင်ငံမှာ စစ်မှန်ပြီးအများပါဝင်နိုင်တဲ့ ဒီမိုကရေစီပေါ်ထွန်းလာစေဖို့ လိုလားတဲ့ ပြည်သူတွေရဲ့ ဆန္ဒကို အသိအမှတ်ပြုရမှာဖြစ်ကြောင်းလည်း ထုတ်ပြန်ချက်ထဲမှာ ဖော်ပြထားပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေး အတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပါတယ်။

နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ်တိုက်ပွဲတွေ တိုင်းဒေသကြီးနဲ့ ပြည်နယ်တွေအနှံ့အပြားပြုလုပ်နေကြသလို ဒေသခံ ပြည်သူ့ကာကွယ်ရေးတပ်တွေ၊ တိုင်းရင်းသား လက်နက်ကိုင်တပ်တွေနဲ့ စစ်ကောင်စီတပ်တွေကြား တိုက်ပွဲတွေ ပြင်းထန်နေပါတယ်။

ဒါ့အပြင် လွတ်လပ်စစ်မှန်တဲ့ ဒီမိုကရေစီတိုက်ပွဲအတွက် မြန်မာပြည်သူလူထုတရပ်လုံးက ပါဝင်နေကြတဲ့ နွေဦးတော်လှန်ရေးဟာ အချိန် ၂ နှစ်နီးပါး ကြာမြင့်လာခဲ့ပြီဖြစ်ကာ ဒီကာလတွေအတွင်း နိုင်ငံရေး မတည် ငြိမ်မှုတွေနဲ့အတူ စီးပွားရေး၊ ကျန်းမာရေး၊ လူမှုရေး၊ ပညာရေးကဏ္ဍတွေ အသီးသီးမှာ အဘက်ဘက်က ကျဆင်းနေခဲ့တာ ဖြစ်ပါတယ်။

အမေရိကန်နိုင်ငံဟာ မြန်မာနဲ့ ယူကရိန်းကို အကူညီပေးဖို့ပါဝင်တဲ့ ၂၀၂၃ ခုနှစ် ဘဏ္ဍာနှစ်အတွက် အမေရိကန်အမျိုးသားကာကွယ်ရေးလုပ်ပိုင်ခွင့်ဥပဒေ (NDAA  2023) ကို  အမေရိကန် သမ္မတ ဂျိုးဘိုင်ဒင်က ပြီးခဲ့တဲ့ ဒီဇင်ဘာ ၂၃ ရက်မှာ လက်မှတ်ရေးထိုးအတည်ပြုထားတာ ဖြစ်ပါတယ်။

၂၀၂၃ NDAA ဥပဒေထဲမှာ မြန်မာနိုင်ငံနဲ့ ပတ်သက်လို့ The Burma Act of 2022 ကို ထည့်သွင်းအတည်ပြုထားပြီး မြန်မာနိုင်ငံဆိုင်ရာ ထောက်ပံ့ငွေပမာဏအနေနဲ့ ၂၀၂၃ ဘဏ္ဍာရေးနှစ်မှာ မြန်မာ့ဒီမိုကရေစီ လှုပ်ရှားမှုအတွက် မနှစ်ကလိုပဲ ဒေါ်လာ ၁၃၆ သန်း ထောက်ပံ့ကူညီမယ်လို့သိရပါတယ်။

ဒီဥပဒေထဲမှာ NUG၊ NUCC၊ CRPH၊ CDM တွေအပြင် PDF တွေနဲ့ တိုင်းရင်းသားလက်နက်ကိုင်တွေကို လက်နက်မဟုတ်တဲ့ တခြားအကူအညီတွေ ပေးဖို့လည်း ပါရှိပါတယ်။

၂၀၂၃ NDAA ဥပဒေကိုလွှတ်တော်က အတည်ပြုလိုက်တာဟာ မြန်မာပြည်သူတွေနဲ့ ဒီမိုကရေစီ၊ လူ့အခွင့်အရေးနဲ့ တရားမျှတ‌မှုရရှိရေးအတွက် စစ်အာဏာရှင်ကို ဆန့်ကျင်တော်လှန်နေကြတဲ့ မဟာမိတ်အဖွဲ့ အစည်းတွေအားလုံးအတွက် အမေရိကန်အစိုးရရဲ့ အားပေးထောက်ခံတဲ့ မူဝါဒကို ရှင်းရှင်းလင်းလင်း ပြသလိုက်တာဖြစ်ပြီး အခက်အခဲတွေကြား ရုန်းကန်နေကြရတဲ့ ပြည်သူတွေအတွက် မျှော်လင့်ချက်နဲ့ အထောက်အပံဖြစ်စေမယ့်အကြောင်း အမျိုးသားညီညွတ်ရေးအစိုးရ (NUG) ယာယီသမ္မတ ဒူဝါလရှီးလက ပြောထားပါတယ်။

ဒီဥပဒေအသက်ဝင်လာတဲ့အခါ မြန်မာပြည်သူတွေအတွက် လူသားချင်းစာနာမှု အကူအညီတွေ၊ EAO တွေနဲ့ PDF တွေအတွက် လက်နက်မဟုတ်တဲ့ အကူအညီတွေနဲ့ နည်းပညာအကူအညီတွေ၊ CDM စစ်မှုထမ်း ဟောင်းတွေ အတွက်အထောက်အပံ့တွေ၊  အသွင်ကူးပြောင်းမှုကာလ တရားစီရင်ရေးယန္တရားအတွက် အကူအညီတွေရစေမှာဖြစ်သလို စစ်တပ်ကို ဖိအားတွေပိုပေးနိုင်ဖို့ လုပ်ဆောင်နိုင်လိမ့်မယ်လို့လည်း သူက ပြောပါတယ်။

Photo-US Embassy

လာမယ့် ၇၅ နှစ်မြောက် လွတ်လပ်ရေးနေ့ ရန်ကုန်မှာကျင်းပမယ့် အားကစားပြိုင်ပွဲတွေကို လူငယ်တွေ ဝင်ရောက်ယှဉ်ပြိုင်လာအောင် စစ်ကောင်စီက ဆုကြေးအများအပြားနဲ့ မက်လုံးပေးဆွဲဆောင်နေတယ်လို့ မြို့ခံအချို့က ပြောပါတယ်။

ရန်ကုန်တိုင်းအတွင်းရှိ မြို့နယ်အချို့မှာ  ဇန်နဝါရီ ၄ ရက်နေ့ လွတ်လပ်ရေးနေ့ အထိမ်းအမှတ်အဖြစ် အားကစားပြိုင်ပွဲတွေ ကျင်းပဖို့ စစ်ကောင်စီက ညွှန်ကြားထားတယ်လို့ အုပ်ချုပ်ရေးနဲ့နီးစပ်သူတဦးက ဒီဗွီဘီကို ပြောပါတယ်။

"မြို့နယ်တိုင်း ရပ်ကွက်တိုင်းမှာ ပျော်ပွဲရွှင်ပွဲတွေ၊ ပြိုင်ပွဲတွေ လုပ်ကိုလုပ်ရမယ် ညွှန်ကြားထားတယ်။ အပြေးပြိုင်ပွဲတွေ၊ ဘောလုံးပြိုင်ပွဲတွေ ရပ်ကွက်အားကစားပွဲတွေ လုပ်ဖို့ ညွှန်ကြားထားတာ။ ရပ်ကွက် အများစုကတော့ လုပ်ဖို့ရှိတယ်။" 

မြို့နယ်အချို့ ရပ်ကွက်တွေမှာတော့ အားကစားပြိုင်ပွဲကို လူငယ်တွေ ဝင်ရောက်ယှဉ်ပြိုင်လာချင်အောင် ဆုကြေးငွေ အများအပြားပေးကာ ဆွဲဆောင် ခေါ်ယူတာတွေလည်း ရှိတယ်လို့ မြောက်ဥက္ကလာပမြို့ခံလူငယ်တဦးက ဒီဗွီဘီကို ပြောပါတယ်။

"ကျနော်တို့မြို့နယ်မှာလည်း လုပ်မဲ့သူတွေရှိတယ်။ ဆုငွေ ငါးသိန်း၊ ဆယ်သိန်းအထိရှိတယ်။ အားကစားနည်းကတော့ အမျိုးမျိုး၊ ဒါပေမဲ့ ရပ်ကွက်က ဦးဆောင်ပြီး လုပ်တဲ့ပွဲတော့ ဘယ်သူမှ သွားမကစားဘူး။" 

တောင်ဒဂုံမြို့နယ်မှာတော့ အရင်နှစ်တွေထက် စစ်ကောင်စီက ၇၅ နှစ်မြောက် လွတ်လပ်ရေးနေ့ကို ပိုမိုစည်ကားအောင် ရပ်ကွက်တွေမှာ ဆုကြေးငွေ သိန်းနဲ့ချီကာ ပေးမယ်ဆိုပြီး လူငယ်တွေကို စည်းရုံးနေတယ်လို့ မြို့ခံလူငယ်တဦးက ပြောပါတယ်။

"ဒီနှစ် ကျနော်ရပ်ကွက်မှာ အပြေးပြိုင်ပွဲ ဝင်ပြိုင်မဲ့သူမရှိဘူး။ နောက်ထပ် စစ်တပ်က မက်လုံးပေးလိုက်တယ် ဆုရရင် သုံးသိန်း၊ နှစ်သိန်းအဲ့လို ပေးမှာဆိုပြီး အသံထွက်လာတယ်။ အဲ့ဒီအခါမှာ မရှိတဲ့သူကတော့ ဝင်ပြိုင်မှာပဲ၊ အားကစားစိတ်ဓာတ်မဟုတ်ဘူး ပိုက်ဆံရဖို့။" 

စမ်းချောင်းမြို့နယ်ရှိ ရပ်ကွက်အချို့မှာ ပြီးခဲ့တဲ့ရက်ပိုင်းအတွင်းက လွတ်လပ်ရေးနေ့မှာ ပျော်ပွဲရွှင်ပွဲ မလုပ်ဘူးလို့ ဆိုင်းဘုတ်ချိတ်ဆွဲထားတာတွေရှိတယ်လို့ မြို့ခံတဦးက ဒီဗွီဘီကို ပြောပါတယ်။

စစ်ကောင်စီကလည်း ၇၅ နှစ်မြောက်ကျရောက်တဲ့ လွတ်လပ်ရေးနေ့ စိန်ရတုအခမ်းအနားကို နေပြည်တော်မှာ စည်ကားသိုက်မြိုက်စွာ ကျင်းပနိုင်ဖို့ စီစဥ်ထားတာလည်းရှိပါတယ်။

အဲ့ဒီနေ့မှာတော့ နေပြည်တော် ဗိုလ်ရှုသဘင်မှာ  အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ဟာ ၇၅ နှစ်မြောက်  စိန်ရတု လွတ်လပ်ရေးနေ့အခမ်းအနားအတွက် အလေးပြုခံမှာဖြစ်ပါတယ်။

ရခိုင်ပြည်နယ်၊ ကျောက်ဖြူမြို့မှာ ဇန်နဝါရီ ၄ ရက် လွတ်လပ်ရေးနေ့ကျရင် လက်နက်ကိုင်အဖွဲအစည်းတွေအနေနဲ့ စစ်ဆေးမှုတစုံတရာ ခံယူစရာမလိုဘဲ လွတ်လပ်စွာ ဝင်ထွက်သွားလာနိုင်တယ်လို့ ကျောက်ဖြူမြို့အထွေထွေအုပ်ချုပ်ရေးကပြောထားတယ်လို့ ကျောက်ဖြူဒေသခံတွေထံက သိရပါတယ်။

ဒီဇင်ဘာ ၃၁ ရက် မနက်က ကျောက်ဖြူ အထွေထွေအုပ်ချုပ်ရေးမှူးရုံးမှာ ကျင်းပတဲ့ အစည်းအဝေးမှာ ကျောက်ဖြူအထွေထွေအုပ်ချုပ်ရေးမှူး ဦးမျိုးမင်းထွဋ် က အခုလို အသိပေး ပြောကြားခဲ့တာလို့ ဆိုပါတယ်။

ကျောက်ဖြူဒေသခံတဦးက "လာမယ့် ဇန်နဝါရီ ၃ ရက်နဲ့ ၄ ရက် လွတ်လပ်ရေးနေ့အတွက် Show ပွဲတွေရှိတယ်။ ကစားပြိုင်ပွဲတွေရှိတယ်။ အဲဒီပွဲတွေကို ရခိုင်လက်နက်အဖွဲတွေ လွတ်လပ်စွာလာရောက်ကြည့်ရှု အားပေးနိုင်တယ်။ အစစ်အဆေးတွေရပ်နားထားမယ်လို့ ပြောဆိုထားတယ်”လို့ ပြောပါတယ်။

ဇန်နဝါရီ ၄ ရက် ၇၅ နှစ်မြောက် လွတ်လပ်ရေးနေ့အတွက် ကျောက်ဖြူမြို့မှာ အားကစားမျိုးစုံပြိုင်ပွဲတွေအပြင်  နာမည်ကြီးအဆိုတော်တွေပါဝင်တဲ့ စင်တင်တေးဂီတဖျော်ဖြေပွဲတွေ စည်စည်ကားကားကျင်းပဖို့ စစ်ကောင်စီက စီစဉ်နေတာ ဖြစ်ပါတယ်။

ကျောက်ဖြူမြို့ရှိ ကျောက်တစ်လုံးဘုရား စစ်ဆေးရေးဂိတ်မှာ စစ်ဆေးမှုတွေကို ဇန်နဝါရီ ၃ ရက်နဲ့ ၄ ရက်နေ့တွေမှာ  ရပ်တန့်ထားမယ်လို့လည်း ကျောက်ဖြူအုပ်ချုပ်ရေးတာဝန်ရှိသူက ပြောထားပါတယ်။

ကျောက်ဖြူမြို့ခံတဦးက "အဓိက ကတော သူတို့ပြုလုပ်တဲ့ပွဲ အထူးစည်ကားစေချင်တာပေါ့ဗျာ။ အစစ်အဆေးတွေရှိနေရင် နယ်ကလူတွေအလာနည်းမယ်။ အခုလိုအစစ်ဆေးတွေ ၂ ရက် ရပ်တန့်ပြီး  ရခိုင်လက်နက်ကိုင်အဖွဲ့တွေပါ လာရောက်နိုင်တယ်လို့ပြောတာပါ”လို့ ပြောပါတယ်။

ဇန်နဝါရီလ ၁ ရက်ကလည်း  ကျောက်ဖြူမြို့ မြို့မအားကစားကွင်းမှာ ရပ်ကွက်ပေါင်းစုံ ဘောလုံးပွဲကို ဘောလုံးကွင်းပတ်လည်မှာ စစ်ကောင်စီတပ်သားတွေက လုံခြုံရေးရယူထားပြီး ကျင်းပခဲ့ပါတယ်။

၇၅ နှစ်မြောက် လွတ်လပ်ရေးနေ့အတွက်  စစ်တွေ၊ တောင်ကုတ်၊ သံတွဲ၊ ဂွ အပါအဝင်  ရခိုင်ပြည်နယ်ရှိ တခြားမြို့နယ်တွေမှာလည်း အားကစားပြိုင်ပွဲတွေနဲ့ ပျော်ပွဲရွှင်ပွဲတွေကျင်းပဖို့ စစ်ကောင်စီက ပြင်ဆင်နေပါတယ်။