အမေရိကန်နိုင်ငံ နယူးယောက်တက္ကသိုလ်က ခွဲစိတ်ဆရာဝန်တွေဟာ မျိုးဗီဇ ပြုပြင်ပြောင်းလဲထားတဲ့ ဝက်ရဲ့နှလုံးတွေကို ဦးနှောက်သေနေတဲ့ လူ ၂ ယောက်ဆီမှာ အောင်အောင်မြင်မြင် အစားထိုး ခွဲစိတ်တပ်ဆင်နိုင်ခဲ့တယ်လို့ သုတေသီတွေကို ကိုးကားပြီး ရိုက်တာသတင်းဌာနက ဇူလိုင် ၁၃ ရက်မှာ ဖော်ြပပါတယ်။

အစားထိုးခွဲစိတ်ကုသဖို့ လူ့ကိုယ်တွင်း ကလီစာတွေ ရှားပါးပြတ်လပ်နေချိန်မှာ ဝက်ရဲ့ အစိတ်အပိုင်းတွေကို သုံးနိုင်မယ့် ရေရှည်ပန်းတိုင်အတွက် ခြေတလှမ်း ပိုနီးလာပြီလို့လည်း သုတေသီတွေက ပြောပါတယ်။

ဇွန်နဲ့ ဇူလိုင်လတွေမှာ သုံးရက်ကြာ စမ်းသပ်မှုအတွင်း နှလုံးတွေက ပုံမှန်အလုပ်လုပ်နေပြီး ဇီဝဖြစ်စဉ်က ငြင်းပယ်တဲ့လက္ခဏာ မရှိဘူးလို့ သူတို့က သတင်းစာရှင်းလင်းပွဲမှာ ပြောပါတယ်။

မတ်လမှာ အသက် ၅၇ နှစ်အရွယ် အမျိုးသားတယောက် နှလုံးရောဂါနဲ့ သေဆုံးအပြီး ခုလို စမ်းသပ်ခဲ့တာပါ။ ဒီလူဟာ မျိုးဗီဇပြုပြင်ထားတဲ့ ဝက်နှလုံးကို အစားထိုးကုသခံတဲ့ ပထမဆုံးလူသားအဖြစ် မေရီလန်းတက္ကသိုလ်မှာ ဇန်နဝါရီလက သမိုင်းဝင်ထားသူပါ။ 

သူ့ရဲ့နှလုံး ဘာလို့ နောက်ဆုံးမှာ သေသွားလဲဆိုတဲ့ အကြောင်းရင်းကို ခုထိ ရှင်းရှင်းလင်းလင်း မသိရသေးပါဘူး။ ဒါပေမဲ့ သူ့ရဲ့သွေးထဲမှာ ဝက်ရဲ့ ဗိုင်းရပ်စ်တမျိုးကို ထောက်လှမ်းတွေ့ရှိခဲ့လို့ သူသေဆုံးရတဲ့အကြောင်းရင်း ဖြစ်ကောင်းဖြစ်နိုင်တယ်လို့ သတ်မှတ်ထားကြပါတယ်။

အသစ်ထပ်မံစမ်းသပ်တဲ့ ဝက်နှလုံးတွေကိုတော့ နယူးယောက်တက္ကသိုလ်က ရေဗစ်ဗစ်ကော နိုင်ငံတကာ ကော်ပိုရေးရှင်းက မျိုးဗီဇ ပြုပြင်ထားတာပါ။

အဆင့်မြင့် စောင့်ကြည့်ရေးလုပ်ငန်းစဉ်ကို သုံးပြီး ဗိုင်းရပ်စ်ကို စစ်ဆေးထားတယ်လို့ သုတေသီတွေက ပြောပါတယ်။ အသစ်တပ်ဆင်တဲ့ နှလုံးတွေမှာတော့ ဗိုင်းရပ်စ်ရှိကြောင်း သက်သေမပြနေဘူးလို့ ဆိုပါတယ်။

နှလုံးရောဂါ ကုသလို့မရအောင် လမ်းဆုံးနေတဲ့ အမေရိကန်အမျိုးသားတဦးကို မျိုးဗီဇပြုပြင်ထားတဲ့ ဝက်ရဲ့နှလုံးနဲ့ ပထမဆုံး အစားထိုးကုသခဲ့ပြီး၊ သုံးရက်အကြာမှာ လူနာဟာ ပုံမှန်ကောင်းမွန်နေပြီလို့ မေရီလန်းဆေးတက္ကသိုလ်ဆေးရုံက သတင်းထုတ်ပြန်ခဲ့ပါတယ်။

ဆေးတက္ကသိုလ် ဆရာဝန်အဖွဲ့ရဲ့ ခွဲစိတ်မှုက ဝက်ကနေ လူကို နှလုံးအစားထိုးမှု ပထမဆုံးထုတ်ဖော်ပြသမှုပါ။ မျိုးဗီဇပြုပြင်ထားတဲ့အရာတွေနဲ့ အစားထိုးကုသမှုနယ်ပယ်အတွက် ဖြစ်နိုင်ခြေအလားအလာတွေ အများကြီး ဖြစ်ပေါ်စေပါတယ်။

ဒေါက်တာ ဘတ်လေဂရစ်ဖ်က “ကျနော်တို့ အရင်တခါမှ လူတွေကို မလုပ်ဖူးပါဘူး၊ အခုလူနာကို တခြား ကုထုံးနည်းလမ်းမရှိတဲ့အတွက် ဒီနည်းကို အကောင်းဆုံးအဖြစ် ရွေးချယ်ခဲ့တာပါ။ သူ ဘယ်လောက်ခံမလဲ၊ တရက်လား၊ တပတ်လား၊ တလလား၊ တနှစ်လား ဘာမှ ကျနော်တို့ မပြောနိုင်ပါဘူး” လို့ ပြောပါတယ်။

နှလုံးအစားထိုးမှုခံရတဲ့လူနာ အသက် ၅၇ နှစ်ရှိ ဒေးဗစ် ဘန်းနက်က သူ့အတွက် နောက်ဆုံးရွေးချယ်မှုပါပဲလို့ ခွဲစိတ်ခန်းမဝင်မီမှာ ပြောခဲ့ပါတယ်။

“သေမလား ဒါမှမဟုတ် အဲဒီအစားထိုးမှုယူမလား၊ ကျနော့်အခြေအနေက အမှောင်ထဲမှာပါ၊ ကျနော် အသက်ရှင်ချင်ပါတယ်၊ ဒါဟာ နောက်ဆုံးရွေးချယ်မှုပါ။”

အခု အစားထိုးကုသစမ်းသပ်မှုအတွက် မေရီလန်းဆေးတက္ကသိုလ်က အမေရိကန် အစားအစာနဲ့ ဆေးဝါးဌာန (FDA) ဆီက ခွင့်ပြုချက်ယူခဲ့ရပါတယ်။

လက်ရှိ အမေရိကန်နိုင်ငံမှာ ကိုယ်တွင်းအင်္ဂါ အစားထိုးကုသနိုင်ဖို့ စောင့်ဆိုင်းနေသူ ၁၁၀,၀၀၀ ဦး ရှိပြီး ကိုယ်တွင်းအင်္ဂါအလှူရှင် ပေါ်ထွက်မလာခင် တနှစ်ကို ၆၀၀၀ ကျော် သေဆုံးကြပါတယ်။ အခု စမ်းသပ်မှုသာ အောင်မြင်ခဲ့ပါက ကုသရေးမှာ ကိုယ်တွင်းအင်္ဂါအစားထိုးမှု ရှားပါးတဲ့ပြဿနာကို ဝက်အင်္ဂါတွေနဲ့ အစားထိုး ဖြေရှင်းပေးတော့မှာ ဖြစ်ပါတယ်။

အရင်က ဝက်ရဲ့အတွင်းကိုယ်အင်္ဂါ လူကို အစားထိုးကုသမှုတွေ မအောင်မြင်ခဲ့ပါဘူး။ အကြောင်းကတော့ လူနဲ့ ဝက်ရဲ့ မျိုးဗီဇကွဲပြားမှုနဲ့ ရောဂါပိုးဖြစ်စေတဲ့ ဗိုင်းရပ်စ်တွေကို ရှင်းမထုတ်နိုင်ခဲ့တာကြောင့်ပါ။ 

အခု သိပ္ပံပညာရှင်တွေက အန္တရာယ်ဖြစ်စေမယ့် မျိုးဗီဇပိုင်းတွေကို ဖယ်ထုတ်နိုင်ခဲ့ပါပြီ။ မစ္စတာ ဘန်းနက်ကို ခွဲစိတ်မှုမှာ လူ့ခန္ဓာကိုယ်က လက်မခံနိုင်တဲ့ ဝက်ရဲ့မျိုးဗီဇသုံးခုကို ဖယ်ထုတ်ခဲ့ပြီး၊ ကိုယ်ခံအားစနစ်က လက်ခံနိုင်တဲ့ လူ့သားမျိုးဗီဇခြောက်ခုကို ဝက်ရဲ့ မျိုးဗီဇ  genome ထဲ ထိုးသွင်းပြီး အစားထိုးကုသခဲ့တာပါ။