ရုရှားအပေါ် ဖိအားတွေတိုးလာစေမယ့် နည်းလမ်းအဖြစ် ဗြိတိန်က ရုရှားကြေးစားစစ်တပ် ဝဂ္ဂနာအဖွဲ့ကို အကြမ်းဖက်အဖွဲ့အဖြစ် တရားဝင်သတ်မှတ်လိုက်ပြီလို့ သတိုင်းမ်စ် သတင်းစာက မေ ၉ ရက်မှာ ဖော်ပြလိုက်ပါတယ်။

ဝဂ္ဂနာ ကြေးစားစစ်သားတွေဟာ ယူကရိန်းနိုင်ငံ ဘတ်ခ်မွတ်မြို့ကို လအတော်ကြာကြာ ချေမှုန်းရာမှာ ရုရှားကို ဦးဆောင်မှုပေးခဲ့ပါတယ်။

ရုံးက ဒီအမှုတွဲကို နှစ်လကြာ အမှုတည်ဆောက်ခဲ့ပြီး သီတင်းပတ်တွေအတွင်း တားမြစ်ပိတ်ပင်လိုက်တာလို့ အစိုးရသတင်းရင်းမြစ်ကို ကိုးကားပြီး သတင်းစာက ဖော်ပြခဲ့ပါတယ်။ ဗြိတိန်အစိုးရက သူ့အစီအစဉ်တွေနဲ့ ပတ်သက်လို့ မှတ်ချက်ပေးဖို့ ငြင်းဆိုခဲ့ပါတယ်။

“ဗြိတိန်ဟာ ဝဂ္ဂနာကို ၂၀၂၂ မတ်လကစပြီး ဒဏ်ခတ်ပိတ်ဆို့ခဲ့တယ်၊ တရားဝင် တားမြစ်ပိတ်ပင်တဲ့ အဖွဲ့အစည်းတွေရဲ့ စာရင်းကို အစိုးရက ပြန်လှန်သုံးသပ်ခဲ့တယ်၊ တရားဝင် တားမြစ်ပိတ်ပင်မလား မပိတ်ပင်ဘူးလားဆိုတာ စဉ်းစားပြီးတဲ့ အဖွဲ့အစည်းနဲ့ ပတ်သက်လို့ ကျနော်တို့က မှတ်ချက်မပေးဘူး” လို့ ဗြိတိန်အစိုးရ ပြောခွင့်ရက ပြောပါတယ်။

တရားဝင် တားမြစ်ပိတ်ပင်ချက်ရဲ့ အဓိပ္ပာယ်က အုပ်စုအမှတ်တံဆိပ်ကို လူသိထင်ရှား ကိုင်ဆောင်ရင်၊ အစည်းအဝေးတွေ စီစဉ် မိန့်ခွန်းပြောရင်၊ အုပ်စုကို လူသိများအောင်လုပ်ရင် အဖွဲ့ဝင်ဖြစ်ခဲ့ရင် ရာဇဝတ်မှု မြောက်ပါတယ်။

ယူကရိန်းစစ်ပွဲ စတည်းက ဝဂ္ဂနာအုပ်စုနဲ့ အုပ်စုဝင် တယောက်ချင်းတို့က ဗြိတိန်နိုင်ငံထဲမှာ စစ်ဆင်ရေးလုပ်ခဲ့တဲ့ သက်သေတော့ မရှိသေးဘူးလို့ အစီရင်ခံစာက ဆိုပါတယ်။

ဒါပေမဲ့ ရုရှားသမ္မတ ဗလာဒီမာ ပူတင်ရဲ့ မဟာမိတ်တွေနဲ့ ရုရှား သူကြွယ်ကြီးတွေအပေါ် ဘဏ္ဍာရေးပိတ်ဆို့ဒဏ်ခတ်အပြီး ဗြိတိန်နိုင်ငံထဲက ငွေတွေကို ထုတ်ယူရာမှာ ဝဂ္ဂနာအုပ်စုက ကူညီခဲ့တယ်ဆိုတဲ့ သံသယတော့ ရှိတယ်လို့ အစိုးရ သတင်းရင်းမြစ်ကို ကိုးကားပြီး သတင်းစာက ဖော်ပြခဲ့ပါတယ်။

တတိယကမ္ဘာစစ်ကြီး နီးလာပြီလို့ ရုရှားပုဂ္ဂလိက စစ်ဘက်ဆိုင်ရာကုမ္ပဏီ ဝဂ္ဂနာအုပ်စုကို တည်ထောင်သူ ယက်ဗ်ဂျေညီ ပရီဂေါ့ရှင်က ဧပြီ ၂၅ ရက်မှာထုတ်ပြန်တဲ့ ဗွီဒီယိုကနေ သတိပေးပြောပါတယ်။

ရုရှားနိုင်ငံ လုံခြုံရေးကောင်စီရဲ့ လက်ရှိ လက်ထောက်အကြီးအကဲနဲ့ ရုရှားသမ္မတဟောင်း ဒီမီထရီ မက်ဗီဒက်က အင်္ဂါနေ့ကကျင်းပတဲ့ လူငယ်ဖိုရမ်မှာ ပြောခဲ့တဲ့ အလားတူ သတိပေးချက်ကို ပရီဂေါ့ရှင်က ပဲ့တင်ထပ် ပြောဆိုလိုက်တာပါ။

ပရီဂေါ့ရှင်က အမျိုးသားတွေကို ဝဂ္ဂနာအုပ်စုမှာပါဖို့ တိုက်တွန်းခဲ့ပြီး သူ့အဖွဲ့ဝင်တွေဟာ မနေ့က သာမန်ယောက်ျားလေးတွေသာ ဖြစ်ကြပြီး ခုတော့ နိုင်ငံကို ကာကွယ်နေပြီလို့ ပြောပါတယ်။

ဝဂ္ဂနာအုပ်စုနဲ့ ပုံမှန် ရုရှားတပ်ဖွဲ့တွေဟာ ယူကရိန်းတပ်တွေ ခေါင်းမာမာနဲ့ ခုခံနေတဲ့ ဘတ်မွတ်မြို့ကို သိမ်းပိုက်ဖို့ ကြိုးပမ်းရင်း အဆုံးအရှုံးတွေ အကြီးအကျယ် ကြုံတွေ့နေရလို့ ဝဂ္ဂနာခေါင်းဆောင်ဟာ ဝန်ထမ်းအသစ်တွေ စုဆောင်းနေရတာပါ။

ဘတ်မွတ်မြို့တိုက်ပွဲဟာ ပြီးခဲ့တဲ့ သြဂုတ်လကတည်းက ပြင်းထန်ခဲ့ပြီး ဒုတိယကမ္ဘာစစ်အတွင်း စတာလင်ဂရက်ဒ်တိုက်ပွဲထက် လပေါင်းများစွာ ကြာခဲ့ပါပြီ။

ပရီဂေါ့ရှင်ဟာ ရုရှား ကာကွယ်ရေးဝန်ကြီးဌာနနဲ့ လက်နက်ကိုင်တပ်ဖွဲ့တွေရဲ့ ထိပ်တန်းအရာရှိတွေနဲ့ အဆင်မပြေဖြစ်နေပုံရပြီး ခဲယမ်းမီးကျောက်တွေ ပံ့ပိုးပေးဖို့ ပျက်ကွက်တယ်လို့ စွပ်စွဲထားပါတယ်။