သီရိလင်္ကာသမ္မတသစ်က ဝါရင့်လွှတ်တော်အမတ် ဒင်းနစ် ဂန်နာဝါဒီနကို ဝန်ကြီးချုပ်အဖြစ် ခန့်အပ်ဖို့ ရှိပါတယ်။
ဇူလိုင် ၂၁ ရက်က ကျမ်းသစ္စာ ကျိန်ဆိုခဲ့တဲ့ သမ္မတ ရာနေးလ်ဝစ်ကရာမန်ဆင်းဂ်က ဇူလိုင် ၂၂ ရက် အစိုးရအစည်းအဝေးမှာ ဝါရင့်နိုင်ငံရေးသမား ဂန်နာဝါဒီနာကို ဝန်ကြီးချုပ်အဖြစ် ခန့်အပ်မယ်လို့ နိုင်ငံရေး သတင်းအရင်းအမြစ်တွေကို ကိုးကားပြီး ရိုက်တာသတင်းက ရေးပါတယ်။
ဂန်နာဝါဒီနာဟာ သီရိလင်္ကာမှာ ထင်ရှားတဲ့ နိုင်ငံရေးမျိုးရိုးကနေ ဆင်းသက်လာသူ ဖြစ်ပြီး နိုင်ငံခြားရေး ဝန်ကြီးအဖြစ်လည်း တာဝန်ထမ်းဆောင်ခဲ့ဖူးသူပါ။
အသက် ၇၃ နှစ်အရွယ် ဂန်နာဝါဒီနာဟာ သိရီလင်္ကာလွတ်လပ်ရေးတိုက်ပွဲမှာ ခေါင်းဆောင် တယောက်ဖြစ်တဲ့ ဖိလစ်ဂန်နာဝါဒီနာရဲ့ သားဖြစ်ပြီး ၁၉၈၃ ခုနှစ်မှာ လွှတ်တော်အမတ် တယောက်အနေနဲ့ နိုင်ငံရေးထဲ ဝင်ရောက်လာခဲ့ပါတယ်။
သီရိလင်္ကာနိုင်ငံရေးမှာ သူဟာ အရေးကြီးတာဝန်တွေ၊ အရေးကြီးဝန်ကြီးဌာနတွေမှာ တာဝန် ထမ်းဆောင်ခဲ့တဲ့ အတွေ့အကြုံရှိခဲ့ပြီး လက်ရှိလည်း သီရိလင်္ကာ လွှတ်တော်ရုံးရဲ့ အကြီးအကဲ လည်း ဖြစ်ပါတယ်။
သီရိလင်္ကာနိုင်ငံမှာ စီးပွားရေးအကျပ်အတည်း ပိုဆိုးလာနေပြီး လာမယ့်လတွေမှာ အဆိုးဆုံးနေ့တွေ လာဦးမယ်လို့ ဝန်ကြီးချုပ်သစ်က မေ ၁၆ ရက်မှာ သတိပေးလိုက်ပါတယ်။
မရှိမဖြစ် သွင်းကုန်တွေအတွက် လာမယ့် ရက်အနည်းငယ်အတွင်း နိုင်ငံခြားငွေ အမေရိကန်ဒေါ်လာ ၇၅ သန်း အရေးပေါ် လိုအပ်နေချိန်မှာ ခုလို မိန့်ခွန်းပြောလိုက်တာပါ။
“လာမယ့် ၂ လဟာ ကျနော်တို့ဘဝမှာ အခက်ခဲဆုံး ၂ လ ဖြစ်လာလိမ့်မယ်။ ကျနော်တို့ဟာ ဒီကာလအတွင်း စိန်ခေါ်မှုတချို့ကို ရင်ဆိုင်ရင်း တချို့စွန့်လွှတ်မှုတွေအတွက် ပြင်ဆင်ထားရမယ်။”
အကျပ်အတည်းတွေကြောင့် သမ္မတ ဂိုတာဘာယာ ရာဂျာပတ်စာနဲ့ သူ့မိသားစုဝင်တွေ ပါဝင်ဖွဲ့စည်းထားတဲ့ အစိုးရကို ဆန့်ကျင်တဲ့ ဆန္ဒပြပွဲတွေ ကျယ်ကျယ်ပြန့်ပြန့် ဖြစ်ပွားခဲ့ပါတယ်။
အရင်အပတ်က အစိုးရထောက်ခံသူတွေနဲ့ ဆန္ဒပြသူတွေကြား တိုက်ခိုက်ခဲ့ကြလို့ လူ ၉ ယောက် သေဆုံးပြီး အယောက် ၃၀၀ လောက် ဒဏ်ရာရခဲ့ပါတယ်။
ဒါကြောင့် သမ္မတရဲ့အစ်ကို ဝန်ကြီးချုပ် မဟင်ဒြာ ရာဂျာပတ်စာ ရာထူးက နုတ်ထွက်ခဲ့ရပြီး ဆန္ဒပြသူတွေ ကျေအေးစေဖို့ သူ့နေရာမှာ ဝန်ကြီးချုပ်အဖြစ် ငါးကြိမ် တာဝန်ထမ်းဆောင်ဖူးသူ အတိုက်အခံ လွှတ်တော်အမတ် ဗစ်ခရမ်ဆင်းဟေးကို အစားထိုး ခန့်အပ်ခဲ့ရပါတယ်။
ဒါပေမဲ့ ဆန္ဒပြသူတွေကတော့ သမ္မတ ဂိုတာဘာယာ ရာဂျာပတ်စာ သမ္မတအဖြစ် ရှိနေသရွေ့ ဆက်ပြီး ဆန္ဒပြနေဦးမယ်လို့ ပြောခဲ့ကြပါတယ်။
