လီဗာပူးတိုက်စစ်မှူး မိုဆာလာဟာ မန်ယူအသင်းကို အနိုင်ရတဲ့ပွဲစဉ်မှာ ၂ ဂိုးသွင်းခဲ့ပြီးနောက် အသင်းရဲ့ သမိုင်းတလျှောက် လိဂ်ပြိုင်ပွဲ သွင်းဂိုးအများဆုံးကစားသမား ဖြစ်လာခဲ့ပါတယ်။ 

လီဗာပူးက မန်ယူ အသင်းကို ၇ ဂိုး ဂိုးမရှိနဲ့ အနိုင်ရခဲ့တာဖြစ်ပြီး ဆာလာက ပရီးမီးယားလိဂ်သွင်းဂိုး ၁၂၈ ဂိုးမြောက် နဲ့ ၁၂၉ ဂိုးမြောက် ဂိုးတွေသွင်းယူနိုင်ခဲ့တာပါ။ 

ဒီအရေအတွက်ဟာ လီဗာပူးဂန္ထဝင် ရော်ဘီဖောင်လာရဲ့ ၁၂၈ ဂိုးစံချိန်ကို ကျော်ဖြတ်နိုင်ခဲ့တာပါ။

လီဗာပူးအသင်းကို စတင်ရောက်ရှိချိန်ကတည်းက အဲဒီလို ဂိုးသွင်းစံချိန်တွေကို ဖြတ်ကျော်နိုင်ဖို့ စိတ်ကူးခဲ့ပြီး ထူးခြားတဲ့စံချိန်ဖြစ်ကြောင်း၊ မန်ယူနိုက်တက်အသင်းကိုလည်း စံချိန်တင် ဂိုးအပြတ်ဆုံး ရလဒ်နဲ့ အနိုင်ရရှိခဲ့တာဟာ မယုံကြည်နိုင်စရာကောင်းကြောင်း ဆာလာက ပြောပါတယ်။ 

အီဂျစ်တိုက်စစ်မှူးဟာ မန်ယူအသင်းဘက်ကို စုစုပေါင်း ၁၀ ဂိုးအထိ သွင်းယူနိုင်ခဲ့ပြီး လီဗာပူး ကစားသမားတွေထဲမှာ မန်ယူအသင်းဘက်ကို အများဆုံး ဂိုး သွင်းနိုင်တဲ့ ကစားသမား အဖြစ်လည်း မှတ်တမ်းဝင်ခဲ့ပါတယ်။ 

စပါးအသင်းနဲ့ပွဲစဉ်မှာ ဟတ်ထရစ်သုံးဂိုးသွင်းခဲ့တဲ့ မန်ယူတိုက်စစ်မှူး ရော်နယ်ဒိုဟာ ကမ္ဘာ့ ဘောလုံးသမိုင်းတလျှောက် သွင်းဂိုးအများဆုံးကစားသမားအဖြစ် စံချိန်တင်နိုင်ခဲ့ပါတယ်။ 

အရင်က သြစတြီးယား-ချက် နှစ်နိုင်ငံကိုယ်စားပြုကစားသမား ဂျိုးဆက်ဘစ်ကမ်က သွင်းဂိုး ၈၀၅ ဂိုးနဲ့ စံချိန် တင်ထားတာဖြစ်ပြီး ရော်နယ်ဒိုက ၈၀၇ ဂိုးနဲ့ ကျော်ဖြတ်နိုင်ခဲ့တာပါ။ 

ရော်နယ်ဒိုဟာ စပို့တင်းလစ္စဘွန်းအတွက် ၅ ဂိုး၊ ရီးရဲလ်မက်ဒရစ်အတွက် ၄၅၀ ဂိုး၊ ဂျူဗင်တပ်အတွက် ၁၀၁ ဂိုး၊ ပေါ်တူဂီအတွက် ၁၁၅ ဂိုး၊ မန်ယူနိုက်တက်အတွက် ၁၃၆ ဂိုး သွင်းယူထားပါတယ်။ 

ရော်နယ်ဒိုအနေနဲ့  ဂန္ထဝင်ကစားသမားကြီးတွေဖြစ်တဲ့ ပီလီ၊ ရိုမာရီယို၊ မာရာ ဒိုနာ တို့ရဲ့အထက်မှာ ရပ်တည်နိုင်ခဲ့သလို ပြိုင်ဘက် မက်ဆီရဲ့ အထက်မှာလည်း ရပ်တည်နိုင်ခဲ့တာပါ။ 

လက်ရှိကစားနေဆဲ ကစားသမားတွေထဲမှာ မက်ဆီက ၇၅၉ ဂိုးသွင်းထားပြီး ရော်နယ်ဒိုကို လိုက်မီဖို့ ၄၈ ဂိုး လိုအပ်မှာဖြစ်ပါတယ်။ 

ရော်နယ်ဒိုရဲ့ အသက်က ၃၇ နှစ်ရှိလာပြီဖြစ်ပြီး ပီအက်စ်ဂျီတိုက်စစ်မှူး မက်ဆီက ၃၄ နှစ်ရှိတာကြောင့် သူတို့ ၂ ဦးရဲ့ သွင်းဂိုးအရေအတွက် ပြိုင်ဆိုင်မှုက ဆက်ပြီး မြင်တွေ့ရဖို့ရှိပါတယ်။