ဟောလီးဝုဒ် ရုပ်ရှင်လောကမှာ သြဇာလွှမ်းမိုးခဲ့တဲ့ နာမည်ကြီးရုပ်ရှင်ထုတ်လုပ်သူ ဟာဗေးဝိန်းစတိန်းဟာ ၂၀၁၃ ခုနှစ်က လော့စ်အိန်ဂျလိစ်မြို့မှာ သရုပ်ဆောင်မင်းသမီးတဦး အပေါ် အဓမ္မပြုကျင့်ခဲ့မှုအတွက် ဖေဖော်ဝါရီ ၂၃ ရက်က ထောင်ဒဏ် ၁၆ နှစ် ချမှတ်ခံရပါတယ်။
၂၀၁၃ ခုနှစ်၊ ဖေဖော်ဝါရီလက လော့စ်အိန်ဂျလိစ်မြို့ ဟိုတယ်တခုမှာ ဂျိန်းဒိုး-၁ ဆိုပြီး တရားရုံးက အမည်လွှဲသတ်မှတ်ထားတဲ့ မော်ဒယ်သရုပ်ဆောင်ဟောင်းတဦးအပေါ် ဝိန်းစတိန်းက လိင်ပိုင်းဆိုင်ရာ စော်ကားခဲ့တာ ဖြစ်ပါတယ်။ ဝိန်းစတိန်းက သူ့အနေနဲ့ ဂျိန်းဒိုး-၁ ကို မသိရှိသလို ဒီဖြစ်ရပ်ဟာလည်း ငွေလိုချင်တာကြောင့်သာ လုပ်ကြံဖန်တီးထားတာဖြစ်တယ်လို့ ပြီးခဲ့တဲ့ ကြာသပတေးနေ့က တရားရုံးမှာ ထွက်ဆိုပါတယ်။
ဒါ့အပြင် သူနဲ့ လိင်ပိုင်းဆိုင်ရာ တွေ့ဆုံမှုအားလုံးဟာ ကြည်ကြည်ဖြူဖြူရှိခဲ့ပြီး လော့စ်အိန်ဂျလိစ်အမှုမှာ အပြစ်မရှိကြောင်း ပြောဆိုခဲ့ပါတယ်။
တရားရုံးမှာ ဝှီးချဲပေါ်ကနေ စကားပြောနေတဲ့ ဝိန်းစတိန်းဟာ တရားသူကြီးကို ထောင်ဒဏ် တသက်တကျွန်း မချမှတ်ဖို့ အသနားခံ တောင်းဆိုခဲ့ပါတယ်။
လော့စ်အိန်ဂျလိစ် တရားရုံးက အမိန့်ချမှတ်လိုက်တဲ့ ထောင်ဒဏ် ၁၆ နှစ် အပါအဝင် ၂၀၂၀ ခုနှစ် ဖေဖော်ဝါရီလမှာလည်း နယူးယောက်တရားရုံးတခုက လိင်ပိုင်းဆိုင်ရာ မလျော်မကန် ပြုမူမှုကြောင့် ဝိန်းစတိန်းကို ထောင်ဒဏ် ၂၃ နှစ်အထိ ချမှတ်ထားပြီး ဖြစ်တဲ့အတွက် အသက် ၇၀ အရွယ် အမေရိကန် ရုပ်ရှင်ထုတ်လုပ်သူဟာ ကျန်ရှိနေသေးတဲ့ဘဝကို ထောင်ထဲမှာသာ ကုန်ဆုံးရဖို့ရှိပါတယ်။
သူဟာ ၂၀၂၁ ခုနှစ်၊ ဇူလိုင်လမှာ နယူးယောက်မြို့ကနေ လော့စ်အိန်ဂျလိစ်မြို့ကို တရားခံအဖြစ် လွှဲပြောင်းရောက်ရှိလာခဲ့တာပါ။
ဝိန်းစတိန်းအပေါ် ကနဦးစွဲချက် ၁၁ ခုအထိ ရှိရာက ၄ ခုကို တရားရုံးတွေက ပယ်ချခဲ့တာကြောင့် ကျန်ရှိနေသေးတဲ့ အမှု ၇ မှုမှာ ၃ မှုအတွက် အပြစ်ရှိကြောင်း လောလောဆယ် အမိန့်ချမှတ်ထားပါတယ်။
ဝိန်းစတိန်းအပေါ် လက်ရှိစွပ်စွဲချက်တွေဟာ မီဒီယာ၊ နိုင်ငံရေးနဲ့ တခြားနယ်ပယ်တွေက သြဇာရှိတဲ့ အမျိုးသားတွေရဲ့ လိင်ပိုင်းဆိုင်ရာ စော်ကားနှောင့်ယှက်မှုတွေနဲ့ ပတ်သက်ပြီး ကျူးလွန်ခံခဲ့ရတဲ့ အမျိုးသမီးတွေအနေနဲ့ ထုတ်ဖော်ပြောဆိုလာအောင် တွန်းအားပေးနိုင်ခဲ့တဲ့ #MeToo လှုပ်ရှားမှုကို ပိုမိုကြီးထွားလာစေခဲ့ပါတယ်။
ဒီနှစ်မှာ အကောင်းဆုံး အမျိုးသမီးသရုပ်ဆောင်ဆုအတွက် အော်စကာ ဆန်ခါတင်စာရင်း ဝင်ထားတဲ့ သရုပ်ဆောင် မင်းသမီးကြီး မီရှဲယိုလ်ဟာ ဖေဖော်ဝါရီ ၅ ရက်မှာ London Critics’ Circle ဆုပေးပွဲကို တက်ရောက်လာပြီး ရုပ်ရှင်လောကမှာ ထူးချွန်မှုအတွက်ဂုဏ်ပြုပေးအပ်တဲ့ Dilys Powell ဆုကိုလည်း မေဖဲလ်ဟိုတယ်မှာ လက်ခံရယူခဲ့ပါတယ်။
“Everything Everywhere All at Once” ဇာတ်ကားနဲ့ အော်စကာ ဆန်ခါတင်စာရင်းမှာ မီရှဲလ်ယိုလ် ပါဝင်လာတာဖြစ်ပြီး ပထမဆုံးအကြိမ်အဖြစ် ဟောလီးဝုဒ်ရုပ်ရှင်တခုအတွက် သရုပ်ဆောင်ကြေးအများဆုံး ရရှိခဲ့တဲ့ အသက် ၆၀ အရွယ် မင်းသမီးကြီးဟာ အသက်အရွယ်ကြီးရင့်တဲ့ အမျိုးသမီးတွေအပေါ်မှာ စိတ်ဓာတ်တက်ကြွလာအောင် လှုံ့ဆော်နိုင်ခဲ့တာကြောင့် “အင်မတန် ဂုဏ်ယူမိတယ်” လို့ ပြောပါတယ်။
“အသက် ၄၀၊ ၅၀၊ ၆၀ ပြည့်နှစ်ထဲရောက်နေတဲ့ မျိုးဆက်ဟောင်းတခုက အမျိုးသမီးတွေ အနေနဲ့ ‘ငါတို့လည်း လုပ်နိုင်တယ်ဆိုတာ တွေ့လား’ လို့ နောက်ပြန်လှည့် ပြောနိုင်ရမှာပေါ့။ အသက်အရွယ် ကိန်းဂဏန်းတွေ ပိုများပြားလာတာနဲ့အမျှ ငါတို့ ရှောင်ဖယ်နေဖို့ မလိုအပ်ဘူး” လို့ သူက ပြောပါတယ်။
သရုပ်ဆောင် ဘီလ်နိုင်းက “Living” အမည်ရတဲ့ ဇာတ်ကားနဲ့အတူ တနှစ်တာအကောင်းဆုံး ဗြိတိန်/အိုင်းရစ် အမျိုးသားသရုပ်ဆောင်ဆုကို ရရှိခဲ့ပြီး ဖလောရင့်စ်ပြူ့ ကတော့ တနှစ်တာအတွက် အကောင်းဆုံး ဗြိတိန်/အိုင်းရစ် အမျိုးသမီးသရုပ်ဆောင်ဆုကို ရယူနိုင်ခဲ့ပါတယ်။
နောက်ထပ် ဝါရင့်မင်းသမီးကြီး ကိတ်ဘလန်းချက် ပါဝင်သရုပ်ဆောင်ထားတဲ့ “Tar” ရုပ်ရှင်ဇာတ်ကားနဲ့ “The Banshees Of Inisherin” အမည်ရ ဇာတ်ကားတို့ဟာလည်း အော်စကာဆုအတွက် ထင်ကြေးပေးခံရပြီး တစ်ပြေးနေပါတယ်။
