အက်စ်တွန်ဗီလာအသင်းဟာ ဂိုးသမား မာတီနက်ဇ်အတွက် မြင့်မားတဲ့ပြောင်းရွှေ့ကြေး ရရှိမယ်ဆိုရင် ရောင်းထုတ်ဖို့ ဆုံးဖြတ်ထားတယ်လို့ သိရပါတယ်။
အာဂျင်တီးနားအသင်းနဲ့အတူ ကမ္ဘာ့ဖလားချန်ပီယံ ဖြစ်ခဲ့ရာမှာ သူရဲကောင်းတဦးဖြစ်ခဲ့တဲ့ မာတီနက်ဇ်ဟာ ကမ္ဘာ့အကောင်းဆုံးဂိုးသမား စကာတင်စာရင်းမှာလည်း ပါဝင်နေတာပါ။
မာတီနက်ဇ်ကိုယ်တိုင်ကလည်း ဥရောပချန်ပီယံလိဂ်ပြိုင်ပွဲ ကစားချင်တဲ့ဆန္ဒရှိတာကြောင့် ထိပ်တန်းအသင်းကြီးတသင်းက ကမ်းလှမ်းမယ်ဆိုရင် ပြောင်းရွှေ့လိုနေတယ်လို့ သိရပါတယ်။
နည်းပြ အူနိုင်းအမ်မရီ အနေနဲ့လည်း မာတီနက်ဇ်ကို ပြောင်းရွှေ့ကြေးမြင့်မားစွာနဲ့ ရောင်းချပြီး လာမယ့်ရာသီအတွက် ကစားသမားသစ်တွေ ခေါ်ယူနိုင်ဖို့ ရည်ရွယ်ထားတယ်လို့ သိရပါတယ်။
ဗီလာအသင်းဟာ မာတီနက်ဇ်ကို ၂၀၂၀ ပြည့်နှစ်က အာဆင်နယ်ဆီကနေ ပေါင် ၁၆ သန်းနဲ့ ဝယ်ယူခဲ့တာ ဖြစ်ပါတယ်။
အက်စတွန်ဗီလာနည်းပြ ဂျရတ်ဟာ ရာသီသစ်အတွက် အသင်းခေါင်းဆောင်သစ် ရွေးချယ်ရာမှာ ကွင်းလယ်လူ ဂျွန်မက်ဂင်းကို ခန့်အပ်ခဲ့ပါတယ်။
ပြီးခဲ့တဲ့နှစ်က နောက်ခံလူ တိုင်ရုန်မင်စ်က အသင်းခေါင်းဆောင်အဖြစ် တာဝန်ယူခဲ့တာဖြစ်ပေမဲ့ လာမယ့်ရာသီသစ်မှာတော့ အသင်းခေါင်းဆောင်ရာထူးကနေ ဖယ်ရှားခံခဲ့ရသလို အသင်းခေါင်းဆောင်အဖွဲ့ထဲမှာတောင် ပါဝင်ခြင်းမရှိခဲ့ပါဘူး။
ဒါဟာ အင်္ဂလန်နောက်ခံလူ တိုင်ရုန်မင်စ်ကို ဘောလုံးအပေါ်ပဲ ပိုမိုအာရုံစိုက်နိုင်စေဖို့ ဖြစ်ကြောင်း နည်းပြဂျရတ်က ရှင်းလင်းပါတယ်။
နောက်ခံလူ တိုင်ရုန်မင်စ်ဘက်ကလည်း နည်းပြဂျရတ်ရဲ့ ဆုံးဖြတ်ချက်ကို လက်ခံပြီး ပြဿနာတစုံတရာ မရှိကြောင်းနဲ့ ခေါင်းဆောင်သစ် ဂျွန်မက်ဂင်းရဲ့ ဦးဆောင်မှုနဲ့အတူ ဗီလာအတွက် ကစားပေးရမှာက ဂုဏ်ယူစရာဖြစ်ကြောင်း တွစ်တာကနေ ပြောပါတယ်။
အင်္ဂလန်နောက်ခံလူ မင်စ်ဟာ ဗီလာနဲ့ ၂ နှစ်စာချုပ်သက်တမ်းသာ ကျန်ရှိတော့ပြီး ပွဲထွက်ခွင့်အတွက် ရုန်းကန်သွားရဖို့ ရှိနေပါတယ်။
