လက်ထပ်ထိမ်းမြားခြင်းမပြုဘဲ လိင်ဆက်ဆံတာကို တားမြစ်တဲ့ ရာဇဝတ်ကျင့်ထုံးကို အင်ဒိုနီးရှားလွှတ်တော်က ဒီဇင်ဘာ ၆ ရက်မှာ အတည်ပြုခဲ့ပါတယ်။

ကမ္ဘာ့တတိယအကြီးဆုံး ဒီမိုကရေစီနိုင်ငံကြီးမှာ ပြည်သူ့လွတ်လပ်မှုကို ထိခိုက်စေတယ်လို့ ဝေဖန်သူတွေကပြောတဲ့ ဥပဒေပြောင်းလဲမှု အစိတ်အပိုင်းတခုလည်း ဖြစ်ပါတယ်။

အင်ဒိုနီးရှားနိုင်ငံသားတွေနဲ့ နိုင်ငံခြားသားတွေ တန်းတူသက်ဆိုင်တဲ့ အငြင်းပွားဖွယ် ဥပဒေသစ်ထဲမှာ သမ္မတ ဒါမှမဟုတ် နိုင်ငံတော်အဖွဲ့အစည်းတွေကို စော်ကားတာကို တားမြစ်ခြင်းနဲ့ နိုင်ငံတော် အတွေးအခေါ်နဲ့ ဆန့်ကျင်တဲ့ အမြင်တွေကို ဖော်ပြခြင်းတို့လည်း ပါဝင်ပါတယ်။

အရှေ့တောင်အာရှနိုင်ငံဖြစ်တဲ့ အင်ဒိုနီးရှားဟာ နယ်သာလန်ဆီကနေ လွတ်လပ်ရေး ကြေညာပြီးကတည်းက ပြန်ပြင်ဆင်ဖို့ ဆွေးနွေးနေတဲ့ ရာဇဝတ်ကျင့်ထုံး ဥပဒေပြုရေး အားထုတ်ချက်ကို ဥပဒေပြုလွှတ်တော်အမတ်တွေက ချီးကျူးခဲ့ကြပါတယ်။

ခရီးသွားလုပ်ငန်းနဲ့ ရင်းနှီးမြှုပ်နှံမှုနေရာတခုအဖြစ် အင်ဒိုနီးရှားရဲ့ပုံရိပ်ကို ထိခိုက်စေနိုင်တယ်လို့ စီးပွားရေးအဖွဲ့တွေက သတိပေးထားတဲ့ကြားက ခုလို အတည်ပြုခဲ့တာလည်း ဖြစ်ပါတယ်။

လိင်ပိုင်းဆိုင်ရာ အကြမ်းဖက်မှုတွေအပေါ် ဖြေရှင်းဖို့နဲ့ တရားမျှတမှု ရရှိစေဖို့ ကာလကြာရှည် အငြင်းပွားနေတဲ့ ဥပဒေကြမ်းတခုကို အင်ဒိုနီးရှားလွှတ်တော်က ဧပြီ ၁၂ ရက်မှာ အတည်ပြုနိုင်ခဲ့ပါတယ်။

လိင်ပိုင်းအလွဲပြုကျင့်မှုတွေကို ပုဂ္ဂလိက လွတ်လပ်ခွင့်အဖြစ် ယူဆပြီး အရေးမယူဘဲ နေလာခဲ့တဲ့ အင်ဒိုနီးရှားမှာ အခု ထိထိရောက်ရောက် အရေးယူဖို့ သမိုင်းဝင်ဥပဒေ ပြဋ္ဌာန်းနိုင်ခဲ့တာပါ။

ကမ္ဘာ့ မွတ်ဆလင်လူဦးရေ အများဆုံးနိုင်ငံမှာ ကွန်ဆာဗေးတစ် အုပ်စုတွေရဲ့ ၆ နှစ်လောက် ဆန့်ကျင်နေမှုကို ကျော်လွန်ပြီး လွှတ်တော်အမတ်အများစုက ဥပဒေကို အတည်ပြုနိုင်ခဲ့တာလည်း ဖြစ်ပါတယ်။

ဥပဒေကြမ်းမှာ အိမ်ထောင်တွင်း အိမ်ထောင်ပြင်ပ ရုပ်ပိုင်းဆိုင်ရာ လိင်အလွဲပြုကျင့်မှုအတွက် ထောင်ဒဏ် ၁၂ နှစ်၊ လိင်ပိုင်း အမြတ်ထုတ်မှုအတွက် ထောင်ဒဏ် ၁၅ နှစ်၊ အတင်းအကျပ် လက်ထပ်ခိုင်းတာနဲ့ ကလေးလက်ထပ်ခိုင်းတာတွေ အတွက် ထောင်ဒဏ် ၉ နှစ် ပြစ်ဒဏ်တွေ ပါဝင်ပါတယ်။

တက်ကြွလှုပ်ရှားသူ အတော်များများက ဥပဒေကြမ်းကို ကြိုဆိုခဲ့ပေမဲ့ အဓမ္မပြုကျင့်မှုနဲ့ ပတ်သက်တဲ့ တချို့စာပိုဒ်တွေ ချန်လှပ်ထားမှုကြောင့် အားရမှုတော့ မရှိပါဘူး။