တူရကီနိုင်ငံတောင်ပိုင်းနဲ့ ဆီးရီးယားနိုင်ငံမြောက်ပိုင်းနယ်စပ်မှာ ဖေဖော်ဝါရီ ၆ ရက်က လှုပ်ခတ်ခဲ့တဲ့ အင်အားပြင်း ငလျင်ကြောင့် သေဆုံးသူ အရေအတွက် အနည်းဆုံး ၃၀၀၀ ကျော်ရှိသွားပြီဖြစ်ပြီး ကူညီကယ်ဆယ်ရေးလုပ်ငန်းတွေကို ရာသီဥတုဆိုးရွားတဲ့ကြားက ဆက်လက်လုပ်ဆောင်နေကြတယ်လို့ နိုင်ငံတကာသတင်းတွေမှာ ဖော်ပြပါတယ်။

မနေ့မနက်အစောပိုင်း လူတွေအိပ်နေချိန် တူရကီနိုင်ငံ ဂါဇီယံတပ်ပြည်နယ် နာဒါဂီမြို့အရှေ့ပိုင်းမှာ  ပြင်းအားရစ်ချ်တာစကေး ၇ ဒသမ ၈ ရှိတဲ့ အင်အားပြင်း မြေငလျင်ကြီးလှုပ်ခတ်ခဲ့တာပါ။ 

ငလျင်ကြောင့် တူရကီနိုင်ငံမှာ လူပေါင်း ၁၇၀၀ ကျော်သေဆုံးပြီး ၉၇၀၀ ကျော် ဒဏ်ရာရခဲ့တယ်လို့ တူရကီ အစိုးရက ပြောကြားခဲ့ပြီး ဆီရီးယားမှာလည်း လူပေါင်း ၁၃၀၀ လောက် သေဆုံးခဲ့ပါတယ်။ 

ငလျင်ကြောင့် ပျက်စီးပြိုကျတဲ့ အဆောက်အဦတွေအောက်မှာ အသက်ရှင်ကျန်ရစ်နေသူတွေကို ကယ်ဆယ်ဖို့  ကူညီကယ်ဆယ်ရေးလုပ်သားတွေက ကြိုးပမ်းနေကြသလို  နိုင်ငံတကာက ကူညီပေးကြဖို့ တူရကီအစိုးရက တောင်းခံခဲ့အပြီးမှာ ကမ္ဘာ့နိုင်ငံခေါင်းဆောင်တွေကလည်း  အကူအညီတွေပေးပို့မယ်လို့ အသီးသီးကတိပြုထားကြပါတယ်။ 

ငလျင်ကြောင့် အဆောက်အဦပေါင်း အနည်းဆုံး ၅၆၀၀ ကျော် ပြိုကျပျက်စီးသွားတယ်လို့လည်း တူရကီ အေဂျင်စီက ပြောပါတယ်။

ငလျင်ကြီးဒဏ်ကို တူရကီ၊ ဆီးရီးယား၊ လက်ဘနွန်နဲ့ ဆိုက်ပရပ်စ်နဲ့ အစ္စရေးအပါအဝင် ဒေသတွင်းနိုင်ငံတွေက သန်းနဲ့ချီတဲ့ ပြည်သူတွေ သိရှိခံစားခဲ့ရတာဖြစ်ပါတယ်။

ဂျပန်နိုင်ငံမှာ ပြင်းအား ရစ်ချ်တာစကေး ၇ ဒသမ ၄ ရှိတဲ့ ငလျင်လှုပ်ခတ်အပြီး မတ်လ ၁၇ ရက်က နိုင်ငံအရှေ့မြောက်ပိုင်း တံတားတစင်းပေါ်မှာ ကျည်ဆန်ရထားတစီး လမ်းချော်ခဲ့ပါတယ်။

ဂျပန်မှာ မတ်လ ၁၆ ရက် ညသန်းခေါင်ချိန်အနီး လှုပ်ခတ်တဲ့ အင်အားပြင်းငလျင်ကြောင့် လူ ၄ ယောက် သေဆုံးပြီး အယောက် ၁၀၀ ကျော် ဒဏ်ရာရခဲ့တာပါ။

ရထားတွဲ ၁၇ တွဲရှိတဲ့အထဲက ၁၆ တွဲ ပြေးလမ်းပေါ်ကနေ ခုန်ထွက်သွားပေမယ့် ခရီးသည် တယောက်မှ ဒဏ်ရာမရခဲ့ဘဲ အားလုံးကို ကယ်ဆယ်နိုင်ခဲ့ပါတယ်။

ထောင်ချီတဲ့ ဂျပန်မိသားစုတွေဟာ ဒီနေ့အထိ လျှပ်စစ်မီး မရသေးပါဘူး။ ဒေသခံတွေဟာ လေဟာပြင် ရေပိုက်ခေါင်းတွေဆီကနေ ရေသယ်နေရတာကိုလည်း တွေ့ရပါတယ်။

လျှပ်စစ်မီးရောရေပါ ဒီနေ့ ညနေပိုင်းမှာ ပြန်ရမယ်လို့ အစိုးရအဖွဲ့ အတွင်းရေးမှူးချုပ် ဟိရိုခါ့ဇု မတ်စုနိုက ပြောပါတယ်။

ဂျပန်မှာ ၂၀၁၁ မတ်လ ၁၁ ရက်ကလည်း အဲဒီနေရာမှာပဲ ရစ်ချ်တာစကေး ၉ ဒသမ ၁ ရှိတဲ့ အင်အားပြင်း ငလျင်လှုပ်ခဲ့လို့ ဆူနာမီရေလှိုင်းကြီး ရိုက်ခတ်ခဲ့ပြီး နျူကလီးယား ဓာတ်ပေါင်းဖို မတော်တဆ ဖြစ်ခဲ့တဲ့အတွက် လူ ၁ သောင်း ၈ ထောင်ကျော် သေဆုံးခဲ့ပါတယ်။