ဆိုဗီယက်နိုင်ငံဟောင်းတွေအကြား နာဂေါနို-ကာရာဘက် နယ်မြေအရေး ဆယ်စုနှစ်ချီ အငြင်းပွားမှုတွေနဲ့ ဆက်စပ်တဲ့ ၂ ရက်ကြာ အကြမ်းဖက်မှုတွေ ဖြစ်ပွားပြီးနောက် အာမေးနီးယားနဲ့ အဇာဘိုင်ဂျန်တို့ အပစ်အခတ်ရပ်စဲရေး ကြေညာလိုက်တာကို ကုလသမဂ္ဂက စက်တင်ဘာ ၁၅ ရက်မှာ ကြိုဆိုလိုက်ပါတယ်။

တဖက်နဲ့တဖက် အပြစ်တင်နေခဲ့တဲ့ တိုက်ပွဲတွေကြောင့် စစ်သား ၁၇၀ ကျော် သေဆုံးခဲ့ပါတယ်။

၄၈ နာရီနီးပါးကြာ တိုက်ပွဲတွေ ဖြစ်ပွားပြီးနောက် စက်တင်ဘာ ၁၄ ရက် နှောင်းပိုင်းမှာ နှစ်ဖက်အကြား အပစ်အခတ်ရပ်စဲရေး သဘောတူညီခဲ့ကြောင်း အာမေးနီးယန်း အကြီးတန်း အရာရှိတယောက်က ပြောပါတယ်။

အပစ်အခတ်ရပ်စဲရေးကို မကြေညာခင်က အာမေးနီးယားဝန်ကြီးချုပ် နိကိုလ် ပါရှင်ယန်က အဇာဘိုင်ဂျန် တပ်ဖွဲ့တွေဟာ အငြင်းပွားနေတဲ့ နာဂေါနို-ကာရာဘက် ဒေသထက် ကျော်လွန်တဲ့ ပိုင်နက်နယ်မြေတလျှောက်ရှိ အာမေးနီးယန်း အခြေချနေထိုင်ရာ အများအပြားကို တိုက်ခိုက်ပြီး သိမ်းပိုက်ခဲ့ကြောင်း ပြောကြားပါတယ်။

ဒါဟာ ရန်စမှုတွေကို အာမေးနီးယန်းဘက်က တုံ့ပြန်တာဖြစ်ကြောင်း ဘာကူအစိုးရက ပြောကြားခဲ့ပါတယ်။

ဒီတိုက်ပွဲတွေက အဇာဘိုင်ဂျန်ရဲ့ အဓိက ကျောထောက်နောက်ခံ တူရကီနဲ့ အာမေးနီးယားရဲ့ မဟာမိတ် ရုရှားတို့ကို ပထဝီနိုင်ငံရေးအရ တင်းမာမှုတွေ မြင့်မားနေချိန်မှာ ပိုကျယ်ပြန့်တဲ့ ပဋိပက္ခထဲ ဆွဲချလာမယ့်အရေးလည်း ခြိမ်းခြောက်နေတာပါ။

အာမေးနီးယားနိုင်ငံနဲ့ ကာကွယ်ရေးဆိုင်ရာ သဘောတူညီချက်ရှိပြီး နိုင်ငံအတွင်း စစ်အခြေစိုက်စခန်းတခု ထားရှိတဲ့အပြင် အဇာဘိုင်ဂျန်နဲ့ ချစ်ကြည်ရင်းနှီးတဲ့ ဆက်ဆံရေးအတွက် ကြိုးပမ်းနေတဲ့ မော်စကိုက အပစ်ရပ် သဘောတူညီချက်အတွက် ဂုဏ်ယူကြောင်း ပြောကြားခဲ့ပါတယ်။

တိုက်ပွဲတွေကြောင့် ဖြစ်ပွားခဲ့တဲ့ ဒေသတွင်း စစ်ရေးချိန်ခွင်လျှာ အပြောင်းအလဲမှန်သမျှကို နောက်ပြန်ဆုတ်ဖို့ ကြိုးပမ်းနေတယ်လို့ ရုရှားက ကြာသပတေးနေ့မှာ ပြောပါတယ်။

အဇာဘိုင်ဂျန်နိုင်ငံရဲ့ မြို့တော် ဘာခူမှာ အဇာဘိုင်ဂျန်နဲ့ အာမေးနီးယား နှစ်နိုင်ငံကြား နယ်စပ်တိုက်ပွဲအတွင်း သေဆုံးခဲ့တဲ့ စစ်သည်တယောက်ရဲ့ ဈာပနကို စက်တင်ဘာ ၁၄ ရက်က ကျင်းပပါတယ်။

နိုင်ငံတကာ ငြိမ်းချမ်းရေး အားထုတ်မှုတွေလည်း တိုးလာနေပေမဲ့ ဗုဒ္ဓဟူးနေ့က နောက်ထပ် တိုက်ပွဲအသစ်တွေ ထပ်ဖြစ်တယ်ဆိုတဲ့ အစီရင်ခံစာတွေလည်း ရှိနေပါတယ်။

၂၀၂၀ စစ်ပွဲအပြီး ဆိုဗီယက်သမ္မတနိုင်ငံဟောင်း လက်အောက်ခံ ၂ နိုင်ငံကြား အဆိုးရွားဆုံး တိုက်ပွဲတွေအတွင်း စစ်သည် အယောက် ၁၀၀ နီးပါး သေဆုံးခဲ့တာပါ။

တနင်္လာညပိုင်းက နယ်စပ်တလျှောက်ဖြစ်ခဲ့တဲ့ ရန်လိုမှုတွေအတွက် တနိုင်ငံနဲ့တနိုင်ငံ အပြန်အလှန် အပြစ်တင်ခဲ့ကြပါတယ်။

တူရကီသမ္မတ တေယစ် အာဒိုဂံနဲ့ ရုရှားသမ္မတ ဗလာဒီမာ ပူတင်တို့က ဒီအပတ်ထဲ ဆာမာခန်းမြို့မှာတွေ့မယ့် အစည်းအဝေးအတွင်း လတ်တလော တိုက်ပွဲတွေအတွက် ဆွေးနွေးကြလိမ့်မယ်လို့ တူရကီ အကြီးတန်းအရာရှိတယောက်ကို ကိုးကားပြီး ရိုက်တာသတင်းဌာနက ဖော်ြပပါတယ်။

နယ်စပ်နားက မြို့အတော်များများ အင်္ဂါနေ့အစောပိုင်းက အမြောက်နဲ့ပစ်ခံရလို့ အဇာဘိုင်ဂျန်ရဲ့ အကြီးစား ကျူးကျော်မှုအတွက် တုံ့ပြန်ခဲ့တယ်၊ အာမေးနီးယားစစ်သည် ၄၉ ယောက်ထက်မနည်း ကျဆုံးတယ်လို့ အာမေးနီးယားက ပြောပါတယ်။

အာမေးနီးယားဟာ နယ်စပ်တလျှောက် ထောက်လှမ်းနေပြီး လက်နက်တွေ ရွှေ့ပြောင်းနေတဲ့အပြင် အဇာဘိုင်ဂျန်ရဲ့ တပ်စခန်းတွေကို အာမေးနီးယားက တိုက်ခိုက်ခဲ့တယ်လို့ အဇာဘိုင်ဂျန်အစိုးရက စွပ်စွဲပါတယ်။

ရုရှားနဲ့ အမေရိကန် နှစ်နိုင်ငံလုံးက ချုပ်တည်း စောင့်ထိန်းကြဖို့ ဆော်ဩထားပါတယ်။