မလေးရှားနိုင်ငံက လိုင်စင်မဲ့ အပန်းဖြေစခန်းချ နေရာတခုမှာ မြေပြိုမှုကြောင့် ကလေး ၅ ဦးအပါအဝင် အနည်းဆုံး လူ ၂၁ ဦး သေဆုံးခဲ့ပြီး ပျောက်ဆုံးသူ ၁၂ ဦးကို ရွှံ့နွံတွေထဲမှာ ထောက်လှမ်း ရှာဖွေနေဆဲဖြစ်တယ်လို့ ဒီဇင်ဘာ ၁၇ ရက်မှာ အာဏာပိုင်တွေက ပြောပါတယ်။

မိုးသည်းထန်စွာ ရွာသွန်းမှုကြောင့် ရှာဖွေရေးလုပ်ငန်းစဉ်တွေ အခက်အခဲ ဖြစ်ခဲ့ရတယ်လို့ ဆိုပါတယ်။

ဆီလန်ဂေါပြည်နယ်ရဲ့ မီးသတ်နဲ့ကယ်ဆယ်ရေးဌာန အကြီးအကဲ နိုရာဇမ်ခါမစ်ကတော့ ဒီရှာဖွေရေး လုပ်ငန်းစဉ်ကို အများဆုံး ၇ ရက်အထိ အားထုတ်ကြိုးပမ်းမှာဖြစ်ပေမယ့် အသက်ရှင်ကျန်ရစ်သူတွေကို ရှာဖွေတွေ့ရှိဖို့ကတော့ အခွင့်အရေးနည်းပါးနေပြီလို့ ပြောဆိုခဲ့ပါတယ်။ 

မိုးသည်းထန်စွာ ရွာသွန်းမှုကြောင့် ရှာဖွေရေး နဲ့ ကယ်ဆယ်ရေးလုပ်ငန်းတွေကို ညတွင်းချင်း ရပ်နားခဲ့ရပြီးနောက် ဒီဇင်ဘာ ၁၇ ရက်မနက်ပိုင်း ဂရင်းနစ်စံတော်ချိန် ၈ နာရီခွဲမှာ မြေတူးစက်တွေ၊ အနံခံ ခွေးတွေရဲ့ အကူအညီနဲ့အတူ ရှာဖွေရေးကို ပြန်လည်စတင်ခဲ့ကြောင်း နိုရာဇမ်က ဖြည့်စွက်ပြောကြားပါတယ်။ 

ကွာလာလမ်ပူမြို့ မြောက်ဘက် မိုင် ၃၀ အကွာက လူသိများထင်ရှားတဲ့ ဘ-တန်းကာလီ တောင်ကုန်းဒေသမှာ စခန်းချတဲထဲ အိပ်ပျော်နေသူတွေပေါ် ဒီမြေပြိုမှုဖြစ်ပွားခဲ့တာပါ။

မလေးရှားနိုင်ငံ၊ ဆီလန်ဂေါပြည်နယ်ရှိ စခန်းချ အပန်းဖြေနေရာမှာ ဒီဇင်ဘာ ၁၆ ရက်က မြေပြိုကျမှုကြောင့် စခန်းချတဲတွေအတွင်း အိပ်ပျော်နေတုန်း သေဆုံးရသူ ကလေးငယ်တွေ အပါအဝင် အနည်းဆုံး ၁၆ ယောက် ရှိသွားပြီဖြစ်ပြီး ရှာဖွေရေးအဖွဲ့တွေကလည်း ပျောက်ဆုံးနေဆဲလူပေါင်း ၂၀ ကျော်ကို ရှာတွေ့နိုင်ဖို့ ရွှံ့ထူထပ်တဲ့ နေရာတွေက သစ်ပင်တွေကို ရှင်းလင်းနေကြောင်း တာဝန်ရှိသူတွေက ပြောပါတယ်။

မြို့တော် ကွာလာလမ်ပူနဲ့ နယ်နိမိတ်ချင်း ထိစပ်နေတဲ့ ဆီလန်ဂေါပြည်နယ်မှာ မြေပြိုမှုဟာ ဒေသစံတော်ချိန် မနက် ၃ နာရီမထိုးခင် ဖြစ်ပွားခဲ့ပြီး စခန်းချ တဲပစ္စည်းတွေနဲ့အတူ တောင်စောင်းကနေ အော်ဂဲနစ်စိုက်ခင်းတခုထဲကို ပြိုကျထိုးဆင်းသွားတာပါ။

သေဆုံးသူတွေထဲမှာ ကလေးငယ် ၃ ဦးနဲ့ အမျိုးသမီး ၁၀ ဦး ပါဝင်ကြောင်း မီးသတ်နဲ့ ကယ်ဆယ်ရေးဌာနကနေ သိရပါတယ်။

မြေပြိုရတဲ့ အကြောင်းရင်းကို ချက်ချင်း ရှင်းရှင်းလင်းလင်း မသိရသေးဘဲ အဲဒီဒေသမှာ မိုးက နည်းနည်းပဲ ရွာသွန်းခဲ့တယ်လို့ သိရပါတယ်။

မလေးရှားနိုင်ငံမှာ မြေပြိုမှုတွေ အဖြစ်များပေမဲ့ အများအားဖြင့် မိုးသည်းထန်စွာ ရွာသွန်းပြီးမှသာ ဖြစ်လေ့ရှိတာပါ။

ရေကြီးရေလျှံမှုတွေ မကြာခဏဖြစ်ပေါ်တတ်ပြီး မနှစ်ကလည်း မိုးသည်းထန်စွာ ရွာသွန်းမှုကြောင့် ပြည်နယ် ၇ ခုမှာ လူပေါင်း ၂၁,၀၀၀ လောက် အိုးအိမ်စွန့်ခွာ ထွက်ပြေးခဲ့ရပါတယ်။