မြောက်ကိုရီးယားခေါင်းဆောင် ကင်မ်ဂျုံအန်းဟာ သူ့နိုင်ငံရဲ့ ကိုဗစ်-၁၉ တိုက်ဖျက်ရေးမှာ အောင်ပွဲခံကြောင်း သြဂုတ် ၁၀ ရက်က ကြေညာခဲ့ပြီးနောက်မှာ ခေါင်းဆောင် ကင်မ်ဟာ အဖျားရောဂါ လက္ခဏာတွေ ခံစားနေရတယ်လို့ ညီမဖြစ်သူ ကင်မ်ယိုဂျွန်းက ထုတ်ဖော် ပြောကြားလိုက်ပါတယ်။

ကင်မ်ယိုဂျွန်းဟာ ကင်မ်ဂျုံအန်းရဲ့ ကျန်းမာရေးကို အသေးစိတ်မဖော်ပြပေမဲ့ နယ်စပ်အနီးမှာ တွေ့ရှိရတဲ့ တောင်ကိုရီးယားဘက်က ဝါဒဖြန့်စာစောင်တွေကြောင့် ကိုရိုနာဗိုင်းရပ်စ် ဖြစ်ပွားရတာလို့ အပြစ်တင်ထားပါတယ်။

သူဟာ ပထမဆုံးအကြိမ် ဗိုင်းရပ်စ် ကူးစက်ခံရဖွယ်ရှိကြောင်း ညွှန်ပြနေပြီး ဗိုင်းရပ်စ်ကူးစက်မှုကို ဖြစ်စေတဲ့ တောင်ကိုရီးယားကို သေစေလောက်အောင် လက်တုံ့ပြန်မှာ ဖြစ်ကြောင်းလည်း ကတိပြုခဲ့ပါတယ်။

ဗုဒ္ဓဟူးနေ့က အခန်းထဲမှာ နှာခေါင်းစည်းတွေ မဝတ်ဆင်ထားတဲ့ ထောင်နဲ့ချီတဲ့ အရာရှိတွေနဲ့အတူ တွေ့ဆုံစည်းဝေးနေတဲ့ ကင်မ်က မေလတုန်းက ချမှတ်ထားတဲ့ ကပ်ရောဂါ တိုက်ဖျက်ရေးအတွက် အမြင့်ဆုံးအစီအမံတွေကို ရုပ်သိမ်းဖို့ အမိန့်ထုတ်ခဲ့ကြောင်း နိုင်ငံပိုင်မီဒီယာ KCNA က သြဂုတ် ၁၁ ရက်မှာ ဖော်ပြခဲ့ပါတယ်။

မြောက်ကိုရီးယားဟာ သူ့နိုင်ငံမှာ ကိုဗစ်-၁၉ ကူးစက်သူ ဘယ်လောက်ရှိတယ် ဆိုတာကို ဘယ်တုန်းကမှ အတည်မပြုထားပါဘူး။ အဲဒီအစား နေ့စဉ် ဖျားနာသူစာရင်း စုစုပေါင်း ၄ ဒသမ ၇၇ သန်းခန့်ရှိကြောင်းသာ ထုတ်ပြန်ထားပြီး ဇူလိုင် ၂၉ ရက်ကစပြီး ရောဂါကူးစက်မှုအသစ် မတွေ့ရသေးပါဘူး။ ဒါ့အပြင် ဘာကာကွယ်ဆေး ဆိုတာကိုလည်း မသိရသေးပေမဲ့ ပြုံယမ်းက ကိုဗစ်တိုက်ဖျက်ရေးမှာ အောင်ပွဲခံကြောင်း ကြေညာချက် ထုတ်ပြန်ခဲ့တာ ဖြစ်ပါတယ်။

မြောက်ကိုရီးယားနိုင်ငံမှာ ကိုဗစ်-၁၉ ကပ်ရောဂါ ကူးစက်ခံ အတည်ပြုလူနာ တဦးထက်မနည်း သေဆုံးခဲ့ပြီး ထောင်သောင်းချီတဲ့ လူတွေလည်း ဖျားနာနေတဲ့ လက္ခဏာတွေကို ပြနေကြတယ်လို့ မြောက်ကိုရီးယား မီဒီယာက မေ ၁၃ ရက်မှာ ဖော်ပြပါတယ်။

ဧပြီနှောင်းပိုင်းကစပြီး ပြည်လုံးကျွတ် ပေါက်ကွဲကူးစက်ခဲ့တဲ့ ဘာရောဂါမှန်း မသိရတဲ့ အဖျားဝေဒနာကြောင့် လူ ၁၈၇,၈၀၀ ကို ရောဂါခြေချုပ်နဲ့ သီးခြားခွဲထားပြီး ကုသပေးနေတယ်လို့ အစိုးရမီဒီယာ ကေစီအန်အေသတင်းမှာ ဖော်ပြပါတယ်။

လူ ၃ သိန်းခွဲလောက် ဖျားတဲ့လက္ခဏာ ပြခဲ့ပြီး လူ ၁၈,၀၀၀ လောက်က မေ ၁၂ ရက်ကမှ လက္ခဏာပြတယ်လို့ ဆိုပါတယ်။

လူ ၁၆၂,၂၀၀ ကို ဆေးကုသပေးခဲ့ပြီးပြီလို့ ပြောပေမဲ့ လူဘယ်လောက်များများ ကိုဗစ်-၁၉ ကူးစက်ခံရကြောင်း စမ်းသပ်တွေ့ရှိထားလဲဆိုတာ သတ်သတ်မှတ်မှတ် မပြောခဲ့ပါဘူး။

ဒါဟာ နိုင်ငံအတွင်း ပထမဆုံး အတည်ပြု ကူးစက်မှုရဲ့ ဆိုးရွားတဲ့ အရွယ်အစား ပမာဏကို အရိပ်အမြွက်ပြလိုက်တာလို့ နိုင်ငံတကာ မီဒီယာတွေက သုံးသပ်ပါတယ်။

မြောက်ကိုရီးယားဟာ ကိုဗစ်-၁၉ ကပ်ရောဂါ စတင်ကူးစက်ကတည်းက အရင်က ဘယ်တုန်းကမှ အတည်ပြု ကူးစက်ခံဦးရေကို ထုတ်ဖော်မပြခဲ့ပါဘူး။

အခုဖော်ပြတဲ့ သတင်းအချက်အလက်ဟာ အကြီးအကျယ် ကူးစက်မှုကို မကြုံစဖူး ဝန်ခံလိုက်တာလည်း ဖြစ်ပါတယ်။ ဒီကူးစက်မှုဟာ အကြီးစား ပြည်သူ့ကျန်းမာရေးဆိုင်ရာ စီးပွားရေးနဲ့ နိုင်ငံရေးဆိုင်ရာ အကျပ်အတည်း အထိမ်းအမှတ် ဖြစ်လာနိုင်တာပါ။

မြောက်ကိုရီးယားရဲ့ အကန့်အသတ်နဲ့သာရှိတဲ့ စစ်ဆေးနိုင်စွမ်းနဲ့ဆိုရင် ခုထုတ်ပြန်တဲ့ ကူးစက်ခံ အရေအတွက်ဟာ အမှန်တကယ် ကူးစက်မှုရဲ့ အစိတ်အပိုင်း သေးသေးလေးကိုပဲ ကိုယ်စားပြုတာ ဖြစ်ကောင်း ဖြစ်နိုင်တယ်၊ ကိုဗစ်ကာကွယ်ဆေး မထိုးထားတဲ့ ကမ္ဘာပေါ်က ၂ နိုင်ငံမှာ မြောက်ကိုရီးယားလည်း ပါတာမို့ လူထောင်ချီ သေဆုံးနိုင်တယ်လို့ ပညာရှင်တွေက ပြောပါတယ်။