အမေရိကန်လေတပ်ဟာ မြောက်ကိုရီးယားကို ဆန့်ကျင်တဲ့ နောက်ဆုံး အင်အားပြမှုအဖြစ် ဒီဇင်ဘာ ၂၀ ရက်က F-35 နဲ့ F-15K တိုက်လေယာဉ်တွေနဲ့အတူ ပူးတွဲ စစ်ရေးလေ့ကျင့်မှုအတွက် B-52 ဗျူဟာမြောက် ဗုံးကြဲလေယာဉ်တွေ၊ F-22 တိုက်လေယာဉ်တွေ တောင်ကိုရီးယားကို ပျံသန်းခဲ့ပါတယ်။
လက်ရှိ ဂျပန်နိုင်ငံ အိုကီနာဝါအခြေစိုက် F-22 Raptor ပဉ္စမမျိုးဆက် ကိုယ်ပျောက် တိုက်လေယာဉ်တွေ ပါဝင်တာဟာ တောင်ကိုရီးယားမှာ မဟာမိတ်တွေ ပူးတွဲ စစ်ရေးလေ့ကျင့်မှု ပြုလုပ်ခဲ့တဲ့ ၂၀၁၈ ခုနှစ် မေလကတည်းက သူတို့ရဲ့ ပထမဆုံးဖြစ်ပါတယ်။
မြောက်ကိုရီးယားဟာ လုံခြုံရေးဗျူဟာသစ်မှာ ဖော်ပြထားတဲ့ ဂျပန်စစ်တပ် တည်ထောင်မှုကို ရှုတ်ချလိုက်ပြီး အန္တရာယ်ရှိတဲ့ တုံ့ပြန်မှုတွေ လုပ်ဆောင်မှာဖြစ်ကြောင်းနဲ့ တိုက်ချင်းပစ် ပဲ့ထိန်းဒုံးကျည် နောက်ထပ် စမ်းသပ်မှုတခုကိုလည်း လုပ်ဆောင်မယ်လို့ သတိပေး ကြေညာချက်ထုတ်ပြန်ပြီး နာရီပိုင်းအကြာမှာပဲ အဲဒီ ပူးတွဲစစ်ရေးလေ့ကျင့်မှုကို လုပ်ဆောင်လာတာပါ။
မြောက်ကိုရီးယားဟာ သူ့ရဲ့ အရှေ့ဘက်ကမ်းရိုးတန်းကနေ တာလတ်ပစ် ဒုံးကျည် ၂ စင်းကို ဒီဇင်ဘာ ၁၈ ရက်က ပစ်ခတ်ခဲ့ပြီး ဒါဟာ ဧပြီလမှာ အပြီးသတ်ဖို့ မျှော်လင့်ထားတဲ့ ကင်းထောက်ဂြိုဟ်တု ဖွံ့ဖြိုးတိုးတက်မှုအတွက် “အရေးကြီးတဲ့ စမ်းသပ်မှု” လို့လည်း ခေါ်ဆိုထားပါတယ်။
တာလီဘန်တွေက အာဖဂန်နစ္စတန်နိုင်ငံကို သိမ်းပိုက်လိုက်ပြီးနောက် ကဘူးလ် လေဆိပ်ကနေ ထွက်ခွာမယ့် အမေရိကန်စစ်တပ်ကယ်ဆယ်ရေးလေယာဉ်ကို တွယ်စီး လိုက်ပါခဲ့တဲ့ အာဖဂန်လူငယ်ဘောလုံးသမားလေးဟာ အမြင့်က ပြုတ်ကျသေဆုံးသွားခဲ့တယ်လို့ အာဖဂန်သတင်းအေဂျင်စီက အတည်ပြုပါတယ်။
ဒီအဖြစ်အပျက်ဟာ ပြီးခဲ့တဲ့ တနင်္လာနေ့က ဖြစ်ခဲ့တာဖြစ်ပြီး လွတ်မြောက်ဖို့အတွက် လေယာဉ်ပေါ် တွယ်တက်လိုက်ပါဖို့ ကြိုးစားနေကြတာတွေ၊ လေယာဉ်ပေါ်ကနေ ပြုတ်ကျခဲ့တဲ့ မှတ်တမ်းရုပ်သံတွေ ထွက်ပေါ်လာခဲ့ပြီးနောက် သေဆုံးသူထဲ အသက် ၁၉ နှစ်အရွယ် ဇာကီအန်ဝါရီလည်း ပါဝင်ခဲ့တယ်လို့ အာဖဂန်သတင်းအေဂျင်စီက ရေးသားဖော်ပြထားပါတယ်။
သူဟာ အာဖဂန်အမျိုးသားလူငယ်ဘောလုံးအသင်းက ကစားသမားတယောက် ဖြစ်ပြီး သူ့ရဲ့ ရုပ်အလောင်းက ခန္ဓာကိုယ်အစိတ်အပိုင်းတွေကို လေယာဉ်ရဲ့ ဘီးတွေပေါ် မှာ တွေ့ရှိခဲ့ရတယ်လို့ ဗြိတိန်သတင်းမီဒီယာတခုကလည်း ဖော်ပြပါတယ်။
ကဘူးလ်လေဆိပ်မှာ လွတ်မြောက်ဖို့အတွက် လေယာဉ်ပေါ် တွယ်တက်လိုက်ပါဖို့ ကြိုးစားနေကြတဲ့ အာဖဂန်နစ္စတန်နိုင်ငံသားတွေရဲ့ လှုပ်ရှားမှု ပုံရိပ်တွေဟာ ကမ္ဘာကို တုန်လှုပ်စေခဲ့တဲ့ ပုံရိပ်တွေ ဖြစ်ခဲ့တာပါ။
ဘောလုံးသမား အန်ဝါရီဟာ ဘိုးအင်း စီ-၁၇ လေယာဉ်ပေါ်က ပြုတ်ကျသေဆုံးခဲ့တာ မှန်ကန်ကြောင်း အမေရိကန်လေတပ်နဲ့ အာဖဂန်နစ္စတန် အားကစားဦးစီးဌာနက အတည်ပြုထားပါတယ်။
တာလီဘန်သူပုန်တွေက သမ္မတနန်းတော်ကိုလည်း သိမ်းပိုက်ထားလိုက်ပြီးနောက် အာဖဂန် သမ္မတ အဲ့ရှက်ဖ်ဂါနီ တိုင်းပြည်ကနေထွက်ပြေးသွားတာနဲ့အတူ အာဖဂန်အစိုးရအဖွဲ့လည်း ပျက်သွားခဲ့ပြီ ဖြစ်ပါတယ်။
