အမေရိကန်သမ္မတဟောင်း ဒေါ်နယ်ထရမ့်ဟာ သူ့ရဲ့ ၂၀၂၀ ရွေးကောက်ပွဲမှာ ရှုံးနိမ့်မှုကို ပြောင်းပြန်လှန်ပစ်ဖို့ ဒုတိယသမ္မတဟောင်း မိုက်ပန့်စ်ကို ဖိအားပေးခဲ့တယ်လို့ ပန့်စ်ရဲ့ လက်ထောက်တွေက ဇွန် ၁၆ ရက်မှာ ပြောလိုက်ပါတယ်။

၂၀၂၁ ခုနှစ် ဇန္နဝါရီ ၆ ရက်က အမေရိကန်လွှတ်တော်အဆောက်အဦ တိုက်ခိုက်ခံရမှုကို စုံစမ်းစစ်ဆေးရေး လွှတ်တော်ကော်မတီမှာ ပြောလိုက်တာပါ။

ရီပတ်ဘလီကန်သမ္မတက တောင်းဆိုထားတဲ့အတိုင်း မဲလက်မှတ် တရားဝင်အတည်ပြုခြင်းကို ရပ်တန့်ဖို့ အခွင့်အာဏာမရှိကြောင်း ပန့်စ်က ထရမ့်ကို အကြိမ်ကြိမ်ပြောခဲ့တယ်လို့ ပန့်စ်ရဲ့ ဝန်ထမ်းအကြီးအကဲဖြစ်သူ မာ့ခ်ရှော့တ်က ရုပ်သံမှတ်တမ်းမှာ ပြောကြားခဲ့ပါတယ်။

ဒီလုပ်ငန်းစဉ်ကို ရပ်ဆိုင်းထားခိုင်းတဲ့ သူ့အစီအစဉ်ဟာ ဒုသမ္မတ ပန့်စ်ကို ဥပဒေချိုးဖောက်ရာ ရောက်စေကြောင်း တိုက်ခိုက်မှုမဖြစ်ခင် ၂ ရက်အလိုလောက်က ပြင်ပရှေ့နေ ဂျွန်အိစ်မန်းက ထရမ့်ရဲ့ရှေ့မှောက်မှာ ဝန်ခံပြောကြားခဲ့ကြောင်း ပန့်စ်ရဲ့အကြံပေး ဂရေဂရီ ဂျက်ကော့ဘ်က ပြောပါတယ်။

ပန့်စ်နဲ့ လွှတ်တော်အမတ်တွေဟာ ၂၀၂၀ ခုနှစ် နိုဝင်ဘာလ ရွေးကောက်ပွဲမှာ သမ္မတ ဂျိုးဘိုင်ဒင် အနိုင်ရကြောင်း တရားဝင်အတည်ပြုဖို့ တွေ့ဆုံနေချိန်မှာ ထရမ့်ဟာ သူ့ကို ထောက်ခံသူ အကြမ်းဖက်လူအုပ်က လွှတ်တော်ကို ခြိမ်းခြောက်နေမှန်း သိသိကြီးနဲ့တောင် လှုံ့ဆော်မှုကို ဆက်လုပ်ဆောင်ခဲ့တယ်လို့ ဒီမိုကရက်တစ်ဦးဆောင်တဲ့ အောက်လွှတ်တော် ရွေးချယ်ရေး ကော်မတီအဖွဲ့ဝင်တွေက ပြောပါတယ်။

အဖွဲ့ဝင်ကိုးဦးပါ ကော်မတီဟာ ထရမ့်က သူ့ရှုံးနိမ့်မှုကို ပြောင်းလဲပစ်ဖို့ ကြိုးပမ်းမှုက သာမန်နိုင်ငံရေးထက် ကျော်လွန်ပြီး တရားမဝင်လုပ်ရပ် အပြုအမူတွေကို လုပ်ဆောင်ခဲ့တဲ့အမှုအဖြစ် တည်ဆောက်ဖို့ လုပ်နေတာပါ။

ဒီလထဲမှာလုပ်ဖို့ မှန်းထားတဲ့ လူထုကြားနာပွဲ အနည်းဆုံး ၆ ခုထဲက ၃ ခုကို လုပ်ထားပြီးပါပြီ။

ထရမ့်က သူ အမှားမလုပ်ထားကြောင်း ထပ်ခါတလဲလဲ ငြင်းဆိုခဲ့ပြီး ဒီမိုကရက် ဘိုင်ဒင်ကို အကျိုးရှိစေမယ့် မဲလိမ်လည်မှုကြီးတွေကြောင့်သာ ရွေးကောက်ပွဲမှာ ရှုံးနိမ့်ခဲ့တာဖြစ်ကြောင်း မှားယွင်းတဲ့ စွပ်စွဲချက်တွေကို အကြိမ်ကြိမ် ပြောကြားခဲ့တာပါ။

ထရမ့်နဲ့ ကွန်ဂရက်လွှတ်တော်ထဲက ရီပတ်ဘလီကန်အဖွဲ့ဝင် အများအပြား အပါအဝင် သူ့ကိုထောက်ခံသူတွေဟာ ဇန္နဝါရီ ၆ ရက် အမှုကြားနာစစ်ဆေးတာကို နိုင်ငံရေးပယောဂတခုအဖြစ် ပယ်ချထားပါတယ်။

ရွေးကောက်ပွဲလိမ်လည်မှု စွပ်စွဲချက်တွေဟာ အခြေအမြစ်မရှိတဲ့အကြောင်း သမ္မတဟောင်း ဒေါ်နယ်ထရမ့်ရဲ့ ထိပ်တန်းအကြံပေးပုဂ္ဂိုလ်တွေက ပြောခဲ့ပေမဲ့ ထရမ့်က နားထောင်ဖို့ ငြင်းခဲ့တယ်လို့ အမေရိကန်လွှတ်တော်အဆောက်အဦ အဓိကရုဏ်းဆိုင်ရာ စုံစမ်းစစ်ဆေးရေး ကော်မတီရဲ့ ဇွန် ၁၃ ရက် ကြားနာပွဲ စစ်ချက်အရ သိရပါတယ်။

နိုဝင်ဘာလ ရွေးကောက်ပွဲ ရှုံးနိမ့်ပြီးတဲ့နောက် ပေါ်ထွက်လာတဲ့ စွပ်စွဲချက် အများအပြားဟာ အကျိုးမရှိဘူးလို့ ထရမ့်ကို ပြောခဲ့ကြတယ်လို့ ထရမ့်ရဲ့ မဲဆွယ်စည်းရုံးရေးအဖွဲ့နဲ့ ထရမ့်ရဲ့ အုပ်ချုပ်ရေးအဖွဲ့ထဲမှာ အလုပ်လုပ်နေတဲ့ အရာရှိတွေက စုံစမ်းစစ်ဆေးရေး ကော်မတီကို ပြောခဲ့ကြတာပါ။

ရွေးကောက်ပွဲမှာ ထရမ့်ရှုံးနိမ့်ခဲ့ပြီးတဲ့နောက်မှာ မဲအတုတွေပါတဲ့  "သံသယဖြစ်စရာ သေတ္တာ"၊ ပင်ဆယ်ဗေးနီးယားပြည်နယ်ဆီ မဲတွေကိုသယ်လာတဲ့ ထရပ်ကား၊ အရီဇိုးနားပြည်နယ်ထဲမှာ ကွန်ပျူတာချစ်ပ်တွေကို မဲပေးစက်တွေထဲ လဲထည့်တယ် စတဲ့ အစီရင်ခံစာတွေ ပေါ်ထွက်ခဲ့တာပါ။

သူနဲ့ အဆက်အသွယ်ပြတ်နေတဲ့ ဒီအချက်တွေကို သူတကယ်ယုံကြည်ရင် သူတကယ်လက်တွေ့ကနေ ကင်းကွာနေပြီလို့ ထရမ့်ရဲ့ ရှေ့နေချုပ်လည်းဖြစ်ပြီး သစ္စာခံလို့ ကာလကြာရှည် သိထားကြတဲ့ ဝီလျံ ဘားက ရုပ်သံစစ်ချက်ထဲမှာ ပြောပါတယ်။

မဲလိမ်မှုစွဲချက်တွေဟာ ရူးမိုက်တဲ့ကိစ္စနဲ့ ကလိမ်ကလည် ပြောစကားတွေလို့လည်း သူက ဗြောင်ကျကျ ပြောဆိုခဲ့ပါတယ်။

တနင်္လာနေ့ ကြားနာပွဲဟာ ထရမ့်က သူ့ဝန်ထမ်းတွေရဲ့ အကြံပြုချက်ကို လျစ်လျူရှုခဲ့သလားဆိုတာ ဖော်ထုတ်မှုလုပ်ဖို့ ကြိုးစားထားတာပါ။

ထရမ့်က ၂၀၂၀ သမ္မတရွေးကောက်ပွဲဟာ သူ့ဆီက မဲခိုးယူထားတာလို့ အခိုင်အမာပြောရင်း သူ့ကိုထောက်ခံသူတွေ လွှတ်တော်ဆီ ချီတက်ကြဖို့ အားပေးခဲ့ပါတယ်။

ထရမ့်ဟာ သူအမှားမလုပ်ထားဘူးလို့ ငြင်းရင်း ရွေးကောက်ပွဲမရှုံးဘူးလို့ ထပ်ခါတလဲလဲ အခိုင်အမာ ပြောဆိုခဲ့ပေမဲ့ စုံစမ်းစစ်ဆေးရေးကော်မတီကလည်း နိုင်ငံရေးပယောဂတခုအဖြစ် ပြောဆို ပယ်ချခဲ့ပါတယ်။