ထိုင်ဝမ်ကျွန်းဟာ ထိုင်ဝမ်ရေလက်ကြားမှာ လက်ရှိအနေအထားအတိုင်း တည်ငြိမ်နေစေဖို့ ကတိပြုထားတယ်လို့ ထိုင်ဝမ်သမ္မတ ချိုက်အင်းဝမ်က သြဂုတ် ၁၅ ရက်မှာ အလည်အပတ် ရောက်နေတဲ့ အမေရိကန်လွှတ်တော်အမတ်တွေကို ပြောပါတယ်။

ဩဂုတ်လအစောပိုင်းက အမေရိကန်အောက်လွှတ်တော်ဥက္ကဋ္ဌ နန်စီ ပေလိုစီရဲ့ ခရီးစဉ်အပြီး အထက်လွှတ်တော်အမတ် အဒ်မာကီ ဦးဆောင်တဲ့ အမေရိကန်လွှတ်တော်အမတ် ငါးဦးဟာ ဒုတိယအဆင့်မြင့်အဖွဲ့အနေနဲ့ သြဂုတ် ၁၄ ရက်နှောင်းပိုင်းမှာ တိုင်ပေမြို့ကို ရောက်လာခဲ့တာပါ။

တရုတ်ပြည်မကြီးအစိုးရက ထိုင်ဝမ်ရေလက်ကြားနဲ့ ဒေသထဲမှာ စစ်ရေးလေ့ကျင့်နေလို့ တင်းမာမှုတွေ မြင့်တက်လာချိန်မှာ မာကီ ဦးဆောင်တဲ့ ကိုယ်စားလှယ်အဖွဲ့ ထိုင်ဝမ်ကို အလည်အပတ် လာရောက်တာဟာ အမေရိကန်လွှတ်တော်ရဲ့ ထိုင်ဝမ်ဘက်ကို အခိုင်အမာ ထောက်ခံမှုကို ပြသလိုက်တာလို့ ထိုင်ဝမ်သမ္မတရုံးက ကြေညာချက် ထုတ်ပြန်ခဲ့ပါတယ်။

အမေရိကန်-တိုင်ပေ ဆက်ဆံရေး၊ ဒေသတွင်းလုံခြုံရေး၊ ကုန်သွယ်မှုနဲ့ ရင်းနှီးမြှုပ်နှံမှု၊ ကမ္ဘာလုံးဆိုင်ရာ ထောက်ပံ့ရေးကွင်းဆက်တွေ၊ ရာသီဥတု ဖောက်ပြန်မှုနဲ့ တခြား အကျိုးစီးပွားဆိုင်ရာ အရေးပါတဲ့ ကိစ္စရပ်တွေကို ဆွေးနွေးဖို့ ကိုယ်စားလှယ်အဖွဲ့ဟာ ထိုင်ဝမ် ထိပ်တန်းခေါင်းဆောင်တွေနဲ့ တွေ့ဆုံမယ်လို့ အမေရိကန်သံရုံးက ထုတ်ပြန်ချက်ထဲမှာ ဖော်ပြထားပါတယ်။

ထိုင်ဝမ်ကို စွန့်လွှတ်တာဟာ  ဒီမိုကရေစီနဲ့ လွတ်လပ်မှုကို စွန့်လွှတ်တာဖြစ်တယ်လို့   ထိုင်ဝမ်မှာ ရောက်ရှိနေတဲ့ အမေရိကန်လွှတ်တော်ကိုယ်စားလှယ်အဖွဲ့မှ ရီပတ်ဘလစ်ကန်အမတ် လင်းဆေးဂရေဟမ်က ပြောလိုက်ပါတယ်။ 

အမေရိကန်လွှတ်တော်ကိုယ်စားလှယ် ၆ ဦးအဖွဲ့ဟာ ဧပြီ ၁၄ ရက်က ထိုင်ဝမ်ကို မကြေညာပဲ ရောက်ရှိလာခဲ့ပြီး ထိုင်ဝမ်သမ္မတ မစ္စဆိုင်အင်းဝမ်နဲ့ တွေ့ဆုံခဲ့ပါတယ်။

ထိုင်ဝမ်ကို သမ္မတဂျိုးဘိုင်ဒင်အစိုးရက လက်နက်အကူအညီတွေ ဆက်ပေးထားပြီး၊ ဒီမိုကရေစီနည်းကျ အုပ်ချုပ်နေတဲ့ ကျွန်းနိုင်ငံကို  “ကြံ့ခိုင်သောကျောက်တုံးကြီး” လို့  မကြာခဏ ခေါ်ဝေါ်တာပါ။ 

သမ္မတဆိုင်အင်းဝမ်က ယူကရိန်းကို ရုရှားရဲ့ကျူးကျော်မှုက ဒီမိုကရေစီနိုင်ငံတွေ ပိုမို စုစည်းမိစေပြီး အာဏာရှင်နိုင်ငံတွေရဲ့ ဒေသတွင်း ခြိမ်းခြောက်မှုတွေကို ပိုမိုကာကွယ်ကြရမယ်လို့ ပြောပါတယ်။ 

အဆိုပါ အမေရိကန်လွှတ်တော်အမတ်တွေရဲ့ ထိုင်ဝမ်ခရီးစဉ်က တရုတ်အစိုးရကို အလွန်ဒေါသ ထွက်စေပါတယ်။ တရုတ်က ထိုင်ဝမ်ကျွန်းကို သူ့နိုင်ငံရဲ့ ပြည်နယ်တခုလို့ သတ်မှတ်ထားတာပါ။