အယ်လ်‌ဘေးနီးယားနိုင်ငံမှာ အဂတိလိုက်စားမှု၊ ဆင်းရဲမွဲတေမှု မြင့်တက်လာပြီး နိုင်ငံထဲကနေ ထွက်ခွာသူဦးရေ တိုးများလာတဲ့အရေး  ဆန့်ကျင်ဆန္ဒပြဖို့ သောင်းနဲ့ချီတဲ့လူတွေ နိုဝင်ဘာ ၁၂ ရက်က စုဝေးခဲ့ကြပါတယ်။

ဝန်ကြီးချုပ် အီဒီရာမာရဲ့ ရုံးခန်းရှေ့မှာ အတိုက်အခံ ဆန္ဒပြသူတွေဟာ ရဲတွေနဲ့ ရုန်းရင်းဆန်ခတ် ဖြစ်ခဲ့ကြပါတယ်။

သုံးနာရီလောက် ငြိမ်းငြိမ်းချမ်းချမ်း ဆန္ဒပြပြီးတဲ့နောက် ဆန္ဒပြသူတွေဟာ အစိုးရအဆောက်အအုံ ပတ်ဝန်းကျင်ရှိ ရဲအတားအဆီးတွေကို ဖြတ်ကျော်ရင်း အနီရောင်နဲ့ အနက်ရောင်ဆေးတွေနဲ့ ပက်ခဲ့ကြပါတယ်။

ဆန္ဒပြသူတဦးကို ရဲက ဖမ်းဆီးခဲ့ပြီး တခြားသူတွေကတော့ ရဲအချုပ်မှာ သေဆုံးခဲ့တဲ့ အမျိုးသားနှစ်ယောက်အတွက် အမှတ်ရဖို့ ဖယောင်းတိုင်မီး ထွန်းထားကြပါတယ်။

ဗြိတိန်ကိုရောက်လာတဲ့ အယ်လ်ဘေးနီးယန်း နိုင်ငံသားအရေအတွက် တိုးမြင့်လာတာကို ရည်ညွှန်းပြီး “လွန်ခဲ့တဲ့ ၃၂ နှစ်ကလိုပဲ ကမ္ဘာကြီးက ကျနော်တို့ကို လှေငယ်တွေနဲ့ ရောက်လာတယ်လို့ မြင်နေပါတယ်” လို့ အတိုက်အခံ ဒီမိုကရက်တစ်ပါတီခေါင်းဆောင် ဆာလီ ဘာရီရှာက ပြောပါတယ်။

အင်္ဂလိပ်ရေလက်ကြားကိုဖြတ်ကူးတဲ့ ရွှေ့ပြောင်းအခြေချသူတွေ အယ်လ်ဘေးနီးယန်း နိုင်ငံသားတွေ များလာနေပြီး တချို့က ရာဇဝတ်မှုတွေမှာ ပါဝင်ပတ်သက်နေတယ်လို့ ဗြိတိန်ဝန်ကြီးတွေက ပြောပါတယ်။

၂၀၂၃ ခုနှစ် မေလမှာ ဒေသန္တရ ရွေးကောက်ပွဲတွေမတိုင်မီ ကြိုးပမ်းမှုအဖြစ် အယ်လ်ဘေးနီးယား ဆန္ဒပြမှုကို ရှုမြင်ထားကြပါတယ်။

အရင်က သမ္မတနဲ့ ဝန်ကြီးချုပ်အဖြစ် တာဝန်ထမ်းဆောင်ခဲ့ဖူးတဲ့ ဘာရီရှာဟာ အကျင့်ပျက်ခြစားမှု စွပ်စွဲချက်နဲ့ အမေရိကန်နိုင်ငံဆီ ပြည်ဝင်ခွင့်ကို ၂၀၂၁ ခုနှစ်မှာ တားမြစ်ခံခဲ့ရပါတယ်။ သူကတော့ ဘယ်အမှားမှ မလုပ်ထားဘူးလို့ ငြင်းထားပါတယ်။

အယ်လ်ဘေးနီးယားနိုင်ငံဟာ အီရန်အစ္စလာမ္မစ်သမ္မတနိုင်ငံကို ဆိုက်ဘာတိုက်ခိုက်မှု ကျူးလွန်ခဲ့ကြောင်း စွပ်စွဲခဲ့ပြီးတော့ အီရန်နဲ့ သံတမန်ဆက်ဆံရေး ဖြတ်တောက်ခဲ့ပြီးနောက်မှာ အီရန်သံတမန်တွေဟာ စက်တင်ဘာ ၇ ရက် ညနေပိုင်းက အယ်လ်ဘေးနီးယားကနေ မထွက်ခွာခင် နာရီပိုင်းအလိုမှာ စာရွက်စာတမ်းတွေကို မီးရှို့ဖျက်ဆီးခဲ့ကြပါတယ်။

ဗုဒ္ဓဟူးနေ့က ရှားရှားပါးပါး ဗီွဒီယိုမိန့်ခွန်းထဲမှာ အယ်လ်ဘေးနီးယားဝန်ကြီးချုပ် အက်ဒီ ရာမာက အီရန်သံတမန်တွေနဲ့ ဝန်ထမ်းတွေကို သံရုံးပိတ်ပြီး ၂၄ နာရီအတွင်း နိုင်ငံတွင်းကနေ ထွက်ခွာဖို့ အမိန့်ပေးခဲ့ကြောင်း ပြောကြားခဲ့ပါတယ်။

ဇူလိုင်လ ဆိုက်ဘာတိုက်ခိုက်မှုကြောင့် အများပြည်သူဝန်ဆောင်မှုတွေကို ပျက်ပြားသွားစေတာ၊ ဒစ်ဂျစ်တယ်စနစ်တွေကို ဖျက်ဆီးပစ်ပြီး နိုင်ငံပိုင်မှတ်တမ်းတွေကို ခိုးဝင်ထွင်းဖောက်တာ၊ အစိုးရ အင်ထရာနက် အီလက်ထရွန်နစ်ဆက်သွယ်ရေးကို ခိုးယူပြီး တိုင်းပြည်မငြိမ်သက်မှုတွေနဲ့ မလုံခြုံမှုတွေကို နှိုးဆော်နေကြောင်း ရာမာက ပြောကြားခဲ့ပါတယ်။

အယ်လ်ဘေးနီးယားရဲ့ အနီးကပ်ဆုံး မဟာမိတ်ဖြစ်တဲ့ ဝါရှင်တန်ကလည်း အဲဒီတိုက်ခိုက်မှုအတွက် အီရန်ကို အပြစ်တင်ခဲ့ပြီး အမေရိကန်ရဲ့ မဟာမိတ်လုံခြုံရေးကို ခြိမ်းခြောက်တဲ့ လုပ်ရပ်တွေအတွက် အီရန်ကို ထပ်အရေးယူဖို့ တာဝန်ရှိကြောင်း ကတိပြုခဲ့ပါတယ်။

သံတမန်ဆက်ဆံရေးဖြတ်တောက်ဖို့ တီရာနာရဲ့ ဆုံးဖြတ်ချက်ကို တီဟီရန်က ပြင်းပြင်းထန်ထန် ရှုတ်ချခဲ့ပြီး ဒီလုပ်ရပ်အတွက် အယ်လ်ဘေးနီးယားရဲ့ အကြောင်းပြချက်တွေက အခြေအမြစ်မရှိတဲ့ စွပ်စွဲချက်တွေလို့ ခေါ်ဆိုလိုက်ပါတယ်။

စက်တင်ဘာ ၈ ရက် မနက်ပိုင်းကတော့ ဝန်ကြီးချုပ်ရုံးနဲ့ မီတာ ၂၀၀ အကွာမှာရှိတဲ့ တီရာနာရှိ သံရုံးအပြင်ဘက်မှာ ငြိမ်သက်နေပါတယ်။