ကမ္ဘာမှာ ကိုဗစ်-၁၉ ရောဂါနဲ့ သေဆုံးမှုအမြင့်မားဆုံးနိုင်ငံတနိုင်ငံဖြစ်တဲ့ ပီရူးမှာ အိုမီခရွန်ကူးစက်မှု မြင့်မားလာပြီး တတိယလှိုင်းဝင်ရောက်လာနေတာကြောင့် မြို့ကြီးတွေမှာ အရေးပေါ် အဆင့်ကြေညာပြီး တင်းကျပ်တဲ့ ကန့်သတ်မှုတွေ လုပ်နေရပါတယ်။

ပီရူးကျန်းမာရေးဝန်ကြီးက ပြီးခဲ့တဲ့တပတ်အတွင်း နေ့စဉ်ကူးစက်မှုအရေအတွက် ၂၅ ရာခိုင်နှုန်းထိ မြင့်လာတာကြောင့် မြို့တော်လီမာနဲ့ ပြည်နယ်၂၄ ခုမှာ ညမထွက်ရကို ညနေ ၅ နာရီမှ မနက် ၅ နာရီအထိ တိုးလိုက်တယ်လို့ ပြောပါတယ်။ 

ဝန်ကြီးက “ဗိုင်းရပ်စစ်ပိုးအသစ် ဒယ်လ်တာနဲ့ အိုမီခရွန်တို့ရဲ့ ကူးစက်မှုနှုန်းက အရမ်းမြန်ပါတယ်၊ ကိုဗစ်-၁၉ ကူးစက်ခံရသူအားလုံးရဲ့  တဝက်ကျော်က အိုမီရွန်ကြောင့်ပါ။ သေဆုံးမှုအရေအတွက်  မများသေးပေမဲ့၊ ဆေးမထိုးရသေးသူတွေပဲ သေဆုံးတာပါ” လို့ပြောပါတယ်။  

တောင်အမေရိကတိုက်ရှိ ပီရူးနိုင်ငံမှာ လူဦးရေ ၃၃ သန်းရှိပြီး ၈၀ ရာခိုင်နှုန်းနီးပါး ကာကွယ်ဆေးနှစ်ကြိမ် ထိုးပြီးသားပါ။ 

ကျန်းမာရေးဝန်ကြီးဌာန မကြာခင်က ထုတ်ပြန်ချက်အရ ကိုဗစ်-၁၉ ကူးစက်သူ ၂ ဒသမ ၃ သန်း ရှိပြီး၊ သေဆုံးသူ ၂၀၂,၉၀၄ ဦး ရှိပါပြီ။

ကနေဒါနိုင်ငံ အနောက်ပိုင်းမှာ စံချိန်ကျိုးအောင် အပူချိန်မြင့်တက်မှုကြောင့် ဇွန် ၃၀ ရက်ကတည်းက စတင်လောင်ကျွမ်းခဲ့တဲ့ တောမီးကြောင့် ဗြိတိသျှ-ကိုလံဘီယာအလယ်ပိုင်းရှိ Lytton မြို့က ဒေသခံတွေကို အာဏာပိုင်တွေက မြို့ကနေ အတင်းအကျပ် ထွက်ခွာစေပြီး အရေးပေါ် နေရာပြောင်းရွှေ့ခိုင်းရပါတယ်။ 

စံချိန်တင်မြင့်မားတဲ့ အပူချိန်တွေကြားမှာ ကနေဒါအနောက်ပိုင်းနဲ့ အမေရိကန် အနောက်မြောက်ပိုင်းဒေသတွေကို ပျက်စီးစေမယ့် ပြင်းထန်လွန်းတဲ့ အပူလှိုင်းကနေ ရာသီဥတု ဆိုးရွားမှုနဲ့ တောမီး အန္တရာယ်တွေအတွက် အာဏာပိုင်တွေ ကြိုတင်ပြင်ဆင်ထားရပါတယ်။

 ဒီတပတ်  Lytton မြို့ဟာ ကနေဒါနိုင်ငံရဲ့ အပူချိန်အမြင့်ဆုံးစံချိန်ကို ၃ ဆ တက်တာ ကြောင့် Lytton မြို့တော်ဝန် Jan Polderman က မြို့လူထု ၂၅၀ ကို မြို့ကနေ အမြန်ထွက်သွားဖို့ ညွှန်ကြားခဲ့ပါတယ်။ 

မီးက တမြို့လုံးကို ဆိုးဆိုးရွားရွား လောင်နေတာဖြစ်ပြီး မီးခိုးငွေ့လေးကနေ ၁၅ မိနစ်အတွင်းကို ရုတ်တရက် အကုန်လောင်ကျွမ်းတာ လို့ မြို့တော်ဝန် Polderman က CBC သတင်းဌာနကို ပြောပါတယ်။ 

Lytton မြောက်ဘက်ရှိ တခြား အိမ်ခြံမြေ ၈၇ ခုမှာ နေထိုင်သူတွေကိုလည်း ထွက်ခွာဖို့ အမိန့်ပေးခဲ့ပါတယ်။ 

တစ်နာရီကို ၇၁ ကီလိုမီတာ (၄၄ မိုင်) အထိ စံချိန်တင်တိုက်ခတ်တဲ့ လေပြင်းကြောင့် မီးလောင်ရာလေပင့် ဖြစ်ခဲ့ရပြီး တောမီးဟာ မြို့ရဲ့နေရာအတော်များများကို ဖျက်ဆီးခဲ့ပါတယ်။

 မီးလောင်ရတဲ့အကြောင်းရင်းကို စုံစမ်းစစ်ဆေးနေတယ်လို့ ဗြိတိသျှ-ကိုလံဘီယာ ၀န်ကြီးချုပ် John Horgan က သတင်းထောက်တွေကို ပြောပါတယ်။ 

ပြီးခဲ့တဲ့ ၂၄ နာရီအတွင်း ဗြိတိသျှ-ကိုလံဘီယာမှာ မီးလောင်မှုအသစ် ၆၂ ခုဖြစ်ပွားကြောင်း အစီရင်ခံထားတယ်လို့ Horgan က ပြောပါတယ်။ 

တချို့နေထိုင်သူတွေဟာ စာရင်းမှတ်တမ်း မရှိကြောင်းနဲ့ Lytton မြို့က နေအိမ်နဲ့ အဆောက်အအုံ အတော်များများ ဆုံးရှုံးခဲ့ရတယ်လို့ ဗြိတိသျှ-ကိုလံဘီယာမှ တာဝန်ရှိသူတွေက ပြောပါတယ်။