ဆီးဂိမ်းဘောလုံးပြိုင်ပွဲအုပ်စု A မှာ မြန်မာယူ၂၂ အသင်းက အရှေ့တီမောအသင်းကို အကြိတ်အနယ် ကစားခဲ့ပြီး ၁ ဂိုး ဂိုးမရှိနဲ့ အနိုင်ရရှိခဲ့ပါတယ်။ 

မြန်မာယူ ၂၂ အသင်းဟာ ပထမပိုင်းမှာ အရှေ့တီမောအသင်းကို ဖိအားပေးကစားနိုင်ခဲ့ပေမဲ့ အဆုံးသတ်ပိုင်းလွဲချော်မှုတွေကြောင့် ဂိုးမသွင်းနိုင်ခဲ့ဘဲ ဒုတိယပိုင်း ၇၃ မိနစ်ရောက်မှ ဦးဆောင်ဂိုးစတင်ရရှိခဲ့တာပါ။ ထောင့်ကန်ဘောကနေတဆင့် ပြန်ကျလာတာကို နောက်ခံလူ သက်ဟိန်းစိုးက ပိတ်သွင်းယူခဲ့တာပါ။ 

အဲဒီနောက်ပိုင်းမှာ အရှေ့တီမောက ပိုမိုဖိအားပေးကစားနိုင်ခဲ့ပေမဲ့ မြန်မာခံစစ်ပိုင်းက ခုခံတားဆီးနိုင်ခဲ့တာကြောင့် ပွဲအပြီးမှာ ၁ ဂိုး ဂိုးမရှိနဲ့ မြန်မာအသင်းက နိုင်ပွဲရရှိခဲ့တာပါ။ 

မြန်မာအသင်းဟာ မေ ၄ ရက်မှာ အင်ဒိုနီးရှားယူ ၂၂ အသင်းနဲ့ ဆက်ပြီး ယှဉ်ပြိုင်သွားရမှာဖြစ်ပါတယ်။ မြန်မာယူ ၂၂ အသင်းက အိမ်ရှင်ကမ္ဘောဒီးယား၊ ဖိလစ်ပိုင်၊ အင်ဒိုနီးရှား၊ အရှေ့တီမောတို့နဲ့အတူ အုပ်စု A မှာ ကျရောက်နေတာပါ။ 

အုပ်စုပတ်လည် ကစားအပြီးမှာ အုပ်စုပထမနဲ့ ဒုတိယနှစ်သင်း ဆီမီးဖိုင်နယ် တက်ရောက်ကစားခွင့်ရရှိမှာဖြစ်ပါတယ်။ 

တဖက်အုပ်စု B မှာတော့ ထိုင်း၊ ဗီယက်နမ်၊ မလေးရှား၊ စင်ကာပူနဲ့ လာအိုအသင်းတို့ တအုပ်စုတည်း တွေ့ဆုံနေတာဖြစ်ပါတယ်။

နိုင်ငံရေးနဲ့ စီးပွားရေး တည်ငြိမ်မှု စိုးရိမ်နေရတဲ့ အာရှရဲ့ နုနယ်တဲ့ ဒီမိုကရေစီနိုင်ငံ အရှေ့တီမောမှာ မတ် ၁၉ ရက် စနေနေ့က ပဉ္စမအကြိမ်မြောက် သမ္မတရွေးကောက်ပွဲကျင်းပခဲ့ပါတယ်။ 

ယှဉ်ပြိုင်တဲ့ သမ္မတလောင်း ၁၆ ဦး ရှိပြီး တော်လှန်ရေးခေါင်းဆောင် လက်ရှိသမ္မတ ဖရန်စစ္စကို လူအိုလို ဂူတာရပ်စ်၊ စာပေနိုဘယ်လ်ဆုရှင် ဟိုဆေးရာမို့စ်ဟော်တာနဲ့ ကက်သလစ်ဘုန်ကြီးဟောင်း တဦးတို့လည်း ပါဝင်ပါတယ်။

သမ္မတဂူတာရက်စ် ကိုယ်တိုင် မဲရုံကို လာရောက် မဲပေးတာပါ။ 

တီမော အမျိုးသားတက္ကသိုလ်က ရွေးကောက်ပွဲမတိုင်မီ ကောက်ယူတဲ့ စစ်တမ်းအရ အသက် ၇၂ နှစ်ရှိ ရာမို့စ်ဟောတာက ၃၉ ရာခိုင်နှုန်းနဲ့ ရှေ့က ပြေးနေပါတယ်။ 

လူဦးရေ ၁ ဒသမ ၃ သန်းရှိတဲ့ အရှေ့တီမောရဲ့ နိုင်ငံရေးစနစ်မှာ သမ္မတက အုပ်ချုပ်ရေး အာဏာအချို့ကို ခွဲဝေထားပေမဲ့ အစိုးရတဖွဲ့လုံးကို ခန့်အပ်တာပါ။ သမ္မတက ဝန်ကြီးတွေကို ဖြုတ်ချခွင့်ရှိသလို ပါလီမန်ကိုလည်း ဖျက်သိမ်းခွင့် ရှိပါတယ်။

အခုရွေးကောက်ပွဲမှာ သမ္မတလောင်းတဦး ပြတ်ပြတ်သားသား အနိုင်မရခဲ့ရင်၊ မဲအများဆုံးရတဲ့ ထိပ်ဆုံးနှစ်ဦး ဧပြီ ၁၉ ရက်မှာ ပြန်ယှဉ်ပြိုင်ကြရမှာပါ။