ဆီးဂိမ်းဘောလုံးပြိုင်ပွဲအုပ်စု A မှာ မြန်မာယူ၂၂ အသင်းက အရှေ့တီမောအသင်းကို အကြိတ်အနယ် ကစားခဲ့ပြီး ၁ ဂိုး ဂိုးမရှိနဲ့ အနိုင်ရရှိခဲ့ပါတယ်။ 

မြန်မာယူ ၂၂ အသင်းဟာ ပထမပိုင်းမှာ အရှေ့တီမောအသင်းကို ဖိအားပေးကစားနိုင်ခဲ့ပေမဲ့ အဆုံးသတ်ပိုင်းလွဲချော်မှုတွေကြောင့် ဂိုးမသွင်းနိုင်ခဲ့ဘဲ ဒုတိယပိုင်း ၇၃ မိနစ်ရောက်မှ ဦးဆောင်ဂိုးစတင်ရရှိခဲ့တာပါ။ ထောင့်ကန်ဘောကနေတဆင့် ပြန်ကျလာတာကို နောက်ခံလူ သက်ဟိန်းစိုးက ပိတ်သွင်းယူခဲ့တာပါ။ 

အဲဒီနောက်ပိုင်းမှာ အရှေ့တီမောက ပိုမိုဖိအားပေးကစားနိုင်ခဲ့ပေမဲ့ မြန်မာခံစစ်ပိုင်းက ခုခံတားဆီးနိုင်ခဲ့တာကြောင့် ပွဲအပြီးမှာ ၁ ဂိုး ဂိုးမရှိနဲ့ မြန်မာအသင်းက နိုင်ပွဲရရှိခဲ့တာပါ။ 

မြန်မာအသင်းဟာ မေ ၄ ရက်မှာ အင်ဒိုနီးရှားယူ ၂၂ အသင်းနဲ့ ဆက်ပြီး ယှဉ်ပြိုင်သွားရမှာဖြစ်ပါတယ်။ မြန်မာယူ ၂၂ အသင်းက အိမ်ရှင်ကမ္ဘောဒီးယား၊ ဖိလစ်ပိုင်၊ အင်ဒိုနီးရှား၊ အရှေ့တီမောတို့နဲ့အတူ အုပ်စု A မှာ ကျရောက်နေတာပါ။ 

အုပ်စုပတ်လည် ကစားအပြီးမှာ အုပ်စုပထမနဲ့ ဒုတိယနှစ်သင်း ဆီမီးဖိုင်နယ် တက်ရောက်ကစားခွင့်ရရှိမှာဖြစ်ပါတယ်။ 

တဖက်အုပ်စု B မှာတော့ ထိုင်း၊ ဗီယက်နမ်၊ မလေးရှား၊ စင်ကာပူနဲ့ လာအိုအသင်းတို့ တအုပ်စုတည်း တွေ့ဆုံနေတာဖြစ်ပါတယ်။