နာဂေါ်နို-ကရာဘာ့ခ် ခွဲထွက်နယ်မြေကို ပိတ်ဆို့ထားမှုဟာ အခုဆို သီတင်းနှစ်ပတ်ရှိလာပြီဖြစ်လို့ အစာရေစာ ပြတ်လပ်နေပြီလို့ အာမေးနီးယန်းဝန်ကြီးချုပ် နီကိုးလ်ပါရှင်ယန်က ဒီဇင်ဘာ ၂၃ ရက်မှာ ပြောကြားလိုက်ပြီး အဇာဘိုင်ဂျန်ကို အပြစ်တင်လိုက်ပါတယ်။

ပါရှင်ယန်ဟာ နာဂေါ်နို - ကရာဘာ့ခ် အဝိုင်းနဲ့ ချိတ်ဆက်ထားတဲ့ အဇာဘိုင်ဂျန်ကို ဖြတ်သွားတဲ့ လမ်းကြောင်းကို ဆက်ဖွင့်ထားဖို့ ပျက်ကွက်မှုအတွက် ရုရှားငြိမ်းချမ်းရေးထိန်းသိမ်းမှုတပ်တွေကို ဝေဖန်ခဲ့ပါတယ်။

အာမေးနီးယန်းဝန်ကြီးချုပ်က သူဟာ အဇာဘိုင်ဂျန်ဆီကို လမ်းကြောင်းပိတ်ဆို့ထားမှုကို ရုပ်သိမ်းပေးဖို့ စည်းကမ်းချက်တွေကို အဆိုပြုခဲ့ကြောင်း ပြောပါတယ်။ 

အဇာဘိုင်ဂျန်ကလည်း သူတို့ဟာ နာဂေါ်နို-ကရာဘာ့ခ် နယ်မြေမှာ တရားမဝင် အာမေးနီးယန်း သတ္တုတူးဖော်မှုကို ဆန့်ကျင်တဲ့ အစစ်အမှန် ဆန္ဒပြမှုမှာ ပါဝင်ခဲ့ကြပြီးတော့ ရုရှားငြိမ်းချမ်းရေးတပ်တွေက အဲဒီလမ်းကို ပိတ်ခဲ့တာလို့ ဆိုပါတယ်။ 

ကရင်မလင် ပြောရေးဆိုခွင့်ရှိသူ ဒီမီထရီ ပက်စ်ကော့ဗ် က ၂၀၂၀ ပြည့်နှစ် နောက်ဆုံးစစ်ပွဲအပြီးမှာ တပ်ချထားခဲ့တဲ့ ရုရှားငြိမ်းချမ်းရေးတပ်တွေဟာ သူတို့ရဲ့လုပ်ပိုင်ခွင့်နဲ့အညီ ငြိမ်းချမ်းရေးနဲ့ တည်ငြိမ်မှုရှိအောင် လုပ်ဆောင်နေတာဖြစ်ကြောင်း ပြောကြားခဲ့ပါတယ်။ 

နာဂေါ်နို-ကရာဘာ့ခ် ဒေသရှိ အာမေးနီးယန်းတွေဟာ စားနပ်ရိက္ခာ၊ ဆေးဝါး၊ လောင်စာဆီနဲ့ တခြားလိုအပ်တဲ့ ကုန်ပစ္စည်းတွေ ရရှိဖို့ လာချင်န် စင်္ကြံပေါ်မှာ မှီခိုနေရတာပါ။

ဒီဇင်ဘာ ၂၂ ရက်မှာတော့ ဒေသဆိုင်ရာမြို့တော် စတွတ်ပါးနာကာ့ထ် မှ ဒေသခံတွေဟာ မရှိမဖြစ် လိုအပ်တဲ့ ဆေးဝါးတွေနဲ့ အစားအစာတွေ ပြတ်လပ်မှုနဲ့ ရင်ဆိုင်နေရကြောင်း ပြောကြားခဲ့ပါတယ်။

အိမ်ဖြူတော်က ထုတ်ပြန်ချက်မှာတော့ လာချင်န် စင်္ကြံလမ်းကို အဟန့်အတားနဲ့ ဒီအခြေအနေရဲ့ လူသားချင်းစာနာမှုဆိုင်ရာ ဂယက်ရိုက်ခတ်မှုတွေ ကြီးထွားလာမှုအပေါ် စိုးရိမ်ပူပန်ကြောင်း အိမ်ဖြူတော် အမျိုးသားလုံခြုံရေးအကြံပေး ဂျိတ်ခ် ဆူလီဗန်က မှတ်ချက်ပြုထားပြီး စင်္ကြံတလျှောက် လွတ်လပ်စွာ သွားလာလှုပ်ရှားခွင့် အပြည့်အဝ ပြန်လည်ထူထောင်ပေးဖို့ တောင်းဆိုထားကြောင်း ဖော်ပြထားပါတယ်။ 

လူသားချင်းစာနာထောက်ထားမှုဆိုင်ရာ ကုန်ပစ္စည်းတွေပါရှိတဲ့ မော်တော်ကားတွေ ဖြတ်သန်း သွားလာနိုင်စေဖို့ အဇာဘိုင်ဂျန် အာဏာပိုင်တွေနဲ့ ရုရှားငြိမ်းချမ်းရေးတပ်တွေကို အမေရိကန် အခြေစိုက် လူ့အခွင့်အရေး စောင့်ကြည့်ရေးအဖွဲ့က အခုသီတင်းပတ်အတွင်း တောင်းဆို ထားပါတယ်။ 

အာမေးနီးယားနဲ့ အဇာဘိုင်ဂျန် နှစ်နိုင်ငံ ခေါင်းဆောင်တွေဟာ သူတို့ရဲ့  ငြိမ်းချမ်းရေးအတွက် ဆန္ဒတွေကို ထုတ်ဖော်ပြောဆိုခဲ့ကြတယ်လို့  အမေရိကန် နိုင်ငံခြားရေးဝန်ကြီး  အန်တိုနီ ဘလင်ကန်က ပြောပါတယ်။

ဝန်ကြီးချုပ် ပါရှင်ညဏ်နဲ့  သမ္မတ အာလီယာ့ဗ်တို့ ခေါင်းဆောင်နှစ်ယောက်စလုံးက ငြိမ်းချမ်းရေးအတွက် အဆင်သင့်ပါပဲလို့ ပြောခဲ့ကြောင်း နယူးယောက်မြို့မှာ စက်တင်ဘာ ၁၉ ရက်က  နှစ်နိုင်ငံ ကိုယ်စားလှယ်အဖွဲ့တွေနဲ့ တွေ့ဆုံချိန်မှာ  ဝန်ကြီး ဘလင်ကန်က ပြောပါတယ်။

ခိုင်မာပြီး ရေရှည်တည်တံ့တဲ့ သံတမန်ဆက်ဆံရေးဟာ လူတိုင်းအတွက် အကောင်းဆုံးလမ်းကြောင်းဖြစ်တယ်လို့လည်း ဆိုပါတယ်။ 

အာမေးနီးယားနဲ့ အဇာဘိုင်ဂျန်ကြား ခြားနားချက်ကို စစ်ရေးအရ ဖြေရှင်းမှုမရှိသေးပေမဲ့ သံခင်းတမန်ခင်းအားဖြင့် ကွဲလွဲမှုတွေကို ဖြေရှင်းနိုင်တဲ့ တာရှည်ခံ ငြိမ်းချမ်းရေးလမ်းစ ရှိတယ်လို့ ထင်မြင်ပြီး အမေရိကန်ပြည်ထောင်စုအနေနဲ့ ပဋိပက္ခတွေ အဆုံးသတ်ရေးအတွက် ဒီကြိုးပမ်းမှုတွေကို ပံ့ပိုးပေးဖို့ တတ်နိုင်သမျှ လုပ်ဆောင်ဖို့ ပြင်ဆင်ထားကြောင်းလည်း ဘလင်ကန်က  ပြောပါတယ်။

အခုသီတင်းပတ်အတွင်း အာမေးနီးယားနဲ့ အဇာဘိုင်ဂျန်တို့ကြား နယ်စပ်တိုက်ပွဲတွေကြောင့် လူပေါင်း ၂၀၀ ကျော် သေဆုံးခဲ့တာဖြစ်ပါတယ်။

အာမေးနီးယားနဲ့ အဇာဘိုင်ဂျန် နှစ်နိုင်ငံစလုံးဟာ အငြင်းပွားနေတဲ့ နာဂေါနို-ကရာဘာ့ဂ် ဒေသက တိုက်ပွဲတွေအတွက် အပြန်အလှန် အပြစ်တင်ကြပါတယ်။ 

အဇာဘိုင်ဂျန်ရဲ့အစိတ်အပိုင်းအဖြစ် နိုင်ငံတကာက အသိအမှတ်ပြုထားတဲ့ အဲဒီဒေသအတွက် နှစ်ဘက်စလုံး ဆယ်စုနှစ်ချီ တိုက်ပွဲဝင်ခဲ့ကြတာပါ။ ဒါပေမဲ့ ၂၀၂၀ စစ်ပွဲမတိုင်ခင်အထိ အာမေးနီးယန်းလူမျိုးစုတွေ အနေများပြီး သူတို့က ထိန်းချုပ်ထားပါတယ်။ 

၂၀၂၀ ပြည့်နှစ်က  သီတင်း ၆ ပတ်ကြာ စစ်ပွဲ ဖြစ်ပွားပြီးနောက်မှာ အဆိုးရွားဆုံး ထိပ်တိုက်တွေ့မှုတွေကြောင့် လူထောင်ပေါင်းများစွာ သေဆုံးခဲ့ရပါတယ်။