မြဝတီ-ကော့ကရိတ်၊ အာရှလမ်းမတိုက်ပွဲအတွင်း  ကျားသစ်နက်စစ်ကြောင်းတပ်ဖွဲ့ဝင်  ရဲဘော်လက်ချ်မီး ကျဆုံးခဲ့ကြောင်း ကျားသစ်နက်စစ်ကြောင်းက ဇန်နဝါရီ ၁၀ ရက် ဒီနေ့ သတင်းထုတ်ပြန်ပါတယ်။

ဇန်နဝါရီ ၈ ရက် ညဦးပိုင်းက မြဝတီ-ကော့ကရိတ် အာရှလမ်းမတနေရာမှာ နယ်မြေရှင်းလင်းရေး ဆောင်ရွက်တဲ့ ကျားသစ်နက်စစ်ကြောင်းနဲ့ ကော့နွှဲဘက်ကို စစ်ကူသွားရောက်တဲ့ စစ်ကောင်စီတပ်ရဲ့ တပ်မ-၄၄ လက်အောက်ခံ ခမရ-၃ တို့ ထိတွေ့တိုက်ပွဲဖြစ်ပွားခဲ့ပြီး အဲဒီတိုက်ပွဲမှာ သူ ကျဆုံးခဲ့တာ ဖြစ်ပါတယ်။

“အသက်က ၂ဝ ကျော်ရုံလေး ရှိပါသေးတယ်ဗျ။ ပျော်ပျော်ရွှင်ရွှင်နဲ့ နေတတ်တယ်။ မိမိတပ်ထဲက လူကြီးလူငယ်မရွေးကို ဖော်ဖော်ရွေရွေနဲ့ ဆက်ဆံတတ်ပြီး အမြဲပြုံးနေတတ်တဲ့သူ လူငယ်လေးပါ။ တော်လှန်ရေးအပေါ် ခံယူချက်ကတော့ အတော်လေး ကောင်းမွန်ပါတယ်။ အသက်အရွယ်နဲ့ မလိုက်အောင် ခံယူချက်ပြင်းတယ်။ ဘာပဲပေးဆပ်ရ ပေးဆပ်ရ ရအောင်လုပ်မယ့်သူမျိုးပါ” လို့ နီးစပ်တဲ့ရဲဘော်တယောက်က ရဲဘော်လက်ချ်မီးအကြောင်း ပြန်ပြောပြပါတယ်။

အဲ့ဒီတိုက်ပွဲအတွင်း အသက်ကိုပဓာနမထားဘဲ ရွပ်ရွပ်ချွံချွံ တိုက်ပွဲဝင်ရင်း မြင့်မြတ်စွာ ကျဆုံးခဲ့ရတဲ့ ရဲဘော်လက်ချ်မီးကို ထာဝရအမှတ်ရ ဂုဏ်ယူနေမှာဖြစ်တယ်လို့ ကျားသစ်နက်စစ်ကြောင်းက ထုတ်ပြန်ထားပါတယ်။

တိုက်ပွဲအတွင်း စစ်ကောင်စီတပ်ဘက်က ထိခိုက်သေဆုံးမှု အခြေအနေကိုတော့ လတ်တလော အတည်မပြုနိုင်သေးဘဲ စိစစ်နေဆဲဖြစ်တယ်လို့ ကျားသစ်နက်စစ်ကြောင်းက ထုတ်ပြန်ထားပါတယ်။

စစ်ကောင်စီ ဒုခေါင်းဆောင် ခရီးစဉ်ရှိတာကြောင့် ရန်ကုန်-ရေး-ထားဝယ်-မြိတ်ကားလမ်း အာရှလမ်းမပေါ်က နေရာအတော်များများမှာ စစ်ကောင်စီတပ်တွေ လုံခြုံရေး တင်းကျပ်ထားတယ်လို့ ဒေသခံတွေက ပြောပါတယ်။

ဒေသဆိုင်ရာ PDF အဖွဲ့ တာဝန်ရှိသူတဦးက "အင်အားတွေ အတော်များများ ချထားတယ်။ ကာကွယ်ရေး ဒုတိယစစ်ဦးချုပ် စိုးဝင်း တနင်္သာရီခရီးစဉ်ရှိတယ် ကြားပြီး အင်အားတွေချထားတာ။ လုံခြုံရေးအသွင်လား၊ ဒီဘက် စစ်ထိုးမလား မပြောတတ်သေးဘူး။ ကျနော်တို့ PDF ဘက်က အသင့်အနေထား စောင့်ကြည့်နေတယ်" လို့ ပြောပါတယ်။

ရေးမြို့နယ် နယ်မြေခံတပ်ရင်းတွေဘက်ကလည်း ပြီးခဲ့တဲ့ ၂ ရက်နေ့ကတည်းက စစ်ဘက်သာမက အရပ်ဘက်အသွင်ဆောင်ကာ နယ်မြေလုံခြုံရေးတွေ ပိုမိုလှုပ်ရှားလာနေလို့ ရေး-သံဖြူဇရပ်လမ်းမှာရှိတဲ့ ရာဘာခြံ အလုပ်သမားတွေ စိုးရိမ်နေကြပါတယ်။

စစ်ရေးအရ တင်းမာမှုဖြစ်နေတဲ့ တနင်္သာရီတိုင်းနဲ့ မွန်ပြည်နယ်ကို စစ်ကောင်စီ ဒုတိယကာကွယ်ရေးစစ်ဦးစီးချုပ် ဒုဗိုလ်ချုပ်မှူးကြီးစိုးဝင်း စည်းရုံးရေးဆင်းနေပြီး မေ ၁ ရက်ကနေ ၇ ရက်နေ့အထိ သွားရောက်မယ့် ခရီးစဉ် သတင်းတွေလည်း ထွက်ပေါ်နေပါတယ်။

ဒုဗိုလ်ချုပ်မှူးကြီးစိုးဝင်းဟာ မေ ၁ ရက်က တနင်္သာရီတိုင်း ဘုတ်ပြင်း၊ ကျွန်းစု၊ ဇာဒက်ကြီး၊ မော်တုံးကြီး၊ မြိတ်တို့ကို သွားရောက်ခဲ့ပြီး မေ ၂ ရက်မှာ မြိတ်မြို့နယ် ပလောက်၊ ကင်းတောင်၊ ဟိန်းဇဲ၊ မေ ၃ ရက်မှာ မော်လမြိုင်၊ သံဖြူဇရပ်/ဝဲကလိ၊ ရေးမြို့နယ်၊ မေ ၄ ရက်မှာ ထားဝယ်နဲ့ မေ ၅ ရက်မှာ ကိုကိုးကျွန်း၊ မေ ၇ ရက်မှာ ရန်ကုန်ကနေ နေပြည်တော်ကို သွားမယ်လို့ သိရပါတယ်။