ဖမ်းဆီးခံခဲ့ရတဲ့ တနင်္သာရီတိုင်း၊ မြိတ်မြို့အခြေစိုက် Eleven Media သတင်းထောက် ကိုဇော်မိုးဦးဟာ စက်တင်ဘာ ၃ ရက်နေ့ မနက် ၁၁ နာရီအချိန်လောက်က ပြန်လည် လွတ်မြောက်လာခဲ့တယ်လို့ ကာယကံရှင်က DVB ကို ပြောပါတယ်။

သတင်းထောက် ကိုဇော်မိုးဦးကို စက်တင်ဘာ ၁ ရက်နေ့ မနက် ၁ နာရီခွဲအချိန်လောက်မှာ အာဏာသိမ်း စစ်ကောင်စီတပ်ဖွဲ့တွေက ကားသုံးစီးနဲ့ နေအိမ်မှာ လာရောက်ဖမ်းဆီးသွားခဲ့တာ ဖြစ်ပါတယ်။

လာရောက်ဖမ်းဆီးပြီးနောက် ရေးသားခဲ့တဲ့ သတင်းနဲ့ပတ်သက်ပြီး မြိတ်မြို့မရဲစခန်းမှာ ၂ ရက်နီးပါးအကြာ စစ်ဆေးမေးမြန်းတာတွေ လုပ်ဆောင်ခဲ့ပါတယ်။

ဖမ်းဆီးစစ်ဆေးစဉ် ဆန္ဒပြပွဲ သတင်းရေးသားခဲ့တဲ့ အကြောင်းအရာတွေ အဓိကထား မေးမြန်းတာ၊ ပြန်လည်ဖတ်ပြတာတွေ လုပ်ဆောင်ခဲ့ပြီး ရိုက်နှက်စစ်ဆေးတာ မရှိဘူးလို့ ဆိုပါတယ်။

ခံဝန်ထိုးရာမှာတော့ ရေးသားခဲ့တဲ့ သတင်းတွေအပေါ် တာဝန်ယူဖို့နဲ့ သုံးလအတွင်း မြိတ်မြို့ကနေ တခြားမြို့နယ်တွေကို သွားလာတာတွေ မလုပ်ဖို့ ပါဝင်ပါတယ်။

စစ်တပ် အာဏာသိမ်းပြီးနောက် မြိတ်မြို့မှာ သတင်းသမား ၃ ဦးထိ ဖမ်းဆီးခံရပြီး အဲဒီထဲမှာ DVB သတင်းဌာနက ကိုအောင်ကျော်နဲ့ mizzima သတင်းဌာန အလွတ်တန်းသတင်းထောက် ကိုဇော်ဇော်တို့မှာတော့ ဖမ်းဆီးခံရပြီးနောက် ထောင်ဒဏ် ၂ နှစ်စီ အမိန့်ချခံထားရပါတယ်။

တနင်္သာရီတိုင်း၊ မြိတ်မြို့အခြေစိုက် Eleven Media သတင်းထောက် ကိုဇော်မိုးဦးဟာ ဒီကနေ့ စက်တင်ဘာ ၁ ရက် မနက် ၁ နာရီခွဲလောက်က  ဖမ်းဆီးခံလိုက်ရတယ်လို့ မိသားစုဝင်တွေက ဒီဗွီဘီကို ပြောပါတယ်။

သတင်းထောက် ကို‌ဇော်မိုးဦးကို  စစ်ကောင်စီတပ်ဖွဲ့ဝင်တွေက ကားသုံးစီးနဲ့ နေအိမ်မှာ လာရောက် တံခါးအတင်းဖွင့်ခိုင်းပြီး ရှာဖွေစစ်ဆေးတာတွေ လုပ်ဆောင်ပြီးနောက် ဖမ်းဆီးသွားခဲ့တာလို့လည်း ပြောပါတယ်။

ဖမ်းဆီးသွားစဉ် နေအိမ်ရှိ ဖုန်းအားလုံးနဲ့ လက်တော့ပ်တွေကိုပါ သိမ်းယူသွားခဲ့တယ်လို့လည်း ဆိုပါတယ်။

လက်ရှိမှာတော့ သတင်းထောက် ကိုဇော်မိုးဦးကို မြိတ်မြို့ရဲစခန်းမှာ ဖမ်းဆီးထိန်းသိမ်းထားတာ ဖြစ်ပြီး လက်ရှိအချိန်ထိ မိသားစုနဲ့ အဆက်အသွယ် မရသေးပါဘူးလို့ သိရပါတယ်။

ကိုဇော်မိုးဦးဟာ မြိတ်မြို့က ထုံးဖိုလူငယ်များ ပရဟိတနာရေးကူညီမှုအသင်းအဖွဲ့ဝင် တစ်ဦး ဖြစ်သလို ကိုဗစ်တတိယလှိုင်းကာလအတွင်း နေ့ရောညပါ ပါဝင်ကူညီနေတဲ့ စေတနာ့ဝန်ထမ်း တစ်ဦးလည်း  ဖြစ်ပါတယ်။

တနင်္သာရီတိုင်းမှာ စစ်တပ် အာဏာသိမ်းပြီးနောက် သတင်းထောက် ၄ ဦးထိ ဖမ်းဆီးခံထားရပါတယ်။ အဲဒီထဲက မြိတ်မြို့က သတင်းသမား ၂ ဦးဖြစ်တဲ့ DVB သတင်းဌာနက ကိုအောင်ကျော်နဲ့ Mizzima သတင်းဌာန အလွတ်တန်းသတင်းထောက် ကိုဇော်ဇော်တို့ကို ဖမ်းဆီးပြီးနောက် အာဏာသိမ်း စစ်ကောင်စီက ထောင်ဒဏ် ၂ နှစ်စီ အမိန့်ချထားတာပါ။

ဒါအပြင် ထားဝယ်အခြေစိုက် သတင်းဌာန Dakkhina Insight က ကိုနိုင်လင်းထွန်းကိုလည်း စစ်ကောင်စီက ဖမ်းဆီးထိန်းသိမ်းထားပြီး ထောင်ထဲကနေ အမှုရင်ဆိုင်နေရပါတယ်။

ဖေဖော်ဝါရီ ၁ ရက် စစ်တပ်အာဏာသိမ်းပြီးကတည်းက မြန်မာနိုင်ငံတဝန်း သတင်းသမားပေါင်း ၅၀ ကျော်ဖမ်းဆီးခံခဲ့ရပြီး  တချို့ပြန်လွတ်လာပေမဲ့ လက်ရှိအချိန်ထိ အကျဉ်းထောင်အသီးသီးမှာ သတင်းသမား အယောက် ၃၀ ကျော် ကျန်ရှိနေပါတယ်။