အပြည်ပြည်ဆိုင်ရာကြက်ခြေနီကော်မတီ (ICRC) ဟာ ယီမင်ပဋိပက္ခနဲ့ ဆက်နွှယ်နေတဲ့ အကျဉ်းသား ၉၀၀ နီးပါးကို လွှဲပြောင်းပေးဖို့ လူသားချင်း စာနာထောက်ထားမှုဆိုင်ရာ လုပ်ငန်းကို ဧပြီ ၁၄ ရက်မှာ စတင်ခဲ့လိုက်ပါတယ်။
လူပေါင်း ၁၂၅ ဦး တင်ဆောင်လာတဲ့ ပထမဆုံး အကျဉ်းသားလဲလှယ်ရေး လေယာဉ်ဟာ ဧပြီ ၁၄ ရက် သောကြာနေ့မှာ ဟူသီတို့ ထိန်းချုပ်ထားတဲ့ မြို့တော်ဆာနာကို ဆင်းသက်လာသလို တပြိုင်နက်တည်းမှာပဲ လူ ၃၅ ဦးကို တင်ဆောင်လာတဲ့ ဒုတိယမြောက် လေကြောင်းခရီးစဉ်က အစိုးရမြို့ဖြစ်တဲ့ အေဒင်မြို့ကိုဆင်းသက်ခဲ့တာပါ။
ယီမင်ပဋိပက္ခမှာ နှစ်ဖက် အထိန်းသိမ်းခံထားရသူ ၉၀၀ နီးပါးကို လွှတ်ပေးခြင်းနဲ့ လဲလှယ်ခြင်းတို့ကို သောကြာနေ့မှာ စတင်ခဲ့ကြောင်း အပြည်ပြည်ဆိုင်ရာ ကြက်ခြေနီကော်မတီက ပြောကြားခဲ့ပါတယ်။
လုပ်ငန်းစဉ်ကို စီမံခန့်ခွဲနေတဲ့ ICRC က လာမယ့်ရက်တွေအတွင်း ယီမင်နဲ့ဆော်ဒီအာရေဗျရှိ မြို့ ၆ မြို့ကြားမှာ လွတ်မြောက်လာသူတွေကို သယ်ဆောင်ဖို့ သူ့ရဲ့လေယာဉ်တွေကို အသုံးပြုခဲ့ပါတယ်။
ပြီးခဲ့တဲ့လက ဆွစ်ဇာလန်က ဆွေးနွေးပွဲတွေမှာ စစ်မက်ဖြစ်ပွားနေတဲ့ ပါတီတွေဟာ ထိန်းသိမ်းခံထားရသူ ၈၈၇ ဦးကို လွှတ်ပေးဖို့ နဲ့ နောက်ထပ်လွှတ်ပေးဖို့အတွက် မေလမှာ ထပ်ပြီး တွေ့ဆုံဆွေးနွေးကြဖို့ သဘောတူညီခဲ့ကြပါတယ်။
ရီယာ့ဒ်နဲ့ တီဟီရန်တို့ဟာ ပြတ်တောက်သွားခဲ့တဲ့ သံတမန်ဆက်ဆံရေးကို ပြန်လည်ထူထောင်ဖို့ အရင်လက သဘောတူညီခဲ့ကြပြီး ယီမင်ရဲ့ ငြိမ်းချမ်းရေးလုပ်ငန်းစဉ်ဟာ တိုးတက်မှု ရှိလာမယ်လို့ မျှော်လင့်ချက်တွေ မြင့်တက်လာခဲ့ပါတယ်။
ဆော်ဒီကိုယ်စားလှယ်အဖွဲ့ဟာ ကြာသပတေးနေ့က မြို့တော်ဆာနားမှာ ဟူသီအဖွဲ့နဲ့ ငြိမ်းချမ်းရေးဆွေးနွေးပွဲကို အဆုံးသတ်ခဲ့ပြီး တာဝန်ရှိသူတွေက တိုးတက်မှုရှိကြောင်း ထောက်ပြထားပါတယ်။ ကျန်ရှိနေတဲ့ ကွဲလွဲချက်တွေကို ဖယ်ရှားဖို့အတွက် နောက်ထပ် ဆွေးနွေးမှုတွေ လိုအပ်ကြောင်း ပြောကြားခဲ့ပါတယ်။
အပြည်ပြည်ဆိုင်ရာ ကြက်ခြေနီကော်မတီ (ICRC) ဟာ ယူကရိန်း စစ်သုံ့ပန်းတွေရဲ့ အခွင့်အရေးတွေကို စောင့်ရှောက်ဖို့ ပျက်ကွက်ခဲ့ကြောင်း သမ္မတ ဗိုလိုဒီမာ ဇလန်းစကီးက အောက်တိုဘာ ၁၃ ရက်နေ့မှာ စွပ်စွဲပြောကြားလိုက်ပြီး ရုရှားသိမ်းပိုက်ထားတဲ့ နိုင်ငံအရှေ့ဘက်ရှိ စခန်းတခုကို မစ်ရှင်တခုဆောင်ရွက်ဖို့ တိုက်တွန်းခဲ့ပါတယ်။
ဇူလိုင်လအတွင်းက ပေါက်ကွဲမှုနဲ့ မီးလောင်မှုကြောင့် ယူကရိန်းတပ်ဖွဲ့ဝင် ဒါဇင်နဲ့ချီ သေဆုံးခဲ့တဲ့ ယူကရိန်းအရှေ့ပိုင်းက နာမည်ဆိုးနဲ့ကျော်ကြားတဲ့ အိုလန်နိဗ်ကာစခန်းကို ဘယ်သူမှ မရောက်ဖူးသေးဘူးလို့ ဇလန်းစကီးက သူ့ရဲ့ ညစဉ် ဗီဒီယိုမိန့်ခွန်းထဲမှာ ပြောသွားပါတယ်။
“ယူကရိန်း စစ်အကျဉ်းသားတွေကို ဖမ်းဆီးထားတဲ့ အိုလန်နိဗ်ကာ ချွေးတပ်စခန်းကို ဝင်ရောက်ခွင့်ကို သဘောတူထားတဲ့အတိုင်း စီစဉ်ပေးရမှာဖြစ်ပြီး ကြက်ခြေနီက ဒါကို လုပ်နိုင်ပါလိမ့်မယ်” လို့ သူကပြောပါတယ်။ ကြက်ခြေနီမှာ ကျင့်ဝတ်ဆိုင်ရာ တာဝန်ဝတ္တရား ရှိပြီး လုပ်ပိုင်ခွင့် အပြည့်အဝ ရှိရမယ်လို့လည်း ဇလန်းစကီးက ဆိုပါတယ်။
ဇလန်းစကီးရဲ့ ဝန်ထမ်းအကြီးအကဲဟာ ICRC ကို ၃ ရက်အတွင်း မစ်ရှင်တခုစတင်ဖို့ ဒါမှမဟုတ် ကိယက်ဗ်အာဏာပိုင်တွေက သူတို့ကိုယ်တိုင် လုပ်ဆောင်မှာဖြစ်ကြောင်း ရာဇသံ သီးခြားထုတ်ပြန်ခဲ့ပါတယ်။ ဒီကိစ္စနဲ့ပတ်သက်ပြီး မှတ်ချက်ပေးဖို့ ICRC က ဘယ်သူ့ကိုမှ ဆက်သွယ်လို့ မရနိုင်သေးပါဘူး။
ဇူလိုင်လတုန်းက အိုလန်နိဗ်ကာစခန်းကို တိုက်ခိုက်ရာမှာ ယူကရိန်းတပ်ဖွဲ့ဝင် ၅၀ ကျော် သေဆုံးခဲ့ပြီး အများစုမှာ မာရီယူပိုလ်ရှိ အာဇော့ဗ်စတယ်လ် သံမဏိစက်ရုံကို ခုခံကာကွယ်ခဲ့ကြတဲ့ စစ်သည်တွေဖြစ်ပါတယ်။
ယူကရိန်းက ဒါဟာ ရုရှားတွေက အကျဉ်းသားတွေအပေါ် သူတို့ရဲ့ နှိပ်စက်သတ်ဖြတ်မှုတွေကို ဖုံးကွယ်ဖို့ စစ်တန်းလျားတွေကို ဗုံးခွဲတိုက်ခိုက်တာဖြစ်ကြောင်း စွပ်စွဲခဲ့ပါတယ်။
ရုရှားအာဏာပိုင်တွေကလည်း ဒါဟာ ယူကရိန်းဒုံးကျည်တစင်း ပေါက်ကွဲမှု ဖြစ်ပွားခဲ့ကြောင်း ပြောကြားခဲ့ပါတယ်။