ရှမ်းပြည်မြောက်ပိုင်း၊ လားရှိုးခရိုင်၊ သိန္နီမြို့နယ်၊ ဟိုတုံကျေးရွာထဲကို ပြီးခဲ့တဲ့ရက်ပိုင်းမှာ စစ်ကောင်စီတပ်က လေယာဉ်နဲ့ ဗုံးကြဲတိုက်ခိုက်ခဲ့တဲ့အတွက် ရွာသား ၁ ဦးသေဆုံး ၁၂ ဦး ဒဏ်ရာရကာ နေအိမ်နဲ့ မော်တော်ကားတွေပါ ပျက်စီးသွားတယ်လို့ ကိုးကန့်ပြန်ကြားရေးက ပြောပါတယ်။
ဧပြီ ၂၆ ရက် ည ၁၁ နာရီခွဲလောက်မှာ စစ်ကောင်စီဘက်က လေယာဉ်နဲ့ ဗုံး ၂ ကြိမ် လာကြဲခဲ့ကြောင်း၊ အဆိုပါဗုံးသီးဟာ နေအိမ် ၂ လုံးရဲ့ဘေး ၂ မီတာအကွာအဝေးမှာ လာကျတဲ့အတွက် နေအိမ်ရော ရပ်ထားတဲ့မော်တော်ကားပါ ပျက်စီးခဲ့ကာ အိမ်ထဲက လူ ၁၃ ယောက် ထိခိုက်ဒဏ်ရာရပြီး MNDAA ကိုးကန့်တပ်ဖွဲ့ဝင်တွေက ဆေးကုသဖို့ ခေါ်ဆောင်သွားစဉ် လမ်းမှာ ၁ ဦးသေဆုံးသွားတယ်လို့ ဆိုပါတယ်။
စစ်ကောင်စီဘက်က ဘာကြောင့် ခုလိုလာပစ်တယ်ဆိုတာ မသိရကြောင်း ၊ ဒီမတိုင်ခင်ရှေ့ကတော့ ကိုးကန့်တပ်ဖွဲ့က ကျေးရွာဖွံ့ဖြိုးရေးအတွက် ရွာသားတွေခေါ်ပြီး အစည်အဝေးလုပ်ခဲ့ကြောင်း သူတို့က ကိုးကန့်တပ်ဖွဲ့ဝင်တွေ အဲဒီနယ်မြေမှာ လာလှုပ်ရှားတယ် ထင်ပြီး ပစ်ခတ်တာလို့ ယူဆရကြောင်း ကိုးကန့်ပြန်ကြားရေးက ပြောပါတယ်။
ဒီတိုက်ခိုက်မှုနဲ့ ပတ်သက်ပြီး သိန္နီဒေသခံတစ်ဦးကတော့ အဲဒီရွာတွေဟာ သိန္နီနဲ့ ၁၀ မိုင်ကျော်ဝေးတဲ့ ကွမ်းလုံအထက် သံလွင်မြစ်အစပ်မှာဖြစ်လို့ သတင်းမှန်သိရဖို့ ခက်ခဲကြောင်းနဲ့ နမ့်ခိုက်ရွာသားတွေ ပြောပြတာကတော့ ၂၆ ရက်ည ၁၀ နာရီခွဲနဲ့ ၁၁ နာရီဝန်းကျင်မှာ စစ်တပ်ကလေယာဉ်နဲ့ လာပစ်လို့ ကိုးကန့်တပ်ဖွဲ့ဝင် ၅ ဦးကျပြီး ၃ ဦး ဒဏ်ရာရသွားကြောင်းနဲ့ ရွာသားတချို့လည်း ထိမှန်ဒဏ်ရာရကြောင်း ပြောပါတယ်။
အဆိုပါဟိုတုံကျေးရွာဟာ နမ့်ခိုက်ရွာအထက်ဘက်မှာရှိပြီး အရင်တုန်းက ကချင် KDA ကောင်းခါးပြည်သူ့စစ်တွေ စခန်းချတဲ့နေရာ ဖြစ်ပါတယ်။
လွန်ခဲ့တဲ့ ၂ လကျော်က TNLA ပလောင်တပ်နဲ့တိုက်ပွဲဖြစ်ပြီး KDA တွေက ကောင်းခါးရွာဘက် ဆုတ်ခွာသွားပြီးနောက် ကိုးကန့်တပ်တွေ လာနေကြပြီး အဲဒီဒေသမှာတော့ ရှမ်း၊ ပလောင်၊ ကိုးကန့် ၊ ကချင် စတဲ့တိုင်းရင်းသားတွေ ရောနှောနေထိုင်ကြပါတယ်။
ရှမ်းပြည်နယ်မြောက်ပိုင်း၊ ကိုးကန့်ကိုယ်ပိုင်အုပ်ချုပ်ခွင့်ရဒေသ၊ ချင်းရွှေဟော်မြို့နယ် နမ့်ဖာတောင်မှာ တပ်စွဲထားတဲ့ မြန်မာအမျိုးသားဒီမိုကရက်တစ်မဟာမိတ်တပ်-MNDAA (ကိုးကန့်) တပ်က ဒီဇင်ဘာ ၂၂ ရက်မှာ နယ်မြေရှင်းလင်းစဉ် စစ်ကောင်စီတပ်ရဲ့ လက်နက်ခဲယမ်းနဲ့ စစ်အသုံးအဆောင်ပစ္စည်းတွေ သိမ်းဆည်းရမိခဲ့တယ်လို့ သတင်းထုတ်ပြန်ပါတယ်။
နမ့်ဖာတောင်မှာ တပ်စွဲထားတဲ့ MNDAA စခန်းကို ထိုးစစ်ဆင်တိုက်ခိုက်လာတဲ့ စစ်ကောင်စီတပ်ဟာ တိုက်ပွဲအတွင်း ထိခိုက်သေဆုံးမှုများပြီး ဆုတ်ခွာသွားတဲ့အတွက် အခုလို နယ်မြေရှင်းလင်းရေး လုပ်ခဲ့တာပါ။
သိမ်းဆည်းရမိတဲ့ လက်နက်တွေထဲမှာ ၆၀ မီလီမီတာ မော်တာကျည် ၇ တောင့်၊ လက်ပစ်ဗုံး ၅ လုံး၊ မြေမြှုပ်မိုင်း ၁ လုံး၊ မဂ္ဂဇင်း ၉ ခု၊ Type 69 ဒုံးပျံ ၃ လုံး၊ ဒုံးပျံပြွန် ၄ ခု၊ ၅ ဒသမ ၅၆ မီလီမီတာကျည် ၆၂၃ တောင့်၊ ရိုင်ဖယ်ခါးပတ် ၇ ခု၊ ပစ္စတို ၄ လက်၊ ရိုင်ဖယ်လက်ပစ်ဗုံး ကျည်အလွတ် ၄ လုံး၊ အမြောက်ဆန် ၆ ခု၊ ရိုင်ဖယ် ၁ လက်၊ မိုးကြိုးပစ် ၁ လုံးတို့ ပါဝင်ပါတယ်။
ဒါ့အပြင် စကားပြောစက် ၃ လုံး၊ လက်ကိုင်ဖုန်း ၂ လုံး၊ ဂြိုဟ်တုတည်နေရာနဲ့ လမ်းညွှန်ချက် ၁ လုံး၊ စစ်ယူနီဖောင်း ၂ ထည်၊ စစ်ဦးထုပ် ၃ လုံး၊ သံမဏိခမောက် ၁ လုံး၊ ကျည်ကာအင်္ကျီ ၃ ထည်၊ ရေနွေးအိုး ၈ လုံး၊ အားသွင်းပစ္စည်း ၂ ခု၊ ငွေကျပ် ၂၀,၀၀၀၊ အိတ်ငယ် ၁ လုံး၊ အိုး ၄ လုံး၊ ထမင်းဘူး ၁ ဘူးနဲ့ တခြား နေ့စဉ်သုံးပစ္စည်းတွေကို သိမ်းဆည်ရမိခဲ့တယ်လို့ ကိုးကန့်သတင်းဌာနက ဖော်ပြထားပါတယ်။
ပြီးခဲ့တဲ့ ဒီဇင်ဘာ ၂၁ ရက်ကလည်း စစ်ကောင်စီတပ်၊ တပ်မ ၉၉ လက်အောက်ခံ ခမရ ၄၂၀ တပ်ရင်းက ခန့်မှန်းအင်အား ၈၀ နီးပါးနဲ့ MNDAA ရဲ့ တပ်မဟာ ၅၁၁ ရှိရာ ရှမ်းပြည်နယ်မြောက်ပိုင်း၊ မူဆယ်ခရိုင်၊ မုံးကိုးမြို့နယ်၊ တာမုံးပေါ်ဒေသအတွင်းကို ထိုးစစ် ဝင်ရောက်လာတာကြောင့် တိုက်ပွဲပြင်းထန်ဖြစ်ပွားခဲ့ပါတယ်။
ဒီဇင်ဘာ ၂၁ ရက်ကဖြစ်ပွားခဲ့တဲ့ မုံးကိုးတိုက်ပွဲအတွင်း MNDAA ကိုးကန့်တပ်သား ၁ ဦး ကျဆုံးပြီး ၁ ဦးမှာ အနည်းငယ် ဒဏ်ရာရရှိခဲ့ပါတယ်။
မြန်မာအမျိုးသားဒီမိုကရက်တစ် မဟာမိတ်တပ် (MNDAA) ဟာ ရှမ်းပြည်နယ်မြောက်ပိုင်း အခြေပြု လက်နက်ကိုင်တော်လှန်ရေးတပ်ဖွဲ့တခုဖြစ်ပြီး ၂၀၁၅ ခုနှစ် ဖေဖဝါရီလက စတင်ကာ စစ်ကောင်စီတပ်နဲ့ တကျော့ပြန် တိုက်ပွဲဖြစ်ပွားခဲ့တာပါ။
စစ်ကောင်စီတပ်နဲ့ MNDAA ကိုးကန့်တပ်ဟာ ၈ နှစ်နီးပါး စဉ်ဆက်မပြတ် တိုက်ပွဲတွေ ဖြစ်ပွားခဲ့သလို လက်ရှိအချိန်ထိလည်း စစ်ရေးတင်းမာနေဆဲ ဖြစ်ပါတယ်။
