ကချင်လွတ်မြောက်ရေးတပ်မတော် (ကေအိုင်အေ) ထိန်းချုပ်နယ်မြေ လိုင်ဇာမြို့မှာ ဇွန်လ ၉ ရက်က တကျော့ပြန်စစ်ပွဲနဲ့  ကချင်စစ်ဘေးရှောင် ၁၀ နှစ်ပြည့် အမှတ်တရ ဓာတ်ပုံပြပွဲအခမ်းအနားပြုလုပ်နေပါတယ်။

လိုင်ဇာမြို့ရှိ Hparat Panglai Research Centre မှာ ပြုလုပ်တဲ့ အဆိုပါအခမ်းအနားမှာ ၂၀၁၁ ခုနှစ် ဇွန် ၉ ရက်က စတင်ခဲ့တဲ့  ကေအိုင်အေနဲ့ အကြမ်းဖက် စစ်တပ်အကြား တကျော့ပြန်လည်ဖြစ်ပွားခဲ့တဲ့ ပြည်တွင်းစစ်ပွဲကြောင့် တိမ်းရှောင်ခဲ့ရတဲ့ စစ်ရှောင်ပြည်သူတွေရဲ့ ပုံရိပ်တွေခင်းကျင်းပြသထားတာ ဖြစ်ပါတယ်။

ဒါ့အပြင် နွေဦးတော်လှန်ရေးကြောင့် ဖမ်းဆီးခံရတဲ့ ဒေသတွင်း သတင်း‌ထောက်တွေရဲ့ ဓာတ်ပုံတွေကိုလည်း ဂုဏ်ပြုပြသထားတာ တွေ့ရပါတယ်။

Fight For Just- Peace လို့ အမည်ပေးထားတဲ့ အဆိုပါအခမ်းအနားကို မနက် ၈ နာရီမှ ညနေ ၅ နာရီထိ ဖွင့်လှစ်ပြသထားမှာဖြစ်ပြီး ဈေးရောင်းရန်ပုံငွေရှာဖွေတဲ့ အစီအစဉ်တွေ ပါ၀င်မှာဖြစ်တယ်လို့လည်း သိရပါတယ်။

Hparat Panglai Research Centre ကို ကေအိုင်အေ ဒုတိယဗိုလ်ချုပ်ကြီးဂွမ်မော် တည်ထောင်ထားတာဖြစ်ပြီး မည်သူမဆို လာရောက်လေ့လာနိုင်တယ်လို့လည်း သိရပါတယ်။